Read MAASAI REVISED PROTESTANT Olkerempe le Nkai 103 Bible Online

Olkerempe le Nkai 103 - MAASAI REVISED PROTESTANT bible

Olkerempe le Nkai 103

¹Olkerempe le Daudi. Isisa Olaitoriani, iyie lo tau lai, o pooki natii atua nanu, isisa enkarna enye sinyati!

²Isisa Olaitoriani, iyie lo tau lai, nimincho kirikino nkitaasat enyena pooki,

³ninye likipalaki nkitarruorrot inono pooki, ninye likinchiunye imuoyiaritin inono pooki.

⁴Ninye okordu enkishui ino aitung'uaa engumoto, ninye likinchopoki enyorrata enye nauno o lng'ur.

⁵Ninye likintaraposh iyie too supati enkata naba anaa eninchu, metaa keitang'ejuki kitisho ino nitiu anaa olkurragos.

⁶Olaitoriani oas isupati neisho isipat lelo ooitorogonyi.

⁷Ninye oitayiolo Musa nkoitoi enyena, neitayiolo iasat enyena iltung'ana le Israel.

⁸Keeta Olaitoriani olng'ur naa kaaipirisioni, mesioki agoro neeta enyorrata nauno.

⁹Meisikong'isho ninye anaake, nemeibung engoro enye ntarasi.

¹⁰Meitaas ninye iyiook te risioroto oo ng'ok ang, nemeosh ninye iyiook te risioroto oo nkitarruorrot ang.

¹¹Amu ore eneba anaa enalakuaniki keper enkop, neijia eba enkitoo e nyorrata enye nauno te lelo ooure ninye.

¹²Ore anaa enalakuaniki oloosaen oloontoluo, neijia eiko ninye aitalamaa nkitarruorrot ang te iyiook.

¹³Ore anaa enaing'urrie olpayian inkera enyena, neijia eiko Olaitoriani eing'urrie lelo ooure ninye.

¹⁴Amu keyiolo ninye enkitobirunoto ang, edamu ninye ajo kira iyiook enterit.

¹⁵Ore tialo tung'ani, etiu nkolong'i enyena anaa nkujit; kebul ninye anaa entapukai e ong'ata;

¹⁶amu kekutaa osiwuo nedung'ori alo, ore ewueji enye nemeitoki ayiolou.

¹⁷Kake ore ina nyorrata nauno o Laitoriani naa enoo ntarasi o ntarasi te lelo ooure ninye, neton esupatisho enye too nkera oo nkera enye,

¹⁸te lelo ooibung olning'o lenye nedamu aaibung nkitanapat enyena.

¹⁹Etipika Olaitoriani olorika lenye le nkitoo keper, naa enkitoria enye naitoreisho te pooki.

²⁰Esisa Olaitoriani intae lo malaika lenyena, intae kulo magil ooas enajo ororei lenye, entoning oltoilo lo rorei lenye!

²¹Esisa Olaitoriani, o lororani lenyena pooki lelo aisiaayiak lenyena oas eyieunoto enye!

²²Esisa Olaitoriani, nasiaitin enyena pooki, too wuejitin enyena pooki e nkitoria enye, isisa Olaitoriani lo tau lai!