Read MAASAI REVISED PROTESTANT Olkerempe le Nkai 106 Bible Online

Olkerempe le Nkai 106 - MAASAI REVISED PROTESTANT bible

Olkerempe le Nkai 106

¹Meisisi Olaitoriani! Enchoo Olaitoriani enashe, amu eisupat ninye; amu ore enyorrata enye nauno nebikoo ntarasi!

²Kaing'ae oidim aimaki mbaa e nking'asia o Laitoriani, aashu aitodolu enkisisa enye pooki?

³Emayiana lelo ooing'oru isipat, lelo ooing'oru isipat nkatitin pooki!

⁴Tadamuaki nanu, Olaitoriani, tinintodolu omom too ltung'ana linono; taretoki nanu ti nikordu ninche;

⁵pee atum atoduaa dupoto e lelo gelunot linono, pee atum ating'idayu te nchipai o losho lino, pee atum ating'idare enjung'ore ino.

⁶Ore iyiook o loo papa kitaasa eng'oki; kitaasa entorroni, kintarruoitie iyiook.

⁷Ore apa etii loo papa enkop e Misiri, neitu eshilaa isiaaitin inono e nking'asia; eitu ninche edamu eneba enyorrata ino nauno, kake etogolong'akita ninche Ilo otii Shumata Aisul te Enaiposha Nanyokie.

⁸Kake eitajewuo ninye ninche te nkaraki enkarna enye, pee etum aibalunye engolon enye magilani.

⁹Eisikong'a ninye Enaiposha Nanyokie, netoyu; nerikoo ninye ninche aimie enguton etotiwuo anaa olpurkel.

¹⁰Neaku eitajewuo ninye ninche te nkaina o lmang'atinta lenye, nekordu ninye ninche aitung'uaa engolon o lmang'atinta.

¹¹Neimulumul inkariak ilmang'ati lenye; eitu ninye elo obo.

¹²Neiruk taa ina kata irorei lenyena; nerany enkisisa enye.

¹³Kake etorikine ninche nabo kata isiaaitin enyena; neitu ninche eanyu enkiguana enye.

¹⁴Kake etijing'a ninche ing'uarrat torrok ti ong'ata, nepuo aatem Enkai to lpurkel;

¹⁵eishoo ninye ninche nena naatoomonutuo, kake eirriwaka ninche emuoyian e saso.

¹⁶Ore ina kata too lng'oborri pee etum iltung'ana olom te nkaraki Musa o Aron, ilo sinyati lo Laitoriani,

¹⁷neng'a enkop enkutuk neijoo Datan, neimisie encholiek e Abiran.

¹⁸Eipang'aka sii enkima ina sholiek; nepejoo olang'at le nkima ilarruok.

¹⁹Eitobirutua ninche olashe te Horeb, neserem ina kitanyaanyukoto nasholuno.

²⁰Eibelekenya ninche enkitoo e Nkai aaitaa enkitanyaanyukoto o lkiteng onya nkujit.

²¹Eitu ninche edamu Enkai Olaitajeunoni lenye, laa ninye apa otaasa mbaa sapuki te Misiri,

²²o isiaaitin e nking'asia tiatua enkop e Ham, o mbaa naaitureisho te mbata e naiposha Nanyokie.

²³Neaku etejo ninye, keidaikie ninche - keitu ninye eitashe Musa, ilo gelunoti lenye, te dukuya ninye, pee eibelekeny ina goro enye napi pee meidaikie ninche.

²⁴Nemenaa ninche ina kop sidai, nemeeta ninche enkirukoto too nkisiligat enyena.

²⁵Neing'unyung'uny ninche too lng'oborri lenye, neitu ening oltoilo lo Laitoriani.

²⁶Ore te nkaraki ina eilepie ninye enkaina enye neiro olmumai tialo ninche nchere keisho ninche metabatatata ti ong'ata,

²⁷neisardaikie sii eishoi enye tiatua loreren, aidapashaki ninche nkuapi.

²⁸Neitoki ninche aaibung'are Baal e Peor, nenya nkishoorot naatopolosakaki ilootuata;

²⁹neitagor ninche Olaitoriani too nkiaasin enye, nedoiki olmeitai ninche.

³⁰Neitashe Finehas asaisho, neiwuang'ieki olmeitai.

³¹Neikenakini ninye ina aajo esipata too ishoritin pooki ntarasi.

³²Neitagor ninche ninye too nkariak e Meriba, netum Musa enyamali te nkaraki ninche;

³³amu etipika ninche enkishui enye emion, neiro ninye irorei le ngoro.

³⁴Neitu ninche eidaikie iltung'ana, anaa enaitanapa Olaitoriani ninche,

³⁵kake etushulare ninche nkuapi neitamok ate easata anaa enataasa ninche.

³⁶Neisiaai ninche nena kitanyaanyukot enye, naa ninche naataa orreshet te ninche.

³⁷Neyieng aapolos ilayiok lenye, o ntoyie enye aapolosaki iloiriruani;

³⁸neibukoo ninche osarge lemeeta eleyiata, ilo sarge loo layiok lenye o ntoyie enye, apa naatopolosakitia nkitanyaanyukot e Kanaan, neisarkionieki ina kop te nkaraki ilo sarge.

³⁹Neaku etaa mesinya te nkaraki nena kiasin enye, neiborrie ninche onyek too nkiasin enye.

⁴⁰Neirowuaju engoro o Laitoriani te nkaraki iltung'ana lenyena, neibayu ninye enjung'ore enye;

⁴¹neishooyo ninye ninche apik inkaik oo loreren, pee etum ilapa ooiba ninche aaitoria ninche.

⁴²Neibooki ilmang'ati lenye ninche enkop, neyauni ninche aapik abori engolon enye.

⁴³Ore nkatitin kumok netokordua ninye ninche, kake etogolong'utua ninche too otikinot enye, neitadouni ninche te nkaraki ntorrok enye.

⁴⁴Ore ake eyia etishilayie ninye osina lenye, ina kata pee eishir ninche.

⁴⁵Etadamua ninye te nkaraki ninche osotua lenye, neirridu ninye te risioroto e nyorrata enye nauno.

⁴⁶Eishoo ninche meing'urrieki, lelo pooki apa ooibung'a ninche.

⁴⁷Ntajeu iyiook, Olaitoriani Enkai, ninturrurru iyiook aaitayu too loreren, pee kitum aaishoo enashe enkarna ino sinyati niking'idare enkisisa ino.

⁴⁸Meisisi Olaitoriani, Enkai e Israel, taata o ntarasi! Naa nchoo ejo iltung'ana pooki, “Eesai!” Meisisi Olaitoriani!