Read MAASAI REVISED PROTESTANT Olkerempe le Nkai 107 Bible Online

Olkerempe le Nkai 107 - MAASAI REVISED PROTESTANT bible

Olkerempe le Nkai 107

¹Enchoo Olaitoriani enashe, amu aisupat ninye; amu ore enyorrata enye nauno nebikoo ntarasi!

²Nchoo lelo ootokordua Olaitoriani metejo neijia, lelo ootokordua ninye aitayu tiatua enyamali

³neiturrur aitung'uaa nkuapi, aitung'uaa oloosaen o loo ntoluo, neitung'uaa moikuape o kopikop.

⁴Etilimanate embata aairrang'irrang to lpurkel, neitu etum enkoitoi nalo enkanasa nayeng'iyeng'areki.

⁵Ore te nkaraki esumash o enkure, neiminie osiligi tiatua ninche.

⁶Neishiraki ninche Olaitoriani tiatua enyamali enye, nekordu ninye ninche aitung'uaa osina lenye;

⁷etorikoyie ninye ninche aimie enkoitoi naitoriori, o metabaiki enkanasa napuo aamany.

⁸Nchoo eisho ninche Olaitoriani enashe, te nkaraki enyorrata enye nauno, te nkaraki isiaaitin enyena e nking'asia too nkera e tung'ani!

⁹Keitaraposh ninye ilo oata enkure, ore ilo oisumash neiputaki ntokitin sidain.

¹⁰Etotona embata tiatua enaimin o tiatua oloip le keeya, neikenori tiatua isinaitin too sekenke,

¹¹amu etogolong'akita ninche irorei le Nkai, nemenaa nkitanapat e Ilo otii Shumata Aisul.

¹²Neisinanuo iltauja lenye te nkaraki enkisiaayiare nagol; nebatata ninche, nemeetae oloret ninche.

¹³Neitoki ninche aaishiraki Olaitoriani te nyamali enye, nekordu ninye ninche aitayu tiatua isinaitin lenye;

¹⁴eyawua ninye ninche aitupuku tiatua enaimin o loip le keeya, negil iyenat enye tukul.

¹⁵Nchoo eisho ninche Olaitoriani enashe te nyorrata enye nauno, te nkaraki isiaaitin enyena e nking'asia too nkera e tung'ani!

¹⁶Amu etigila ninye nchomito o suyai nedung aitaa are eng'udi e sekenkei.

¹⁷Etamuoyia embata te nkaraki ing'ok enye, o te nkaraki entorroni enye netum isinaitin;

¹⁸neibayu iltauja lenye empukunoto pooki e ndaa, nenyikaki ninche kishomi e keeya.

¹⁹Neitoki ninche aaishiraki Olaitoriani te nyamali enye, nekordu ninye ninche aitung'uaa osina lenye;

²⁰neirriu ninye ororei lenye, neishiunye ninche, nekordu ninche aitung'uaa enkidaata.

²¹Nchoo eisho ninche Olaitoriani enashe te nkaraki enyorrata enye nauno, te nkaraki isiaaitin enyena e nking'asia too nkera e tung'ani!

²²Naa nchoo ninche eishooyo ilasarri le nashe, nelimu nkiasin enyena too sinkolioitin le ng'ida!

²³Eshomo embata enaiposha too melin, amirisho neinyangisho ti oriong inkariak sapuki;

²⁴nedol ninche nkiaasin o Laitoriani, isiaaitin enyena e nking'asia te enguton.

²⁵Amu eitanapa ninye, neinyeyie olkutati ogol, otudumua ilopir le naiposha.

²⁶Neilep ninche shumata, nedoyio aapuo enguton; nelepori iltauja lenye te nkaraki osina;

²⁷nepuo ninche te nkiesies neimerrimerr[12] anaa lamerak, neiting enkarriano enye.

²⁸Neitoki ninche aaishiraki Olaitoriani te nyamali enye, nekordu ninye ninche to sina lenye;

²⁹neitigir ninye olkutati, neitirring'ieki ilopir le naiposha.

³⁰Neng'idayu ninche te nkaraki naitirring'ieki, neyau ninye ninche ewueji enye neyieu.

³¹Nchoo eisho ninche Olaitoriani enashe te nkaraki enyorrata enye nauno, te nkaraki isiaaitin enyena e nking'asia too nkera e tung'ani!

³²Nchoo eisis ninche ninye te umata oo ltung'ana, neisis ninye tiatua eumata oo lpayiani.

³³Keibelekeny ninye ilkejek aitaa olpurkel, neibelekeny nchorroi aitaa enkop oo lbaat,

³⁴neibelekeny enkop sidai aitaa ewueji e munyan nemebulu toki, te nkaraki enkarruoisho oo loomanya.

³⁵Neibelekeny ninye olpurkel aitaa nchorroi oo nkariak, neibelekeny enkop natoyio oo lbaat aitaa nchorroi oo nkariak.

³⁶Neitamany ninye ine lelo oata esumash, neshetu ninche enkanasa nabikie.

³⁷Etuuno ninche nkurman, neun nkurman oo sabibu netum enkikesare sapuk.

³⁸Ore te mayianata enye nebul ninche oleng; nemeisho ninche nkishu enye eaku kuti.

³⁹Ore pee eaku kuti nedoyio esiana enye, te nkaraki enkibookinoto[13] e nkop, o enyamali o osina,

⁴⁰nebukoki ninye olmena lelo kituaak, neisho ninche metilimanata too nkoitoi misili;

⁴¹kake kedumu ninye aitasheyie olomena aitayu tiatua osina, neitaba ilmareita lenye anaa iluaat oo ntare.

⁴²Ore lelo supati nedol neshipayu; ore lelo torrok neidang.

⁴³Ore pooki ng'ae ng'en, nchoo ening'u kuna baa; nchoo iltung'ana edamu enyorrata o Laitoriani nauno.