Read MAASAI REVISED PROTESTANT Olkerempe le Nkai 115 Bible Online

Olkerempe le Nkai 115 - MAASAI REVISED PROTESTANT bible

Olkerempe le Nkai 115

¹Mme iyiook, Olaitoriani, mme iyiook, kake enkarna ino nchoo enkisisa, te nkaraki enyorrata ino nauno o sipat inono!

²Kainyoo pee ejo loshon, “Koree Enkai enye?”

³Etii Enkai ang keper, neas ninye anaa enayieu.

⁴Ore nkitanyaanyukot enye naa enkosholai o saabu, esiaai oo nkaik e tung'ana.

⁵Neeta nkutukie kake meiro; neeta nkonyek kake medolisho.

⁶Neeta nkiyaa kake mening'isho; neeta nkumeishin kake meing'uaisho.

⁷Neeta nkaik kake meirrapirrapisho, o nkejek, kake meyiolo aashom; nemeitayu oltoilo too lng'ejepa lenye.

⁸Ore lelo ooitobira nenyaanyukie ninche; naa neijia etiu lelo pooki ooisilig ninche.

⁹Iyie Israel, isiliga Olaitoriani! Ninye eretoto inyi naa ninye elong'o inyi.

¹⁰Na aji e Aron, tipika osiligi lino Olaitoriani! Ninye eretoto inyi naa ninye elong'o inyi.

¹¹Ntae kulo ooure Olaitoriani, esiliga Olaitoriani! Ninye eretoto inyi naa elong'o inyi.

¹²Etadamua Olaitoriani iyiook; kemayian ninye iyiook; kemayian ninye enkaji e Israel; kemayian ninye enkaji e Aron.

¹³Kemayian ninye lelo ooure Olaitoriani, ilooti o lkituaak.

¹⁴Metopona intae Olaitoriani, intae o nkera inyi!

¹⁵Metamayiana intae Olaitoriani, laa ninye oitobira keper o nkop!

¹⁶Ore keper naa eno Laitoriani, kake ore enkop neishoo ninye nkera e tung'ani.

¹⁷Meisis ilootuata Olaitoriani, nemeisis hoo obo le lelo oodoyio aapuo engira.

¹⁸Kake eikisis iyiook Olaitoriani ebaiki ena kata taata o ntarasi. Meisisi Olaitoriani!