Read MAASAI REVISED PROTESTANT Olkerempe le Nkai 118 Bible Online

Olkerempe le Nkai 118 - MAASAI REVISED PROTESTANT bible

Olkerempe le Nkai 118

¹Enchoo Olaitoriani enashe, amu aisupat ninye; nebikoo enyorrata enye nauno ntarasi!

²Nchoo Israel ejo, “Kebikoo enyorrata enye nauno ntarasi.”

³Nchoo enkaji e Aron ejo, “Kebikoo enyorrata enye nauno ntarasi.”

⁴Nchoo lelo ooure Olaitoriani ejo, “Kebikoo enyorrata enye nauno ntarasi.”

⁵Tiatua osina lai nanu aipoto Olaitoriani; naawaliki nanu Olaitoriani naalaku nanu.

⁶Ore etii Olaitoriani enkalo ai maureisho nanu. Kaa nanu aaidim oltung'ani aitaasa?

⁷Etii Olaitoriani enkalo ai pee aaretu nanu, kaing'or nanu te nkisulata lelo laaiba nanu.

⁸Enaikash te nesaruni Olaitoriani alang te neisiligi iltung'ana.

⁹Enaikash te nesaruni Olaitoriani alang te neisiligi ilkituaak.

¹⁰Aatamana nanu iloreren pooki aamuat; ore te nkarna o Laitoriani namir nanu ninche!

¹¹Aatamana ninche nanu aamuat, naaimu too nchot pooki; ore te nkarna o Laitoriani namir nanu ninche!

¹²Aatamana ninche anaa lotorok, neyupuyup anaa enkima oo lkiku; ore te nkarna o Laitoriani namir nanu ninche!

¹³Aaturrumoyioki nanu oleng, eyieu arriaa, kake aatareto Olaitoriani.

¹⁴Olaitoriani engolon ai naa osinkolio lai; etaa ninye enjeunoto ai.

¹⁵Enining'o isinkolioitin sidain le nkisulata tiatua ilng'oborri le lelo sinyat: “Te nkaina enye e tatene eas Olaitoriani enking'asia,

¹⁶eilepieki enkaina e tatene o Laitoriani, te nkaina enye e tatene eas Olaitoriani inenking'asia!”

¹⁷Maye nanu, kake kalo aishu, naiken nkiasin o Laitoriani.

¹⁸Aaitamio nanu Olaitoriani oleng, kake eitu ninye aapalaa matua.

¹⁹Tabolokoki nanu nchomito oo sipat, pee atum nanu aima ninche nalo aisho Olaitoriani enashe.

²⁰Ena ninye kishomi o Laitoriani; ninye eimu ilo asipani.

²¹Kaaisho nanu iyie enashe amu kitawalikia nitaa iyie enjeunoto ai.

²² Ore ilo soit otanyaita ilashetak netaa ole ndukuya olmairroto.

²³Enkiaas o Laitoriani ena; enking'asia too nkonyek ang.

²⁴Enkolong ena naitobira Olaitoriani; matishipakinoto niking'ida te ninye.

²⁵Ntajeu iyiook, kitasayia iyie, Olaitoriani! Olaitoriani, kitasayia iyie, nchoo iyiook dupoto!

²⁶Emayiana ilo olotu te nkarna o Laitoriani! Kimayian iyie too mayianat naaing'uaa enkaji o Laitoriani.

²⁷Olaitoriani ninye Enkai, neishoo ninye iyiook ewang'an. Embung'a ilng'osil too lkererin ipuopuo, o entabaiki imowuarak o lperere lo lasar!

²⁸Ira iyie Enkai ai, kaaisho nanu iyie enashe; ira iyie Enkai ai, naa kaarrep nanu iyie.

²⁹Oi enchoo Olaitoriani enashe amu aisupat ninye; nebikoo enyorrata enye nauno intarasi.