Read MAASAI REVISED PROTESTANT Olkerempe le Nkai 119 Bible Online

Olkerempe le Nkai 119 - MAASAI REVISED PROTESTANT bible

Olkerempe le Nkai 119

¹Emayiana lelo lemeeta ileyiat too nkoitoi enye, lelo oopuo too nkitanapat o Laitoriani!

²Emayiana lelo ooibung shakenisho enye, lelo ooing'oru ninye too ltauja lenye pooki.

³Lelo lemeas entorroni, kake nkoitoi enyena epuoyie!

⁴Intanapishe iyie too nkitanapat inono pee eibung'i ninche aakurraki.

⁵Oi naaji te neitashe nkoitoi aainei te nkibung'ata oo nkitanapat inono!

⁶Nemaaitukurruni naa nanu, amu aipirakinye nkoitoi aainei nkitanapat inono.

⁷Kaaisis nanu iyie to ltau sidai te nayiolou nkiguanat inono naasipa.

⁸Kasuj nanu nkitanapat inono; mikinturraa nanu tukul!

⁹Kaji eiko olbarnoti pee eitaasidan inkoitoi enyena? Tenegolie ninye te risioroto o rorei lino.

¹⁰To ltau lai pooki nanu aaing'oru iyie; mikincho nanu matalamari aing'uaa nkitanapat inono!

¹¹Atushuma nanu ororei lino to ltau lai, pee maas ake eng'oki tialo iyie.

¹²Mikisisi iyie Olaitoriani; nteng'enaki nanu nkitanapat inono!

¹³Te nkutuk ainanu aibalunye nkiguanat pooki naaing'uaa enkutuk ino.

¹⁴Too nkoitoi e shakenisho ino nanu ashipa anaa te neshipakinoi karsisisho sapuk.

¹⁵Kaibirribir nanu nkiguanat inono, naipirakinye nkonyek aainei inkoitoi inono.

¹⁶Kashipakino nanu nkitanapat inono; maarikino nanu ororei lino.

¹⁷Ntaasa mbaa supati osinka lino, pee atum nanu ataa kaishu, nasuj ororei lino.

¹⁸Taboloki nkonyek aainei pee atum atoduaa mbaa e nking'asia naaing'uaa enkitanapata ino.

¹⁹Kara nanu olomoni te nkop, mikisudoriyie nanu nkitanapat inono.

²⁰Etalepori oltau lai te yieunoto oo nkiguanat inono nkatitin pooki.

²¹Iyie oisikong'a iloowuasa, lelo oodiaa, lelo oolimana aaing'uaa nkitanapat inono.

²²Iwuang'ie te nanu elap enye o lmena lenye, amu aibung'a nanu shakenisho ino.

²³Ore sii eirragita ilkituaak aarreshito nanu, nkiguanat inono ninche eibirribir osinka lino.

²⁴Shakenisho ino naaitiship nanu, ninche naaiguen nanu aautaa.

²⁵Eirruge oltau lai abaiki enkop; ntopiwuoki nanu te risioroto o rorei lino!

²⁶Te nairo nanu aimaki nkoitoi aainei, nikiwaliki iyie nanu; nteng'enaki nanu nkiteng'enat inono!

²⁷Nchooki nanu matayiolo asipu nkitanapat inono, naa kaibirribir nanu isiaaitin inono e nking'asia.

²⁸Etalepori oltau lai te nkaraki osina; ntagoloki nanu te risioroto o rorei lino!

²⁹Ntalamaki nanu nkoitoi e lejare; ore te mpiris ino nteng'enaki nanu nkitanapat inono!

³⁰Ategelua nanu enkoitoi oo sipat, atipika nanu nkiguanat inono dukuya nanu.

³¹Aigarakine nanu shakenisho ino, Olaitoriani; mikincho nanu maaitukurruni!

³²Kalo nanu aipirri te nkoitoi oo nkitanapat inono ti nikintalalaki nanu eyiolounoto ai!

³³Nteng'enaki nanu, Olaitoriani, enkoitoi oo nkitanapat inono; naa kaibung nanu o metabaiki enkiting'oto.

³⁴Nchooki nanu eyiolounoto, pee atum aibung'a enkitanapata ino, nasipu to ltau lai pooki.

³⁵Torikoyioki nanu te nkoitoi oo nkitanapat inono, amu ninye ashipakino.

³⁶Ntonyorra oltau lai shakenisho ino, nimintonyor dupoto.

³⁷Mbelekenya nkonyek aainei pee meing'or mbaa e pesho, nikincho nanu enkishui too nkoitoi inono.

³⁸Ntudupa to sinka lino enkisiligata ino, naa ninye ene lelo likiure iyie.

³⁹Mbelekenya ntung'uayioki ina sulare naure, amu eisupati nkitanapat inono.

⁴⁰Ng'ura ajo kanyok aibung inkitanapat inono; ore te supatisho ino nchooki nanu enkishui!

⁴¹Nchoo ina nyorrata ino nauno elotu enatii nanu, Olaitoriani, nchoo enjeunoto ino elotu te risioroto e nkisiligata ino;

⁴²pee atum taa ewalata te lelo laaikordod, amu ororei lino nanu aisilig.

⁴³Nimiwuang'ie ororei le sipata te nkutuk ai, amu ore osiligi lai netii atua nkiguanat inono.

⁴⁴Kaibung nanu nkitanapat inono anaake, ntarasi o ntarasi;

⁴⁵naa kalo nanu te lakunoto, amu aing'orua nanu nkitanapat inono.

⁴⁶Kalo sii airo shakenisho ino te dukuya ilaiguanak, nemaaitukurruni nanu;

⁴⁷amu too nkitanapat inono nanu atum enchipai, amu ninche nanu anyor.

⁴⁸Kayanyit nanu nkitanapat inono, amu ninche anyor, naa kaibirribir nanu nkitanapat inono.

⁴⁹Tadamu ororei lino to sinka lino, laa ninye nanu kinchoo maisiliga.

⁵⁰Ena ninye enkitagoloto ai te nkata o sina, nchere kaaisho nanu enkisiligata ino enkishui.

⁵¹Aasukenyita nanu oleng lelo lemeure Enkai, kake maibelekenya nanu aing'uaa enkitanapata ino.

⁵²Te nadamu nanu nkiguanat inono ebaiki apa moitie, naitagoluo nanu, Olaitoriani.

⁵³Aaibung'a nanu emion oleng te nkaraki lelo arruok, lelo ootanyaita nkitanapat inono.

⁵⁴Nkitanapat inono naataa isinkolioitin laainei tiatua ena kop nara omoni.

⁵⁵Kadamu nanu enkarna ino kewarie, Olaitoriani, naibung nkitanapat inono.

⁵⁶Aatadoikio nanu ena mayianata, nchere aibung'a nanu nkitanapat inono.

⁵⁷Olaitoriani ninye erubata ai; atonyorrayie nanu ajo kaibung nkitanapat inono.

⁵⁸Ore to ltau lai pooki atonyuaa nanu aing'oru omom ino; ng'urrieki nanu te risioroto e nkisiligata ino.

⁵⁹Tenadamu nanu inkoitoi inono, naibelekeny inkejek aainei aipirie enkoitoi ino;

⁶⁰naisarrisar nanu eitu aimutie aibung nkitanapat inono.

⁶¹Ore ninye te naarresh nkeenta e ilo torrono, maarikino nanu enkitanapata ino.

⁶²Ore te mpolos e nkewarie naainyototo nanu aisis iyie, te nkaraki inkitanapat inono naasipa.

⁶³Kara nanu ole ncholiek e lelo likiure iyie, ole lelo ooibung nkitanapat inono.

⁶⁴Ore enkop pooki, Olaitoriani, ebore enyorrata ino nauno; nteng'enaki nanu nkikoot inono!

⁶⁵Ntaasa iyie osinka lino isupati, Olaitoriani, te risioroto o rorei lino.

⁶⁶Nteng'enaki nanu enkiguana sidai o eng'eno, amu airuko nanu nkitanapat inono.

⁶⁷Ore apa eton eitu aaitamei natapong'ori nanu; kake aibung'a taata ororei lino.

⁶⁸Ira iyie supat nias isupati, nteng'enaki nanu nkoitoi inono.

⁶⁹Ore lelo lemeure Enkai naaiteenikitia ninche elejare, kake aibung'a nanu to ltau lai pooki nkitanapat inono;

⁷⁰meeta kulo tung'ana ening'unoto kake kashipakino nanu nkitanapat inono.

⁷¹Eisidai apa te naaitamioki nanu, pee atum atayiolo nkitanapat inono.

⁷²Ore enkitanapata naing'uaa enkutuk ino naa eisidai alang inkalifuni e saabu o enkosholai.

⁷³Inkaik inono naaitautuo nanu naaitobiru; nchooki nanu eyiolounoto pee atum aiteng'enuo too nkitanapat inono.

⁷⁴Ore lelo likiure iyie naadol nanu neng'idayu, te nkaraki naisiliga nanu ororei lino.

⁷⁵Kayiolo nanu, Olaitoriani, nchere nkiguanat inono naasipa, nayiolo nchere te sipata iyie kintamio nanu.

⁷⁶Nchoo enyorrata ino nauno etaanu pee aaitagol nanu, te risioroto e nkisiligata nisiligie osinka lino.

⁷⁷Nchoo olng'ur lino elotu enatii, pee atum nanu ataa kaishu, amu nkitanapat inono naaitiship nanu.

⁷⁸Nchoo meitukurruni lelo lemeure Enkai, amu aaiteenikitia ninche elejare; ore nanu, naa nkitanapat inono ninche aibirribir.

⁷⁹Nchoo lelo likiure iyie aaibelekenyakino nanu, pee etum aatayiolo shakenisho ino.

⁸⁰Metaa meeta oltau lai entioto too nkitanapat inono, pee maaitukurruni nanu.

⁸¹Etalepori oltau lai eyieu enjeunoto ino; ororei lino nanu aisiligita.

⁸²Eiliilaitie nkonyek aainei aanyita enkisiligata ino; naikilikuanu ajo, “Kanu kenya kintagol nanu?”

⁸³Atotiwuo nanu anaa olbene le naisho oo sabibu otii atua empuruo, kake eitu ake aarikino nkitanapat inono.

⁸⁴Ke nkata nabaa eng'iri eanyisho osinka lino? Kanu iyie inguanare lelo laaisilisil nanu?

⁸⁵Aatuturokito lelo lemeure Enkai ngumot, lelo tung'ana lemeibung nkitanapat inono.

⁸⁶Ore nkitanapat inono pooki naa kesipa, naaisilisil nanu iltung'ana te lejare; taretuoki nanu!

⁸⁷Enkiti wueji pee eitu aaishie nanu te nkop; kake eitu nanu aiturraa nkitanapat inono.

⁸⁸Ore teina nyorrata ino nauno telekuaki nanu pee atum aibung'a shakenisho e nkutuk ino.

⁸⁹Kebikoo ororei lino, Olaitoriani, ntarasi te keper.

⁹⁰Ore esupatisho ino nebaiki iishoritin pooki; iyie oitayio enkop nintasheyie ninye.

⁹¹Ore te nkitanapata ino neitashe ntokitin pooki o metabaiki ena olong; amu ore ntokitin pooki naa iyie eisiaai.

⁹²Te neme apa nkitanapat inono naaitiship nanu, anaata nanu aidaaiyie te nkitamioto ai.

⁹³Maarikino aekata nanu nkitanapat inono; amu te ninche nanu kinchoo iyie enkishui.

⁹⁴Kara nanu olino, ntajewuoki; amu aing'orua nanu nkiteng'enat inono.

⁹⁵Eirragita ilarruok pee aaidaikie nanu; kake atadamua nanu shakenisho ino.

⁹⁶Atoduaa nanu eng'orikinoto oo ntokitin pooki sidain, kake meeta inkitanapat inono eng'orikinoto.

⁹⁷Kebaa enyorrata nanyor nanu nkitanapat inono! Ninye nanu aibirribir endama pooki.

⁹⁸Enkiteng'enata ino naaiteng'en nanu matalang'a ilmang'ati laainei, amu etii te nebo nanu nkatitin pooki.

⁹⁹Kaata nanu eyiolounoto alang ilaiteng'enak laainei pooki, amu iutarot inono ninche nanu aibirribir.

¹⁰⁰Kaning'u nanu mbaa oleng alang oltung'ani moruo, amu aibung'ita nanu nkitanapat inono.

¹⁰¹Narishie nanu nkejek aainei pooki oitoi torrono, pee atum aibung'a ororei lino.

¹⁰²Maibelekenya nanu apaash nkitanapat inono, amu kinteng'ena iyie nanu.

¹⁰³Kemelok oleng irorei linono te naishamisham, kemelok aalang enaisho te nkutuk ai!

¹⁰⁴Ore too nkitanapat inono natum nanu eyiolounoto; ore te nkaraki ina, kaiba nanu pooki oitoi torrono.

¹⁰⁵Ore ororei lino naa oltaa loo nkejek aainei naa ewang'an te nkoitoi ai.

¹⁰⁶Ainosa nanu olmumai naitadedeyie pee atum atisipu inkitanapat inono naasipa.

¹⁰⁷Anoto nanu osina kitok; nchooki nanu enkishui, Olaitoriani, te risioroto o rorei lino!

¹⁰⁸Tang'amu nkishoorot aainei e nkisisa, Olaitoriani, nikinteng'en nanu inkitanapat inono.

¹⁰⁹Aibung'ita nanu enkishui ai te nkaina ai anaake, kake eitu nanu aarikino nkitanapat inono.

¹¹⁰Aatipikaka nanu oltorrono orreshet, kake mapaashari nanu alam inkitanapat inono.

¹¹¹Shakenisho ino ninye enjung'ore ai ntarasi; ee, ninche eng'ida o ltau lai.

¹¹²Aibelekenya nanu oltau lai aipirie nkitanapat inono, ntarasi o metabaiki enkiting'oto.

¹¹³Kaiba nanu iltung'ana ooing'ashing'ash, kake kanyor nanu inkitanapat inono.

¹¹⁴Ira iyie enkisudoroto ai o elong'o ai; ororei lino nanu aisiliga.

¹¹⁵Entalamaki nanu intae ilarruok, pee atum aibung'a nkitanapat e Nkai ai.

¹¹⁶Mbung'aki nanu te risioroto e nkisiligata ino, pee aton aishu, nimikincho nanu manoto enkurruna to siligi lai!

¹¹⁷Mbung'aki nanu ilepieki, pee atum ataseriana, natum atishilai nkitanapat inono nkolong'i pooki!

¹¹⁸Itanya iyie lelo oopaash nkitanapat inono; ee, ore enkeleekisho enye naa pesho.

¹¹⁹Ore ilarruok pooki le nkop niwuang'ie anaa isuut; ore te nkaraki ina kanyor nanu shakenisho ino.

¹²⁰Eikirikira osesen lai kiure iyie, naure nanu nkiguanat inono.

¹²¹Ataasa nanu embae nasipa naishiaakino; mikipalaki nanu ilaitorogonyak laainei.

¹²²Taa iyie olaitaishekinoni lo sinka lino te nkaraki isupati; mincho lelo lemeure Enkai aaibooki enkop.

¹²³Eiliilaitie nkonyek aainei aing'orita enjeunoto ino, naing'or enkitabaroto e nkisiligata ino supat.

¹²⁴Ntaasa osinka lino te risioroto e nyorrata ino nauno, nikinteng'en nanu inkitanapat inono.

¹²⁵Kara nanu osinka lino; nchooki nanu eyiolounoto, pee atum atayiolo shakenisho ino!

¹²⁶Etaa enkata naasisho Olaitoriani, amu etigilaki inkitanapat inono.

¹²⁷Kanyor nanu inkitanapat inono, aitalang saabu nasila.

¹²⁸Ore te nkaraki ina aiturubare nanu iroruat aainei nkiguanat inono pooki; aiba nanu pooki oitoi torrono.

¹²⁹Ene nking'asia shakenisho ino; ore te nkaraki ina neibung oltau lai ninche.

¹³⁰Ore embolokinoto o rorei lino neyau ewang'an, neitaarriyian ilo lemeeta eng'eno.

¹³¹Aipang'ipang nanu ang'aita enkutuk, amu aanyita inkitanapat inono.

¹³²Mbelekenyayu ing'uraki, niking'urrie nanu, anaa oshi ake enintaas lelo oonyor enkarna ino.

¹³³Ntirring'ie iroruat aainei te risioroto e nkisiligata ino, nimincho entorroni maaitoria nanu.

¹³⁴Talakuaki nanu too ltung'ana laaibooki enkop, pee atum aibung'a nkitanapat inono.

¹³⁵Nchoo meitawang'aki enkomom ino osinka lino, nikinteng'en nanu nkitanapat inono.

¹³⁶Eturukote nchorroi oo lkiyio too nkonyek aainei, te nkaraki nemeibung iltung'ana enkitanapata.

¹³⁷Ira iyie asipani, Olaitoriani, nesipa nkiguanat inono.

¹³⁸Itegelua iyie shakenisho ino too sipat o te supatisho pooki.

¹³⁹Aainosita nanu olom, te nkaraki nemeshilaa ilmang'ati laainei irorei linono.

¹⁴⁰Ore enkisiligata ino netetemaki oleng, nenyor osinka lino ninye.

¹⁴¹Kara nanu oti naatemenaki, kake maarikino nanu inkitanapat inono.

¹⁴²Ore esipata ino nesipa ntarasi, ore inkitanapat inono nesipa.

¹⁴³Eewuo enyamali o sina shumata nanu, kake inkitanapat inono naaitiship nanu.

¹⁴⁴Kesipa shakenisho ino ntarasi; nchooki nanu eyiolounoto pee aton aishu.

¹⁴⁵Aishirita nanu to ltau lai pooki; tawalikiaki nanu Olaitoriani! Kaibung nanu inkitanapat inono.

¹⁴⁶Aaishiraka nanu iyie; ntajewuoki nanu; pee atum atisipu shakenisho ino.

¹⁴⁷Adumunye nanu aishir enamanarie enkakenya, naishir te nkaraki eretoto; naisilig nanu irorei linono.

¹⁴⁸Maaiken nanu nkonyek enkewarie pooki, pee atum aibirribirra enkisiligata ino.

¹⁴⁹Toning'o oltoilo lai te nkaraki enyorrata ino nauno; Olaitoriani, ore te nkaraki isipat inono tagolie enkishui ai.

¹⁵⁰Etinyikutua lelo laaisilisil nanu too ntorrok; kelakuaniki ninche nkitanapat inono.

¹⁵¹Kake itaana iyie, Olaitoriani, nesipa nkitanapat inono pooki.

¹⁵²Atayiolo apa nanu moitie te shakenisho ino nchere intobira apa ninche ntarasi.

¹⁵³Ing'ura iyie osina lai, nikikordu nanu, amu maarikino nanu enkitanapata ino.

¹⁵⁴Taa iyie liking'or nikilaku nanu; nchooki nanu enkishui te risioroto e nkisiligata ino!

¹⁵⁵Elakuaniki enjeunoto ilarruok, amu meing'oru ninche inkiguanat inono.

¹⁵⁶Eikitok olng'ur lino, Olaitoriani; nchooki nanu enkishui te risioroto oo sipat inono.

¹⁵⁷Kumok ilaisilisilok laainei o lmang'ati laainei; kake malimana nanu apaash shakenisho ino.

¹⁵⁸Kaing'or nanu lelo lemeisiligayu te ngoro, amu meibung ninche inkitanapat inono.

¹⁵⁹Toduaa eneba enyorrata nanyor nanu inkiguanat inono Olaitoriani! Tagolie enkishui ai te risioroto e nyorrata ino nauno.

¹⁶⁰Ore esiana o rorei lino naa esipata, ore pooki ng'ae loo sipat oo inkiguanat inono nebikoo ntarasi.

¹⁶¹Kaaisilisil nanu ilkituaak metii emporeet, kake keitashe oltau lai eanyit irorei linono.

¹⁶²Kashipakino nanu ororei lino, anaa oltung'ani onoto imasaa kumok.

¹⁶³Kaiba nanu namen entorroni, kake kanyor inkitanapat inono.

¹⁶⁴Katitin naapishana nanu aaisis iyie te nkolong te nkaraki inkiguanat inono naasipa.

¹⁶⁵Keeta eseriani kitok lelo oonyor enkitanapata ino; meetae entoki narror ninye.

¹⁶⁶Aisiligita nanu enjeunoto ino, Olaitoriani, naas nanu inkitanapat inono.

¹⁶⁷Keibung oltau lai shakenisho ino; nanyor nanu shakenisho ino oleng.

¹⁶⁸Kaibung nanu inkiguanat inono o shakenisho ino, amu etii nkoitoi aainei pooki dukuya iyie.

¹⁶⁹Nchoo enkishirata ai elotu dukuya iyie, Olaitoriani; nchooki nanu ening'unoto te risioroto o rorei lino.

¹⁷⁰Nchoo enkomono ai elotu dukuya iyie; tokorduaki nanu te risioroto o rorei lino.

¹⁷¹Kelimu enkutuk ai enkisisa ino amu kinteng'en nanu inkiteng'enat inono.

¹⁷²Kerany olng'ejep lai irorei linono, amu ore inkitanapat inono pooki nesipa.

¹⁷³Nchoo enkaina ino etaanu pee aaret nanu, amu ategelua nanu nkiguanat inono.

¹⁷⁴Kaanyita nanu enjeunoto ino, Olaitoriani, naa nkitanapat inono naaitiship.

¹⁷⁵Nchooki nanu enkishui, pee aatum aisisa, naa nchoo nkiguanat inono aaret nanu.

¹⁷⁶Ashomo nanu apong'ori anaa enker naimina; ing'oru osinka lino, amu maarikino nanu inkitanapat inono.