Read MAASAI REVISED PROTESTANT Olkerempe le Nkai 132 Bible Online

Olkerempe le Nkai 132 - MAASAI REVISED PROTESTANT bible

Olkerempe le Nkai 132

¹Osinkolio le nkilepata. Tadamu, Olaitoriani, te nkaraki Daudi, ilo sina pooki apa onoto ninye;

²einosa ninye olmumai to Laitoriani, nenya ninye olmumai te ilo magilani le Yakobo,

³“Majing nanu atua enkaji ai nemajing endapash ai;

⁴maaiken nanu nkonyek aainei airura nemaimug aimul inkonyek aainei,

⁵o metaba anaa naing'uraki Olaitoriani ewueji, ewueji nebikie ina Ai magilani e Yakobo.”

⁶Kitoning'o iyiook aajo etii Osanduku lo sotua Efrata, nikitum iyiook too nkong'at e Yaar.

⁷“Maape iyiook emanyisho o Laitoriani; mateserem iyiook ti abori nkejek enyena!”

⁸Tudumunye, Olaitoriani, shomo ewueji ino e nkiyeng'iyeng'ata, iyie o sanduku lino le nkidimata.

⁹Nchoo meishopokini ilapolosak linono esupatisho, naa nchoo isinyat linono metabuaku te ng'ida.

¹⁰Ore te nkaraki osinka lino Daudi mimbelekeny enkomom e ilo lino otubukokoki eilata aaput.

¹¹Einosa Olaitoriani tialo Daudi olmumai le dede, nemeitoki ninye aibelekenya te ilo mumai: “Ore obo loo layiok lo sesen lino naa kaitotonie nanu olorika lino le nkitoo.

¹²Te neibung ilayiok linono olning'o lai o shakenisho ai nalo nanu aiteng'en ninche, ore sii kepuo ilayiok lenye aatonie olorika lino le nkitoo ntarasi.”

¹³Amu etegelua Olaitoriani Sion; etonyorra ninye aitaa emanyisho enye:

¹⁴“Ewueji ai nayeng'iyeng'are ena ntarasi; ene nanu abikie amu atonyorra nanu ene.

¹⁵Naa kamayian nanu ndaiki enyena oleng; naitaraposh lelo aisinak lenyena too ndaiki.

¹⁶Ore ilapolosak lenyena naisho enjeunoto, ore isinyat lenyena naisho mbuakunot e ng'ida.

¹⁷Ore teine naisho nanu oinoti obo le Daudi meishuro; aitobira nanu oltaa te nkaraki ilo otubukokoki eilata aaput.

¹⁸Ore ilmang'ati lenyena naishopoki enkurruna, kake ore te dukuya enye neishopokini enkopiyia e nkitoo naikishiaan.”