Read MAASAI REVISED PROTESTANT Olkerempe le Nkai 147 Bible Online

Olkerempe le Nkai 147 - MAASAI REVISED PROTESTANT bible

Olkerempe le Nkai 147

¹Meisisi Olaitoriani! Amu eisidai te neranyakini enkisisa e Nkai ang; amu kaaipirisioni, naa keishiaakino osinkolio le nkisisa.

²Olaitoriani oshet Yerusalem; neiturrurru ilooidapashari apa le Israel.

³Neishiunye ilootigilate iltauja, neen ilbaa lenye.

⁴Neiken ninye neyiolou esiana oo lakir, neisho ninche pooki inkarn enye.

⁵Aikitok Olaitoriani lang naa kitok engolon enye; ore eng'eno enye nemeimakinoyu.

⁶Kedumu Olaitoriani oloitunyokoki enkop, nenang'ie olarruoni enkop.

⁷Entaranyaki Olaitoriani ninchosho enashe; entaranyaki Olaitoriani to lwulul loo usin kumok!

⁸Keimulumul ninye keper too nkatampo, neitobir ninye enchan pee eshaiki enkop, neitubulu ninye nkujit too ldoinyo.

⁹Ninye oisho ing'uesi e ntim indaiki enye, neisho nkiyioitin oo motonyi naaishir endaa.

¹⁰Ore enchipai enye neme engolon e mbarta, neme nkejek e tung'ani eng'idare;

¹¹kake lelo ooure ninye eshipakino Olaitoriani, lelo ooisilig enyorrata enye nauno.

¹²Isisa Olaitoriani, iyie Yerusalem! Isisa Enkai ino, iyie Sion!

¹³Amu ninye oitagol isenkenke oo nchomito inono; ninye omayian ilayiok linono ootii atua iyie.

¹⁴Ninye oitaserian ilpolosien linono; ninye oiputaki intae enkano sidai.

¹⁵Ninye oirriwaki enkop inkitanapat enyena; nelo ororei lenye asiooyo.

¹⁶Neishoru empaso naikununo anaa enturoto; neisalaashaki enkinuku enkop anaa nkuruon.

¹⁷Neyau ninye isoito le nchan anaa ilbelibelat, kalo oidim aitasheiki enkirobi enye?

¹⁸Ninye oirriu ororei lenye, neshol lelo soito; neisho osiwuo lenye metukutunye, neruko nkariak.

¹⁹Eibalakinye ninye Yakobo ororei lenye, eibalakinye inkiguanat o nkitanapat enyena Israel.

²⁰Eitu ninye eas ena te likae osho, meyiolo ninche nkitanapat enyena. Meisisi Olaitoriani!