Read MAASAI REVISED PROTESTANT Olkerempe le Nkai 22 Bible Online

Olkerempe le Nkai 22 - MAASAI REVISED PROTESTANT bible

Olkerempe le Nkai 22

¹Enetii olautaroni le ranyare: To ltoilo “Le nkoilii e nkakenya.” Osinkolio le Daudi. Enkai ai, Enkai ai, kainyoo pee kitung'uayie? Kainyoo pee kitalama nanu eitu kiret, nilam irorei laainei le nkigoroto?

²Iyie na Ai ai, aaishiraka nanu dama kake eitu iyie kiwaliki; naaishiraki kewarie, kake eitu nanu atum enkiyeng'iyeng.

³Kake ira iyie sinyati, niton iyie te nkitoo e nkisisa e Israel.

⁴Iyie apa eisiliga loo papa; kisiliga apa ninche, nitokordua iyie ninche.

⁵Iyie apa eishirakita ninche, neitajeuni; iyie apa eisiliga ninche, neitu eitukurruni.

⁶Kake kara nanu olkurto, mara oltung'ani; naaikordod iltung'ana, naamen iloreren.

⁷Ore pooki laaing'or nanu naakueniyie, naadasaki enkine, neipirripir ilukuny;

⁸nejo, “Eisiliga ninye Olaitoriani; nchoo eitajeu ninye, nchoo ekordu ninye, amu ninye eshipakino!”

⁹Ore ake sii, iyie apa likintayio te nguset e yieyio lai; kintaseriana iyie nanu atii ilki le yieyio.

¹⁰Shumata iyie apa aatanang'akaki ebaiki pee aaini, ore anaa naaiu yieyio lai ira iyie Enkai ai.

¹¹Mikilam iyie nanu, amu etataana enyamali nemeeta likae laaretu.

¹²Aatang'adutua nanu iloing'ok kumok, aatamana nanu iloing'ok oogol le Bashan;

¹³naang'aki nanu inkutukie enye, netiu anaa olng'atuny oikurrukur.

¹⁴Aaibukoyioki nanu anaa enkare, netirishate iloik laainei pooki too rubat; netotiwuo oltau lai anaa enkapoi, etoshole oltau lai tiatua olgoo lai;

¹⁵etoyio engolon ai anaa oleleo le moti, neterepa olng'ejep lai ntakul aainei; nikirragie iyie nanu te nterit e keeya.

¹⁶Ee, aamanita nanu ildiein; aatang'adua nanu olturrur loo laasak loo ntorrok, etaremo ninche ndapi oo nkaik aainei o nkejek -

¹⁷kaidim nanu aikena iloik laainei pooki - aaing'orita ninche naashil;

¹⁸eorikino ninche ilkilani laainei maate, ore to lkila lai neosh ninche enkukuo.

¹⁹Kake, ore iyie Olaitoriani, mikilakuaniki! Iyie laaretoni lai, tasieku taretoki!

²⁰Tokordu oltau lai to lalem, nikordu enkishui ai aitung'uaa engolon e ilo dia.

²¹Ntajewuoki nanu te nkutuk o lng'atuny, ntajeu ele tau lai oata osina too mowuarak o losokuan!

²²Kaibalunye nanu enkarna ino too lalashera laainei, naaisis iyie te mpolos e umata:

²³Esisa Olaitoriani intae ilooure ninye! Ore intae ilayiok pooki le Yakobo, entaa ninye kitok, nintasheshe te uriata enye, intae ilayiok pooki le Israel!

²⁴Amu eitu ninye emenu aashu eiteeng lelo ooata osina; neitu ninye eisudoo enkomom enye te ninye, kake etoning'o ninye ina kata pee eishiraki ninye te nkaraki eretoto.

²⁵Iyie eing'uaa enkisisa ai tiatua eumata kitok; naa kalak nanu olmumai lai te dukuya lelo ooure ninye.

²⁶Kedaa ilo oata osina neraposho, ore lelo ooing'oru ninye neisis Olaitoriani! Metaa keishu iltauja linyi ntarasi!

²⁷Kepuo aadamu ineeiting'ie enkop pooki, neibelekenyakino Olaitoriani; neserem ilmareita pooki loo loshon te dukuya ninye.

²⁸Amu eno Laitoriani enkitoria, neitore ninye iloshon.

²⁹Ee, ninye epuo aairrugokino lelo pooki oowuasa lena kop; te dukuya ninye epuo aairrugo lelo pooki oopuo enkop, o ilo lemeidim aitopiu oltau lenye.

³⁰Naa kelo eishoi enye aisiaai ninye, nepuo iltung'ana aaimaki Olaitoriani too ishoritin naapuonu,

³¹neibalunye enkordunoto enye too ltung'ana leton meino, nchere ninye otaasa ina.