Read MAASAI REVISED PROTESTANT Olkerempe le Nkai 34 Bible Online

Olkerempe le Nkai 34 - MAASAI REVISED PROTESTANT bible

Olkerempe le Nkai 34

¹Osinkolio le Daudi pee itaakuno kemoda te dukuya Abimelek pee etum ataarai meshomo. Kaisis nanu Olaitoriani nkatitin pooki; etii enkisisa enye enkutuk ai anaake.

²Olaitoriani ninye eng'idare oltau lai, nchoo ilo oata osina ening neng'ida.

³Embalunye enkitoo o Laitoriani te nebo nanu, nikirrep enkarna enye te nebo!

⁴Aing'orua nanu Olaitoriani naawaliki ninye, naakordu ninye nanu te nkuretisho ai pooki.

⁵Eng'ura ninye pee iwang'ung'u; nemeitoki ae kata enkurruna atii nkomomi inyi.

⁶Eishira ele tung'ani aisinani, nening Olaitoriani ninye, neitajeu Olaitoriani ninye aitung'uaa ingolikinot enyena pooki.

⁷Keman olmalaika lo Laitoriani aitushur lelo pooki ooure ninye, nekordu ninche.

⁸Wootu enchamishama pee idolidolo aajo eisupat Olaitoriani! Kemayiana ilo tung'ani osaru ninye!

⁹Entureita Olaitoriani intae isinyat lenyena, amu ore lelo ooure ninye nemeng'oriki toki!

¹⁰Keng'oriki inkiyioitin o lng'atuny netum esumash, kake ore lelo ooing'oru Olaitoriani nemelau ntokitin sidain.

¹¹Wootu, nakera, entoning'oki nanu, kaiteng'en nanu intae euriata o Laitoriani.

¹²Kalo tung'ani te ntae oyieu enkishui, neng'uar nkolong'i kumok pee etum atishipakinoyu isupati?

¹³Ntalama olng'ejep lino entorroni, nimincho enkutuk ino eiro elejare.

¹⁴Talama entorroni nias isupati, ing'oru eseriani, nisuj ninye.

¹⁵Eing'orita inkonyek o Laitoriani lelo supati, neinining'ito nkiyiaa enyena enkishirata enye.

¹⁶Keiba enkomom o Laitoriani lelo ooas intorrok, neiwuang'ie ninche meitokini aadamu te nkop.

¹⁷Te neishir oltung'ani supat te nkaraki eretoto, nening Olaitoriani, nekordu ninye aitayu tiatua enyamali enye pooki.

¹⁸Ketaaniki Olaitoriani lelo ootigilate ltauja, neitajeu ninye lelo ooisha osiligi.

¹⁹Eikumok isinaitin le ilo supat, kake kekordu Olaitoriani ninye aitung'uaa te pooki.

²⁰Negolie iloik lenyena pooki; meisho ninye metigilayu obo.

²¹Kear entorroni ilo arruoni; ore lelo ooiba osupat nedung'okini enkiguana.

²²Kekordu Olaitoriani enkishui oo sinkan lenyena, meetae obo le lelo oosaru ninye otum oldeket.