Read MAASAI REVISED PROTESTANT Olkerempe le Nkai 36 Bible Online

Olkerempe le Nkai 36 - MAASAI REVISED PROTESTANT bible

Olkerempe le Nkai 36

¹Enetii olautaroni le ranyare; Osinkolio le Daudi, osinka lo Laitoriani Ore enkarruoisho neiro tiatua ilo arruoni, te nguton o ltau lenye; metii euriata e Nkai dukuya nkonyek enyena.

²Amu kelej ninye kewan nchere meyiolouni entorroni enye neibayuni.

³Ore irorei le nkutuk enye naa ntorrok o lejare; meekure ninye easisho te ng'eno neas isupati.

⁴Ntorrok edamu ninye te ndapash enye; nepik ninye kewan enkoitoi neme sidai; nemeiturraa entorroni.

⁵Ore ina nyorrata ino nauno, Olaitoriani, nelo abaiki shumata, ore esupatisho ino nelo abaiki nkatampo.

⁶Etiu esupatisho ino anaa ildoinyo le Nkai, eikununo nkiguanat inono anaa enguton kitok; Olaitoriani, iyie oitajeu oltung'ani o eng'ues.

⁷Kebaa esidano e nyorrata ino nauno, iyie Enkai! Oloip loo naipuko inono esaru nkera e tung'ani.

⁸Nedaa ninche te nena naabore enkaji ino, nincho iyie ninche entoki naok te ilo keju lino le ng'ida.

⁹Amu iyie etii enkong'u e nkishui; te wang'an ino iyiook kidol ewang'an.

¹⁰Nchoo ebikoo ina nyorrata ino nauno te lelo likiyiolo iyie, nebikoo enjeunoto ino te lelo loo ltauja sidain!

¹¹Mincho lelo oowuasa maatarasaki, nimincho enkaina e ilo torrono aarrumoo nanu.

¹²Etabatatakinote lelo arruok enkop, etanang'ieki enkop nemeigil aadumunye.