Read MAASAI REVISED PROTESTANT Olkerempe le Nkai 50 Bible Online

Olkerempe le Nkai 50 - MAASAI REVISED PROTESTANT bible

Olkerempe le Nkai 50

¹Osinkolio le Asaf. Ilo magilani, Olaitoriani Enkai, ninye oiro neipotu enkop ebaiki enkilepunoto e nkolong o metabaiki endoyioroto.

²Ore te Sion, teine neiting'ie e nkishiaa, neitawang Enkai.

³Kelotu Enkai ang, nemegira ninye, ore te dukuya ninye naa enkima nanyaisho, ore oriong ine nemanita ninye naa osiwuo kitok.

⁴Neipot shumata e keper o abori kop, pee etum ninye aiguanare iltung'ana lenyena:

⁵“Enturrurrokoki nanu lelo ooisiligayu laainei; lelo ooitobira olning'o lo sotua o nanu to lasar!”

⁶Eibalunye shumata esupatisho enye, amu Enkai kewan nadung enkiguana.

⁷“Entoning lo tung'ana laainei, amu kairo nanu, iyie Israel, kaaishakenoki nanu iyie. Kara nanu enkai, Enkai ino.

⁸Eitu nanu aaisikong iyie te nkaraki ilasarri linono; ore lelo asarri linono oopejori netii anaake dukuya nanu.

⁹Mang'amaa olasar loo loing'ok oing'uaa enkaji ino, nemang'amaa olkine oing'uaa eluaata ino.

¹⁰Amu ore pooki ng'ues tiatua entim naa enaai, o nena kishu inkalifuni naatii ndoinyo.

¹¹Kayiolo nanu imotonyi pooki o loing'ang'e, ore pooki toki nalo ti oriong enkop naa enaai.

¹²“Tenaa naaji esumash aata, nemaaliki iyie; amu enaai enkop o pooki toki natii.

¹³Kanya nanu inkiri oo loing'ok, anaa aok osarge loo nkineji?

¹⁴Nchoo iyie Enkai olasar le nashe, nilaaki ninye nkishoorot inono ilo otii Shumata Aisul;

¹⁵nikimpot nanu te nkata e nyamali; kaakordu nanu iyie, nikiisis iyie nanu.”

¹⁶Kake ore te ilo arruoni, ejo Enkai: “Kaa sipata iyie iata nilimunye nkitanapat aainei, anaa iya olning'o lai lo sotua te nkutuk ino?

¹⁷Amu mba iyie eutaroto, ninang'aa irorei laainei aidie kewan.

¹⁸Te nidol iyie olapurroni, niaku olchore lenye, nira o le ncholiek oo loo loloito.

¹⁹“Nipalaa enkutuk ino too nkirorot torrok, neitobiru olng'ejep lino elejare.

²⁰Iton iyie airo entorroni tialo olalashe lino, ninteeniki enkerai ning'arie kina.

²¹Kuna baa oshi iasita natigirakine nanu; itejo apa iyie kara obo otiu anaa iyie, kake kaaisikong taata nanu iyie, naibalunye mbaa te dukuya iyie.

²²“Entisipu naa ena, intae ilemedamu Enkai, pee mayooki ake apolos intae, nemetumi hoo obo oitajeu!

²³Ore ilo oyau olasar le nashe ninye laayanyit nanu; ore ilo oitorioo inkoitoi enyena, naa kaitodol nanu enjeunoto e Nkai!”