Read MAASAI REVISED PROTESTANT Olkerempe le Nkai 51 Bible Online

Olkerempe le Nkai 51 - MAASAI REVISED PROTESTANT bible

Olkerempe le Nkai 51

¹Enetii olautaroni le ranyare: osinkolio le Daudi pee elotu Oloiboni le Nkai oji Natan aduare eidipa Daudi ataboitare Batsheba. Ing'urrieki nanu iyie Enkai, te risioroto e nyorrata ino nauno; ore te risioroto o lng'ur lino kitok, tujutoi inkitarruorot aainei.

²Ntukuoki nanu tukul meishunye entorroni ai, nikintisiny too ng'ok aainei!

³Amu kayiolo nanu nkitarruorot aainei, netii ing'ok aainei anaake dukuya nanu.

⁴Tialo iyie ake ataasa nanu eng'oki, naas ina torrono too nkonyek inono, metaa ira iyie asipani te nkiguana ino, nimiaata entioto te nkiguana ino.

⁵Tiatua ntorrok nanu aatoiwuoki, naa tiatua ing'ok aatoiwuo yieyio.

⁶Esipata e atua oltau iyieu iyie; ore te nkaraki ina inteng'enaki nanu eng'eno nagut tiatua enkisudoroto o ltau lai.

⁷Ntisinyaki nanu te hisopo, pee asinyayu; ntukuoki, pee awang'u alang enturoto[6].

⁸Mputaki nanu eng'ida o enchipai, nchoo lelo oik apa litigila iyie meting'idata.

⁹Isudoi enkomom ino too ng'ok aainei, nijutoo ntorrok aainei pooki.

¹⁰Ntobiru tiatua nanu oltau sidai, iyie Enkai, nipik enkishui ng'ejuk sidai atua nanu.

¹¹Mikinturraa nanu aitung'uaa ine nitii, nimiwuang'ie ina kiyang'et ino Sinyati tiatua nanu.

¹²Torrinyokoki nanu eng'ida e njeunoto ino, nikimbung nanu to ltau le yieunoto ino.

¹³Pee atum aiteng'ena ilaitarruorrok inkoitoi inono, nikirrinyokino ilaing'okok aapuonu enitii.

¹⁴Iyie Enkai, tokorduaki nanu te nkibukoroto o sarge iyie Enkai e njeunoto ai, naa kerany olng'ejep lai te mbuakunoto e nkordunoto ino.

¹⁵Olaitoriani, tabolo iyie enkutuk ai pee eibalunye enkutuk ai enkisisa ino.

¹⁶Amu mishipakino iyie ilasarri; te naitayu ninye olasar opejori nimikintiship iyie.

¹⁷Ore olasar ong'amaroyu te Nkai naa oltau obor; ore oltau obor neitadou kewan, mimenaa iyie Olaitoriani.

¹⁸Ntaasa Sion esidai te supatisho ino; teshetu isunta e Yerusalem.

¹⁹Pee itum taa atishipakinoyu ilasarri oodede, o lasarri oopejori o lasarri oolulung'a oopejori; nitum taa aitayu ilasarri loo loing'ok, to lperere lino lo lasar.