Read MAASAI REVISED PROTESTANT Olkerempe le Nkai 52 Bible Online

Olkerempe le Nkai 52 - MAASAI REVISED PROTESTANT bible

Olkerempe le Nkai 52

¹Enetii olautaroni le ranyare: Osinkolio le nkarriyiano oiteng'enisho le Daudi pee elotu Doeg le Edom ajoki Saulo “Eewuo Daudi enkaji e Ahimelek.” Kainyoo iyie pee intokoos, lo tung'ani magilani, te nkaraki entorroni naitaasaki ilo tung'ani le Nkai?

²Ore endama pooki, intobirita iyie enkidaata. Eikununo olng'ejep lino anaa olmurunya opi, iyie olaitobirani le nkeleekisho.

³Inyor iyie entorroni aitalang esupatisho, o elejare alang esipata.

⁴Inyor iyie irorei oomutisho, iyie lo ng'ejep olejisho

⁵kake eikigiligil iyie Enkai ntarasi; nikimbung ninye iyie nikipolos tiatua olng'obor lino; nikidotu ninye iyie aitung'uaa enkop oo looishu.

⁶Ore lelo supati naa kedol, neureishoyu, nekueniyie ninche ninye, ejo,

⁷“Eng'ura oltung'ani lemeitaa Enkai esarunoto enye, laa enkumoi oo masaa enyena eisiliga, nelo ninye aing'oru enesaru tiatua imasaa enyena!”

⁸Kake aikununo nanu anaa oloirien onyori mbenek tiatua enkaji e Nkai. Aisiliga nanu ina nyorrata nauno e Nkai ntarasi o ntarasi.

⁹Kaaisho nanu iyie enashe ntarasi, amu itaasa iyie ena. Kaibalunye nanu enkarna ino amu eisidai, te dukuya lelo ooure Enkai.