Read MAASAI REVISED PROTESTANT Olkerempe le Nkai 55 Bible Online

Olkerempe le Nkai 55 - MAASAI REVISED PROTESTANT bible

Olkerempe le Nkai 55

¹Enetii olautaroni le ranyare: too nkai oo mpit. Osinkolio le nkarriyiano oiteng'enisho le Daudi. Toning'o te nkiok ino enkomono ai, na Ai; nimisudoo kewan te nkomono ai!

²Toning'oki nanu, nikiwaliki; aaidimua nanu engolikinoto ai, atalepunye nanu,

³te nkaraki ilo toilo lo lmang'atinta, te nkaraki ina kibookinoto enkop eilo torrono amu keyau ninche enyamali shumata nanu; ore te ngoro neitobir ninche mang'atisho tialo nanu.

⁴Etamio oltau lai tiatua nanu, neewuo olkirutoto le keeya shumata nanu.

⁵Eewuo olkirutoto o lokirikiri shumata nanu, naaibulayie nanu enkiputukuny.

⁶Najo nanu, “Oi naaji tenaa kaata inaipuko anaa enturkuluo, anaata aipirri enelakua ayeng'iyeng'a;

⁷ee, anaata alo enelakua, nalo nanu airrag ong'ata,

⁸anaata aipirri alo aing'oru olng'obor aing'ataa olemua o lkutati kitok.”

⁹Ndaikie iyie nkitobirat enye, Olaitoriani, nipik olmilo ilng'ejepa lenye amu adolita nanu olarrabal o enchankar tiatua enkanasa.

¹⁰Ore dama o kewarie, nemanaa ninche too sunta enyena; netii enkarruoisho o enyamali atua ninye.

¹¹Etii enkidaata empolos enye, nemepuku enkibookinoto e nkop o esunkuroisho te wueji enye nemirishoreki.

¹²Mme olmang'atinta laatusukenya nanu, amu anaata nanu airisha; mme ilo laaiba oitokoos tialo nanu - amu anaata nanu ashomo aisudori.

¹³Kake iyie, ele, larisiore, iyie ole ncholuek ai, ele shore lai latamoo.

¹⁴Eikiaata apa iyiook nkirorot naamurru te nebo; ore tiatua enkaji e Nkai nikipuo apa iyiook te nchula.

¹⁵Meeu keeya shumata ninche, metadoi ninche aapuo enemeneng'a eishu, meshomo ninche to lkirutoto aajing atua nkuraren enye.

¹⁶Kake kaipot nanu Olaitoriani; naa kaaitajeu nanu Olaitoriani.

¹⁷Ore teipa o tadekenya o te ndama nairo nanu enyamali ai naisinanuo, naa kening ninye oltoilo lai.

¹⁸Kekordu ninye oltau lai te seriani te ilo arrabal laatoluaakine, amu ilkumok laakeshare nanu.

¹⁹Kening Enkai, neitobor ninche, ilo apa ototonie olorika le nkitoo ebaiki moitie, te nkaraki nemeibung ninche nkitanapat, nemeure ninche Enkai.

²⁰Eitorioyie ilo le ncholuek ai enkaina enye agilunore ilchoreta lenyena, etigila ninye olning'o lenye.

²¹Kenana enkiroroto enye anaa eng'orno, kake keeta olarrabal to ltau lenye; nenana irorei lenyena anaa eilata, kake eikununo ninche anaa lalema ootushutuaki.

²²Nteleiki Olaitoriani olola lino, naa aikintagol ninye iyie; menyorraa aekata ninye meiwuang'ieki ilo asipani.

²³Kake, ore iyie, Enkai, inang'aa ninche aitadou meetu abori tiatua engumoto nagut. Ore lelo tung'ana lo sarge o esunkuroisho metaa mebikoo ninche eishu to lpisiai le nkishui enye kake kaaisilig nanu iyie.