Read MAASAI REVISED PROTESTANT Olkerempe le Nkai 74 Bible Online

Olkerempe le Nkai 74 - MAASAI REVISED PROTESTANT bible

Olkerempe le Nkai 74

¹Osinkolio le nkarriyiano le Asaf. Na Ai, kainyoo iyie pee inturraa iyiook ntarasi? Kainyoo pee epuru engoro ino too ntare e luaata ino?

²Tadamu olturrur lino apa litegelaka kewan moitie, ilo apa litokordua pee eaku enjung'ore ino! Tadamu oldoinyo le Sion apa litobikie.

³Ntorioki iroruat inono iwuejitin neeidaaitie; einyala olmang'atinta pooki toki te wueji ino sinyati!

⁴Eikurrukurro ilmang'ati linono te mpolos e ine wueji sinyati; neun ninche inankan enye pee eaku olmonekie lenye le nkisulata.

⁵Ore te njing'et e shumata nedung'udung ninche nkeenta too ntoluo.

⁶Ore nena keek naagueta negiligil too nyuntui.

⁷Nepejoo ninche ine wueji ino sinyati, nepik olduruk ine wueji ino sinyati o metabaiki enkop.

⁸Nejo ninche maate, “Eikimut iyiook ninche katukul;” etapejoitie ninche iwuejitin pooki e Nkai neetumoreki tiatua ena kop.

⁹Meekure iyiook kiaata ilmonek lang, meekure eetae oloiboni hoo obo, nemeetae hoo obo tiatua iyiook oyiolo ajo ke nkata nabaa.

¹⁰Ke nkata nabaa, Olaitoriani, eikoroj iyiook olmang'atinta? Kesukeny olmang'atinta enkarna ino ntarasi?

¹¹Kainyoo iyie pee inunuk enkaina ino, kainyoo iyie pee ipik enkaina ino olgoo?

¹²Ore eyia, Enkai Olaitoriani lai aiteru apake, neitobir ninye enjeunoto te mpolos e nkop.

¹³Iyie otooro enaiposha te nkidimata ino; itadanya iyie endukuya o lasurai tiatua nkariak.

¹⁴Itupurda iyie ilukuny e Lefiatan, nincho iyie ninye ing'uesi e ntim meitaa endaa.

¹⁵Iyie oipirua nkonyek oo nkariak o erat; iyie oitoyio nkonyek oo nkariak naaruko.

¹⁶Enino endama naa enino enkewarie; iyie oitobira ewang'an o enkolong.

¹⁷Iyie otipika ilpolosien pooki le nkop; iyie oitobira enkata e nkirowuaj o enkata e nkirobi.

¹⁸Tadamu ena, Olaitoriani, ng'ura olmang'atinta eikorojisho, ore iltung'ana oomoda nesukeny enkarna ino.

¹⁹Minchooyo oltau le ina turkuluo ino aisho ing'uesi e ntim; mincho kirikino enkishui e ilo tung'ani lino aisinani ntarasi.

²⁰Tishilai olning'o lino; amu ore iwuejitin neemisimis e nkop nebore imanyishoritin e nkarruoisho.

²¹Mincho ilo oitorogonyaki meitukurruni, nchoo ilo aisinani omena meisisa enkarna ino.

²²Tudumunye, Na Ai, tomitu kewan; tadamu ena nikinkordod ilo omoda endama pooki!

²³Mincho kirikino oltoilo loo lmang'ati linono, ilo odoo loo nchankarri oilep anaake.