Read MAASAI REVISED PROTESTANT Olkerempe le Nkai 78 Bible Online

Olkerempe le Nkai 78 - MAASAI REVISED PROTESTANT bible

Olkerempe le Nkai 78

¹Osinkolio le nkarriyiano le Asaf. Entuun inkiyiaa lo tung'ana laainei te nkiteng'enare ai; entuun inkiyiaa inyi too rorei le nkutuk ai!

²Kabol nanu enkutuk ai te nkitanyaanyukoto, nalimu nkirorot musan e apa,

³ntokitin apa nikitoning'o nikiyiolou, nena apa naatolikitio iyiook loo papa.

⁴Mikisudorie iyiook inkera enye, kake eikiliki iishoritin naapuonu, nena kiasin kituaak o Laitoriani o enkidimata enye, o nena e nking'asia apa naataasa ninye.

⁵Eteshetua ninye shakenisho tiatua Yakobo, negelu enkitanapata tiatua Israel, ina apa naitanapa loo papa pee eiteng'en inkera enye;

⁶pee etum eishoi nasuju aaitayiolo ninche nena kera neton meino, nedumunye ninche aaliki inkera enye,

⁷pee etum ninche aatipik osiligi lenye Enkai, nemerikino isiaaitin e Nkai, kake pee eibung nkitanapat enyena;

⁸nemetiu sii anaa loo menye, ilo porror apa ogolong'u torrono, ilo porror apa lemeuno iltauja lenye, ore enkishui enye meisiligayu te Nkai.

⁹Ore lelo le Efraim ootanapate too nkai, neibelekenya te nkolong o larrabal.

¹⁰Eitu ninche eibung olning'o le Nkai, kake etanyaita epuo te risioroto e nkitanapata enye.

¹¹Nerikino ninche ina nataasa ninye, o ina apa e nking'asia naitoduaa ninye ninche.

¹²Ore apa too nkonyek oo loo menye neas ninye enenking'asia, tiatua enkop e Misiri, ti ong'ata e Sion.

¹³Etooro ninye enaiposha neisho ninche meima atua, neisho enkare meturupayu anaa olkiu.

¹⁴Ore dama nerikoo ninye ninche te nkatampoi, naa ore kewarie pooki nerikoo ninche te wang'an kitok.

¹⁵Neiper ninye ndapidapo to lpurkel, neisho ninche metooko enkare sapuk naba anaa eno lchorro.

¹⁶ Neisho ninye nchorroi oo nkariak metupuku te ndapidapoi, neisho enkare meturukoyu anaa olkeju.

¹⁷Ore ake eyia, netaasa ninche ing'ok oleng tialo Olaitoriani, negolong'aki apa ninche Ilo otii Shumata Aisul to lpurkel.

¹⁸Netem ninche Enkai too ltauja lenye, eikilikuanu endaa too ng'uarrat enye.

¹⁹Neiro ninche entorroni tialo Enkai, ejo, “Keidim Enkai aisalaashaki iyiook emisa tene tiong'ota.

²⁰Etoosho ninye endapidapoi nerukunye enkare, neruko ilkejek aadooyo. Keidim sii ninye aishoru imukateni, anaa eisho iltung'ana lenyena inkiri?”

²¹Ore te nkaraki etoning'o ake Olaitoriani ina neiput engoro; neyupuyupieki engoro metigilunore Yakobo, neitashe engoro enye te shumata Israel;

²²te nkaraki nemeeta ninche enkirukoto te Nkai, neitu eisilig ina golon enye naitajeusho.

²³Ore ake eyia eitanapa ninye nkatampo te shumata, nebol ildirishani le keper;

²⁴neitashaiki ninye ninche mana pee enya, neisho ninche enkurma e shumata.

²⁵Nenya iltung'ana endaa oo lmalaika, neirriwaki Enkai ninche endaa te nkumoi.

²⁶Eishoo ninye olkutati lo loosaen metukutu te keper, ore te ngolon enye nerikoo osiwuo le kopikop;

²⁷neshau inkiri te shumata ninche anaa enterit, motonyi naata naipuko naaba anaa osinyai loo naaiposha;

²⁸neisho ninye ninche metadoiki empolos oo lng'oborri lenye, te manaroto pooki e manyisho enye.

²⁹Nenya ninche neraposho oleng, amu eishoo ninye ninche ina natang'uarra.

³⁰Kake ore eton eitu eisho ninche ing'uarrat enye, eton etii ina daa nkutukie enye,

³¹nedumakino engoro o Laitoriani ninche, near ninye metuata lelo lenye oogol aaisul, neirragarie lelo gelunot le Israel.

³²Ore ake etii kuna pooki neton ake eas ninche ing'ok; ore hoo netii nena baa enyena e nking'asia eitu ninche eiruk.

³³Ore te nkaraki ina neishie ninye nkolong'i enye anaa enkiyang'et, neishie ilarin lenye te nkuretisho.

³⁴Ore ake pee ear ninye ninche metuata, neing'oru ninche ninye; neirridu ninche neing'oru Enkai oleng.

³⁵Nedamu ninche aajo Enkai endapidapoi enye Enkai natii shumata aisul olalakunoni lenye.

³⁶Kake eikordodaitie ninche ninye too nkutukie enye, nelej ninche ninye too lng'ejepa lenye.

³⁷Meuno iltauja lenye te ninye, medede ninche to lning'o lenye.

³⁸Kake ore eyia te nkaraki olng'ur lenye, etapalaka nkitarruorot enye, neitu ninye eidaikie ninche; neibooyo ninye engoro enye nkatitin pooki, neitu ninye eputu engoro enye pooki.

³⁹Nedamu ninye ajo iseseni ake ninche, enkijape naloito nemeigil arrinyunye.

⁴⁰Ae katitin aja apa etogolong'akita ninche ninye ti ong'ata, neitagor ninye to lpurkel!

⁴¹Etetema ninche ninye aaigiligil, neitagor ninche Ilo Sinyati le Israel.

⁴²Eitu ninche epik ndamunot enye engolon enye, neitu edamu ina olong apa naitajeuo ninye ninche too lmang'ati lenye;

⁴³ina kata apa pee eas ninye nkitoduaat enyena te Misiri, o mbaa enyena e nking'asia naataasa ti ong'ata e Sion.

⁴⁴Eibelekenya ninye ilkejek loo lmisisiri aitaa osarge, pee meitoki ninche aaok nena Shorroi enye.

⁴⁵Neirriwaki ninye ninche emus oo lojong'a ooinosa ninche, o ntuaan naa ninche naaidaikie ninche.

⁴⁶Eishoo ninye endaa enye meinosa olkurto, neisho ilng'anayio le siaai enye meinosa olmaati.

⁴⁷Neinyal ninye isabibu lenye te nchan oo soito, near iretet lenye te nkirobi.

⁴⁸Neisho nkishu enye metaara enchan oo soito, near inkerrai enye endarata.

⁴⁹Neitadoiki ninye ninche ina pijan e ngoro enye, o engoro o empushuna o sina, te nebo entukus oo lmalaika ooidaikie ninche.

⁵⁰Neitobir ninye enkoitoi te nkaraki engoro enye; eitu ninye emitiki ninche metuata, kake eishoo ninye enkishui enye olmeitai.

⁵¹Near ninye metuata lelo kikaunot pooki le Misiri, lelo ng'anayio lenye le dukuya tiatua olng'obor le Haam.

⁵²Neitoki arikoo iltung'ana lenyena anaa nkerra, nerikoo ninche ti ong'ata anaa eluaata oo ntare.

⁵³Nerikoo ninye ninche te seriani, pee meureishoyu; kake eimisie enaiposha ilmang'ati lenye.

⁵⁴Neriku ninye ninche atua ina kop sinyati, enetii ilo doinyo oisulie ninye te nkaina enye e tatene.

⁵⁵Nearaa ninye iloshon te dukuya ninche, neoriki ina kop enye iltung'ana lenyena neitamany iloshon le Israel ilng'oborri lenye.

⁵⁶Kake ore eyia, etetemishote ninche, negolong'aki ilo otii Shumata Aisul, neitu eshilaa shakenisho enye,

⁵⁷kake eibelekenyate ninche neas mbususi anaa apa loo menye; nemerregela ninche anaa enkawuo torrono.

⁵⁸Amu eitagoro ninche ninye te nena wuejitin enye neeika; nepik ninche ninye olom te nena kitanyaanyukot enye naaguetuno.

⁵⁹Ore ake pee ening Enkai ina, neiput ninye engoro, neany ninye tukul Israel.

⁶⁰Neing'uaa ninye emanyisho enye te Shilo, ilo ng'obor apa otii ninye tiatua iltung'ana,

⁶¹neya ninye engolon enye atua eyararoto, neya enkitoo enye atua enkop oo lmang'ati.

⁶²Neishooyo ninye iltung'ana lenyena metaari to lalem, nepik ninye engoro enye shumata ina jung'ore enye.

⁶³Nenya enkima ilbarnot lenye, ore ntoyie enye, nelau kiyama.

⁶⁴Ore lapolosak lenye nebatata too lalema, ore nena olia enye nemeishir.

⁶⁵Neitoki Olaitoriani adumunye anaa oltung'ani oirura, anaa oltung'ani ogol te nebuaku etemere.

⁶⁶Neosh ilmang'ati lenyena arriny siadi; nepik ninche enkurruna oo ntarasi.

⁶⁷Etanya ninye olng'obor le Yosef, eitu ninye egelu olosho le Efraim;

⁶⁸kake etegelua olosho le Yuda, o ilo doinyo le Sion otonyorra ninye.

⁶⁹Neshet ninye ina aji enye sinyati anaa keper, neitotiu anaa ewueji neitobiraki ntarasi.

⁷⁰Etegelua ninye Daudi osinka lenye, neya ninye aitung'uaa eluaata oo ntare;

⁷¹neitung'uaa ninye eramatata e lelo kuoo apa oonakita ooyakaki ninye, pee atum ataa olchekut le Yakobo lelo tung'ana lenyena, o Israel ina jung'ore enye.

⁷²Ore te mborron o ltau lenye neramat ninye ninche, nerikoo ninche te nkaina e nkarriyiano.