Read MAASAI REVISED PROTESTANT Olkerempe le Nkai 86 Bible Online

Olkerempe le Nkai 86 - MAASAI REVISED PROTESTANT bible

Olkerempe le Nkai 86

¹Enkomono e Daudi. Tuuno enkiok ino, iyie Olaitoriani, nikiwaliki nanu, amu kara nanu aisinani namena.

²Tagolie enkishui ai, amu kara nanu olaseremani le Nkai; ntajeu osinka lino likisilig iyie.

³Ira iyie Enkai ai; ing'urrieki nanu, Olaitoriani, amu iyie nanu aishiraki endama pooki.

⁴Ntishipa oltau lo sinka lino, amu iyie nanu, Olaitoriani, aserem.

⁵Amu iyie, iyie Olaitoriani osupat, nipalaki ing'ok, nibik te nyorrata nauno te lelo pooki likimpot iyie.

⁶Toning'o, Olaitoriani, enkomono ai; toning'o enkomono ai e sayiata.

⁷Ore te nkolong ai oo ngolikinot, aaipoto nanu iyie, amu eikiwaliki iyie nanu.

⁸Meetae likae likinyaanyukie iyie tiatua nkaitin, Olaitoriani, nemeetae kulie siaaitin naanyaanyukie ininono.

⁹Ore lelo oreren pooki lintobira iyie naa kepuonu, neirrugo te dukuya iyie, Olaitoriani, naa keisis ninche enkarna ino.

¹⁰Amu ira iyie kitok nias mbaa e nking'asia, iyie ake openy Enkai.

¹¹Nteng'enaki nanu enkoitoi ino, Olaitoriani, pee atum nanu ashomo te sipata ino; nchoo oltau lai meturia enkarna ino.

¹²Kaaisho nanu iyie enashe, Olaitoriani, Enkai ai, to ltau lai pooki, naa kaisis nanu enkarna ino ntarasi.

¹³Amu aikitok ina nyorrata ino nauno tialo nanu, itokordua iyie enkishui ai aitung'uaa enguton e nemeneng'a.

¹⁴Iyie Enkai, aatudumakinote nanu iltung'ana oowuasa aarare; eing'oru entukus oo ltung'ana arruok enkishui ai, nimikishilaa ninche iyie.

¹⁵Kake ore iyie Olaitoriani, ira Enkai o lng'ur niata osotua, nimisioki agoro, nibik te nyorrata nauno, nira oloisiligayu.

¹⁶Mbelekenyayu ng'uraki nanu, niking'urrie nanu; nchoo osinka lino engolon ino, nintajeu ina kerai e sinka ino.

¹⁷Ntoduaaki nanu olmonekie le omom ino, paa ore lelo laaiba nanu nedol nekurru, amu iyie, Olaitoriani, likitareto nanu nikintagol nanu.