Read MAASAI REVISED PROTESTANT Olkerempe le Nkai 89 Bible Online

Olkerempe le Nkai 89 - MAASAI REVISED PROTESTANT bible

Olkerempe le Nkai 89

¹Osinkolio le nkarriyiano le Etan le Esrait. Karany nanu osinkolio leina nyorrata ino nauno, Olaitoriani, ntarasi; ore te nkutuk ai, naa kalimu nanu esupatisho ino tiatua iishoritin pooki.

²Amu ore ina nyorrata ino nauno neitasheyieki ntarasi, ore esupatisho ino nemeigusugusieki, etiu anaa keper.

³Itejo iyie, “Aitobira nanu olning'o lai te nebo ilo lai gelunoti, ainosie nanu Daudi osinka lai olmumai:

⁴‘Kaitubul nanu eishoi ino ntarasi, nashetu olorika lino le nkitoo too ishoritin pooki.’ ”

⁵Nchoo keper meisisa mbaa inono e nking'asia, iyie Olaitoriani, o esupatisho ino tiatua eumata e lelo sinyat!

⁶Amu kaing'ae to loing'ang'e eidimi aaitanyaanyukie Olaitoriani? Kaing'ae tiatua lelo le keper onyaanyukie Olaitoriani.

⁷Iyie Enkai naurei tiatua enkiguana e lelo sinyat, kitok neitureisho, nelusoo ninye te lelo pooki oomanita ninye?

⁸Iyie Olaitoriani Enkai oo lororani, kalo olmagilani anaa iyie, Olaitoriani, nikimanita iyie esupatisho ino?

⁹Iyie oitore engolon e naiposha, naa te nedumunye ilopir lenyena, nintirring'ie ninche.

¹⁰Iyie otarrarra Rahab anaa empopok, iyie oidapasha ilmang'ati linono te nkaina ino.

¹¹Enino keper naa enino enkop; o pooki toki natii atua, iyie oitobirua ninche.

¹²Ore moikuape o kopikop iyie oitobirua ninche; ore Tabori o Harmon neisis enkarna ino te ng'ida.

¹³Iata iyie enkaina magilani; kegol enkaina ino, neado enkaina ino e tatene.

¹⁴Esupatisho o esipata ninche olkitamanyunoto lo lorika lino le nkitoo; nelo esupatisho o enyorrata nauno te dukuya iyie.

¹⁵Kemayiana lelo tung'ana ooyiolo embuakunoto o sinkolio lo sirua, lelo, Olaitoriani oopuo te wang'an e nkomom ino,

¹⁶lelo oong'ida te nkaraki enkarna ino endama pooki, neisis ninche esupatisho ino.

¹⁷Amu iyie enkisisa e ngolon enye; ore te nkaraki omom ino neishur iyiook emowuo.

¹⁸Amu ore elong'o ang naa eno Laitoriani, ore olaiguanani lang naa oleilo Sinyati le Israel.

¹⁹Ore tiapa, nirorie iyie te nduaata, ilo lino oisiligayu nijo, “Atipika nanu enkopiyia e nkitoo endukuya e obo magilani, aishoo nanu enkitoo ilo otegelutua iltung'ana.

²⁰Anoto nanu Daudi osinka lai; atubukoko nanu ninye eilata sinyati aput;

²¹pee etum enkaina ai ataa te nebo ninye, neitagol sii enkaina ai ninye.

²²Memir aekata ilmang'ati ninye, nemelo ilo torrono aitore ninye.

²³Karrar nanu ilmang'ati lenyena te dukuya ninye, naosh anang'ie enkop lelo ooiba ninye.

²⁴Ore esupatisho ai o enyorrata ai nauno naa keaku te nebo ninye, ore te nkarna ai neishur emowuo enye.

²⁵Kalo nanu apik enkaina enye enchumata e naiposha, napik enkaina enye e tatene shumata ilkejek.

²⁶Kaaishiraki ninye nanu, ejo, ‘Ira iyie Papa, Enkai ai o endapidapoi e njeunoto ai.’

²⁷Naa kaitaa nanu ninye olkikau lai, ole shumata too laiguanak le nkop.

²⁸Kaibung nanu tialo ninye ina nyorrata ai nauno ntarasi, ore olning'o lai nemeigusugus tialo ninye.

²⁹Kaitubul nanu eishoi enye ntarasi, nebikoo olorika lenye le nkitoo anaa inkolong'i e keper.

³⁰Te neany inkera enyena enkitanapata ai, nemepuo te risioroto oo nkikoot aainei,

³¹te nepaashare ninche nkikoot aainei, nemeibung inkitanapat aainei,

³²naa kaitame nanu nena kitarruorot enye te ng'udi; naitame entorroni enye te nkitamioto nairowua;

³³kake maiwuang'ie nanu te ninye ina nyorrata ai nauno, aashu ariat esupatisho ai.

³⁴Magil nanu olning'o lai lo sotua, anaa aibelekeny ilo rorei otupukuo te nkutuk ai.

³⁵Atimitunye nanu anya olmumai te sinyatisho ai; malej nanu Daudi.

³⁶Kebikoo eishoi enye ntarasi, nebikoo olorika lenye le nkitoo anaa enkolong te dukuya nanu.

³⁷Ketiu anaa olapa, keitasheyieki ntarasi; keitashe ninye auno anaa enabik oloing'ang'e.”

³⁸Kake ore taata inturrayie iyie, nimbayie; kimputa iyie engoro te nkaraki ilo lino litubukoko eilata aput.

³⁹Itanya iyie olning'o te nebo osinka lino, nimpurupuro iyie enkopiyia enye e nkitoo te nterit.

⁴⁰Ituuroyie iyie isunta enyena pooki; intomijoono iyie lelo sempewueti lenyena.

⁴¹Ore lelo pooki oogiroo nepur ninye, etaa ninye entoki nakueniyie ile latia enye.

⁴²Ntagolo iyie enkaina oo lmang'ati lenyena; ntishipa iyie ilmang'ati lenyena pooki.

⁴³Imbelekenya iyie empijan o lalem lenye, neitu incho ninye meitasho to larrabal.

⁴⁴Iwuang'ie iyie eng'udi e nkitoria te nkaina enye, ninang'aki olorika lenye le nkitoo enkop.

⁴⁵Ntodorropa iyie nkolong'i enyena e kitisho, nimulumula ninye te nkurruna.

⁴⁶Ke nkata nabaa, Olaitoriani, isudoo iyie kewan, ae ntarasi? Ke nkata nabaa eyupuyup engoro ino anaa enkima?

⁴⁷Tadamu Olaitoriani eneba entemata e nkishui, ae te nyoo iyie intobira nkera pooki e tung'ani!

⁴⁸Kalo tung'ani obik eishu nemedol aekata keeya? Kalo oidim atokordu oltau lenye aitung'uaa engolon e nemeneng'a?

⁴⁹Olaitoriani, koree enapa nyorrata ino nauno, enapa ninosie iyie olmumai o Daudi te nkaraki esupatisho ino?

⁵⁰Tadamu, Olaitoriani, ina nakueniyie osinka lino; anapita nanu to lgoo lai imorot e tung'ani,

⁵¹nena naamor ilmang'ati, linono Olaitoriani, nena naamorie iroruat e ilo lino otubukokoki eilata aaput.

⁵²Meisisi Olaitoriani ntarasi! Eesai, Eesai.