Read MAASAI REVISED PROTESTANT Olkerempe le Nkai 92 Bible Online

Olkerempe le Nkai 92 - MAASAI REVISED PROTESTANT bible

Olkerempe le Nkai 92

¹Olkerempe. Osinkolio le nkolong e nkiyeng'iyeng naji Sabato. Eisidai te neishori Olaitoriani enashe, pee eranyi enkisisa e nkarna ino, iyie Olotii shumata Aisul;

²pee eibalunyeki ina nyorrata ino nauno tadekenya, o esupatisho ino te nkewarie,

³to sinkolio le nkinanta o usin o enkawuo oo sinkolioitin o to lkerempe lo lwulul loo usin.

⁴Amu iyie, Olaitoriani, likintishipa nanu te siaai ino; ore too siaaitin oo nkaik inono narany nanu te ng'ida.

⁵Kebaa enkitoo oo siaaitin inono, Olaitoriani! Kegut oleng indamunot inono!

⁶Meyiolou oltung'ani omoda, mening'u olkiminchali kuna baa:

⁷nchere, ore hoo nebul ilarruok anaa olkujita, nedupoyu ilarruok pooki, enkidaata ninche epuo ntarasi,

⁸kake ore iyie, Olaitoriani, itii shumata ntarasi.

⁹Amu ng'ura ilmang'ati linono, Olaitoriani, ng'ura, keidak ilmang'ati linono, ore lelo arruok naa keisardakieki.

¹⁰Amu kintagoloo iyie anaa olosokuan; nikitubukoko nanu eilata ng'ejuk.

¹¹Etoduaa nkonyek aainei embatatata oo lmang'ati laainei, etoning'o nkiyiaa aainei entorroni e lelo mang'ati laainei.

¹²Kebul ilo supat anaa oltukai, nebulu anaa oltarakuai le Lebanon.

¹³Etuunoki ninche tiatua enkaji o Laitoriani, nebul ninche too lgorieti le Nkai ang.

¹⁴Neton ake eiu ninche ilng'anayio te moruao enye, nebulu ninche aalitu inenyori anaake,

¹⁵pee eitodolu nchere eisupat Olaitoriani; ninye endapidapoi ai, nemetii entorroni atua ninye.