Read MAASAI REVISED PROTESTANT Ndung'eta e Rashe 11 Bible Online

Ndung'eta e Rashe 11 - MAASAI REVISED PROTESTANT bible

Ndung'eta e Rashe 11

¹Ore entemet natii olejet naa olminong to Laitoriani, kake ore entemet nemetii olejet naa ninye eng'ida o Laitoriani.

²Ore pee elotu olwuasa, nelotu sii enkurruna; kake eboitare eng'eno lelo oobor.

³Ore enkitabaroto e lelo ooitashe too sipat naa kerikoo ninche. Kake ore enkarruoisho e lelo airrikinok neidaikie ninche.

⁴Meeta enkarsisisho dupoto teina olong e ngoro, kake elaku esipata aitung'uaa keeya.

⁵Ore esupatisho e lelo lemeeta entioto neitaa enkoitoi enye enaitoriori, kake ore oltorrono nebatat intorrok enyena.

⁶Ore esupatisho e lelo loo sipat naa kelaku ninche. Kake ore ilairrikinok naa keibung ing'uarrat enye.

⁷Ore te neye oltung'ani torrono, neish osiligi lenye, ore enkisiligata e lelo lemeyieu Enkai neaku ene pesho.

⁸Ore osupat naa kelakuni te nyamali enye, ore oltorrono netum ina nyamali.

⁹Emut oltung'ani lemeure Enkai te nkutuk enye ole latia lenye. Kake te ng'eno elakuni lelo supati.

¹⁰Ore teneitobirari mbaa too supati, neshipa enkanasa, ore pee eish iltorrok nening'i mbuakunot e nchipai.

¹¹Te mayianata oo supati eisisi nerrepi enkanasa, kake kemuti too nkutukie oo ltorrok.

¹²Ore ilo omenaa olelatia enye nemeeta endamunoto sidai, kake ore oltung'ani oata ening'unoto negira.

¹³Ore ilo oloolo ainosaa imbaa o lmarenke nebolu imbaa naaisudoro, kake ore ilo oisiligayu to ltau neshum embae aisudoo.

¹⁴Ore enemetii erikore, naa kebatata olorere; kake ore enetii ilaikook kumok netii eseriani.

¹⁵Ore ilo onyorraa te nkutuk ajo kelaaki olomoni esile, naa kelotu anyamalu te siadi, kake ore ilo oany enyorraa neserian.

¹⁶Ore enkitok nabor netum enkanyit; ore iltung'ana ooisimisho netum enkarsisisho.

¹⁷Ore oltung'ani supat neret kewan, kake ore oltung'ani otolo naa kewan eitame.

¹⁸Ore oltung'ani torrono netum olekoisiaayio lelejare, kake ore ilo oun esupatisho netum olerrinyore osipa.

¹⁹Ore ilo oitashe too sipat nebik eishu. Kake ore ilo osuj intorrok naa keye.

²⁰Ore iltung'ana ooata indamunot naapaashaa naa olminong to Laitoriani, kake ore lelo lemeeta entioto too nkoitoi enye naa enchipai te ninye.

²¹Tayiolo miata olng'ash ajo, melo oltung'ani torrono eitu eitamei, kake ore lelo supati naa kelakuni.

²²Ore anaa enaikununo olgisoi le saabu te nkume e mbitir, neijia etiu enkitok sidai nemeeta eng'eno naret.

²³Ore eyieunoto eilo supat neiting'oki esidano; ore enkisiligata oo ltorrok neiting'oki e ngoro.

²⁴Keishooyo oltung'ani obo pesho, ore ake eyia neitoki aponaa enkarsisisho; ore olikae neibok ina naishiaakino neishooyo, nenyamalu oleng te yieunoto sapuk.

²⁵Ore oltung'ani oleng naa keitaae ninye karsis, ore ilo opiku enkare, naa kepikakini sii ninye enkare.

²⁶Edek iltung'ana ilo omit entapa kake eeta emayianata ilo omir.

²⁷Ore ilo oing'oru isupati te nyuaata neing'oru omom, kake ejing'aki intorrok ilo olo aing'oru ntorrok.

²⁸Ore ilo oisilig enkarsisisho enye naa ketoyu, kake ore ilo supat naa keipilipil anaa embeneyioi nanyori.

²⁹Ore ilo oitanyamal enkaji enye naa kejung osiwuo, ore olmodai naa keaku osinka leilo ng'en.

³⁰Ore olng'anayioi leilo supat naa olchani le nkishui, ore enemetii euriata oo nkitanapat neiwuang'ie enkishui oo lkumok.

³¹Amaa taa tenelaakini ilo supat tena kop, kebaa elang elaakinoto eilo torrono o laing'okoni!