Read MAASAI REVISED PROTESTANT Ndung'eta e Rashe 12 Bible Online

Ndung'eta e Rashe 12 - MAASAI REVISED PROTESTANT bible

Ndung'eta e Rashe 12

¹Ore pooki ng'ae onyor enkitamioto e utaroto, naa kenyor eng'eno, kake ore ilo oiba enkisikong'ata naa olmodai.

²Ore oltung'ani supat netum omom to Laitoriani, kake ore oltung'ani oipiru intorrok naa kedung'okini enkiguana.

³Meitasheyie oltung'ani intorrok, kake ore intona eilo supat nemeigutieki aekata.

⁴Ore enkitok supat naa enkopiyia enkitoo to lpayian lenye; kake ore ina nayau enkurruna netiu anaa eng'uan too loik lenyena.

⁵Ore indamunot oo supati naa esipata, ore inkikoot oo ltorrok naa enkirrikino.

⁶Ore irorei leilo torrono neirrag aanyu osarge, kake ore enkutuk eilo supat nelaku iltung'ana.

⁷Ore iltorrok naa kenang'ari nemeitokini aata, kake ore enkaji o supat naa keitashe.

⁸Keisisi oltung'ani anaa enatiu endamunoto enye sidai, kake ore ilo opaashaa endamunoto naa kemenuni.

⁹Keikash oltung'ani oitashe te mborron neasaki kewan esiaai, alang ilo orup kewan nemeeta endaa nanya.

¹⁰Ore oltung'ani supat negolie enkishui e nkiteng enye, kake ore olng'ur lo ltorrono naa entoloi.

¹¹Ore ilo otur enkop enye naa ketum endaa sapuk kake ore ilo osuj imbaa e pesho nemeeta endamunoto.

¹²Ore oltalet ogol loo ltorrok naa kelotu amuta, kake ore intona oo supati neitashe aauno.

¹³Ore oltung'ani torrono nejing orreshet too ntorrok e nkutuk enye, kake keilany ilo supat entorroni.

¹⁴Ore too lng'anayio loo rorei lenyena, neitaraposhi oltung'ani too supati, ore esiaai oo nkaik o ltung'ani nerrinyokino ninye.

¹⁵Ore enkoitoi o lmodai nelioo aa sidai too nkonyek enyena makewan, kake ore oltung'ani ng'en nening enkikoo.

¹⁶Ore engoro o lmodai neibala asioki, kake ore oltung'ani ng'en nemeshilaa emoroto.

¹⁷Ore ilo oiro esipata neishoru enduaata nasipa, kake ore olchakeni olejisho, nelimu elejare.

¹⁸Etii obo laa ore irorei ooitasieku netiu anaa enang'unoto o lalem. Kake ore olng'ejep lo lng'en neyau enkishiunoto.

¹⁹Ore enkutuk nairo isipat nebik intarasi, kake ore olng'ejep le lejare naa ole nkiti kata.

²⁰Etii elejare atua iltauja le lelo ooipiru intorrok, kake ore lelo ooun isupati neeta enchipai.

²¹Medoiki entorroni isupati kake ebore iltorrok enyamali.

²²Ore inkutukie naalejisho naa olminong to Laitoriani. Kake ore lelo oisiligayu naa ninche enchipai enye.

²³Ore oltung'ani ng'en, neisudoo eng'eno enye, kake ore ilmoda neibalie emodai enye.

²⁴Ore enkaina eilo onyok neyooki aitoreisho, ore oltashalai neitaa kewan orrindik.

²⁵Ore enkiroishi e yieunoto o ltau lo ltung'ani naa kepetaa ninye, kake ore ororei sidai neitiship ninye.

²⁶Ore oltung'ani supat, neibelekenya aing'uaa intorrok, kake ore inkoitoi oo ltorrok nerik ninche aitapong'oo.

²⁷Ore oltung'ani oshal nemeibung toki naing'oru, kake ore oltung'ani onyok aing'oru, ninye otum imasaa naagol enkinyiang'a.

²⁸Ore atua enkoitoi oo sipat ninye etii enkishui, kake ore enkoitoi enkiminata nelo keeya.