Read MAASAI REVISED PROTESTANT Ndung'eta e Rashe 13 Bible Online

Ndung'eta e Rashe 13 - MAASAI REVISED PROTESTANT bible

Ndung'eta e Rashe 13

¹Ore enkerai ng'en nening'u enkiteng'enare e menye kake ore elde asukenyani nemening'u enkisikong'ata.

²Etum oltung'ani supat mbaa supati too lng'anayio le nkutuk enye, kake ore iyieunot oo lairrikinok naa olarrabal.

³Ore ilo orrip enkutuk enye neitobikoo enkishui enye; ore ilo obol enkutuk enye oleng neidaaya.

⁴Ore oltau lo ltashalai naa keng'uarrisho, nemetum hoo pito, ore oltau leilo onyok naa keishori ninye te nkumoi.

⁵Ore oltung'ani loo sipat neiba elejare, kake ore oltorrono neas inenkurruna neas inesulare.

⁶Kerikoo esipata ilo laa ore enkoitoi enye naa esipata, kake ore eng'oki nenang'aa ilo torrono.

⁷Eitaakuno oltung'ani obo aikarsis, nemeeta hoo pito, ore likae neitaakuno olaisinani, neeta imasaa kumok.

⁸Ore elakunoto e nkishui o ltung'ani naa karsisisho enye, kake meeta olaisinani enakordunye kewan.

⁹Etiu isupati anaa oltaa owang oleng, netiu iltorrok anaa oltaa oiliilari.

¹⁰Ore to lwuasa neishankarra lelo lemening'isho, kake ore lelo ooibung enkikoo netum eng'eno nagut.

¹¹Ore imasaa naanotoki aasioki naa meponari, kake ore ilo osotu maakutiti naa keponari.

¹²Ore osiligi oimutieki neitamuoi oltau, kake ore eyieunoto naidipaki naa olchani le nkishui.

¹³Ore ilo omenaa ororei le nkikoo neyaki kewan enkidaata, kake ore ilo oyanyit enkitanapata naa ketum olerrinyore.

¹⁴Ore inkiteng'enat eilo ng'en naa enchorro e nkishui, naaidimie oltung'ani metapaasha irresheta le keeya.

¹⁵Ore endamunoto sidai netum omom, kake ore enkoitoi e lelo lemeeta enkirukoto naa enkidaaroto enye.

¹⁶Keas oltung'ani ng'en pooki bae naas te ng'eno, kake ore olmodai neitoduaaya emodai enye.

¹⁷Ore olkilikuai torrono nesulaki iltung'ana kumok enyamali, kake ore olkilikuai oisiligayu neyau enkishiunoto.

¹⁸Ejing'aki aisinanisho o esulare ilo lemeitaa toki iutarot, kake ore ilo oning'u inkisikong'at naa keanyituni.

¹⁹Ore eyieunoto naitabayioki naa kemelok to ltau; kake ore empaashata oo ntorrok naa olminong too lmoda.

²⁰Ore ilo oiriamariyie iltung'ana ng'eni, naa keaku ng'en, kake ore ole ncholiek oo lmoda naa ketum enkitamioto.

²¹Kesuj ilbuketa ilaing'okok, kake ketum lelo supati puaan.

²²Ore oltung'ani supat neing'ueki enjung'ore inkera oo nkera enyena, kake ore enkarsisisho o laing'okoni netushumakaki lelo supati.

²³Ore enkurma o laisinani natang'asaki aapal meturo, neiu endaa sapuk kake kewuaparieki metii esipata.

²⁴Ore ilo oirragie eng'udi naa keiba enkerai enye, kake ore ilo onyor ninye nenyok aitame arerioo ninye oleng.

²⁵Keeta ilo supat enaitaraposh ninye, kake ore enkoshoke o ltorrono neisumash.