Read MAASAI REVISED PROTESTANT Ndung'eta e Rashe 14 Bible Online

Ndung'eta e Rashe 14 - MAASAI REVISED PROTESTANT bible

Ndung'eta e Rashe 14

¹Keshet eng'eno e nkitok ng'en enkaji enye, kake ore emodai near enkaji enye too nkaik enyena.

²Ore ilo olo too sipat naa keure Olaitoriani, ore ilo lemelo too sipat too nkoitoi enyena nemenaa ninye.

³Ore enkiroroto o lmodai naa eng'udi te nkoriong enye, kake ore inkutukie oo lng'eni naa kerrip ninche.

⁴Ore enemetii ilmong'i ooturishoreki nemetii sii entapa; kake elotu enkumoi oo ndaiki te ngolon o lkiteng.

⁵Ore olchakeni osipa nemelejisho, kake ore olchakeni lemesipa neitayu entooma e lejare.

⁶Keing'oru olomenisho eng'eno nagut te mpesho, kake kelelek eng'eno to ltung'ani oata ening'unoto.

⁷Tung'uai ine netii olmodai, amu ore teine minepu irorei le ng'eno.

⁸Ore eng'eno oltung'ani ng'en naa pee emusu enkoitoi enye, kake ore emodai oo lmoda naa elejare.

⁹Keisikong Enkai lelo torrok, ore lelo supati neshipakino omom e Nkai.

¹⁰Keyiolo oltau enduaran enye, meeta olomoni ong'arie enchipai enye.

¹¹Ore enkaji eilo torrono naa keidakieki kake ore olng'obor leilo supat naa kebul.

¹²Etii enkoitoi nalioo to ltung'ani aa sidai, kake ore enkiting'oto enye naa keeya.

¹³Ore ake sii te nkuenia neeta oltau osina, ore enkiting'oto e nchipai naa osina.

¹⁴Ore oltung'ani opaashari inkoitoi enyena, naa keiputakini ninye ilng'anayio loo nkoitoi enyena, ore oltung'ani supat naa keiputakini ninye ilng'anayio loo nkiasin enyena.

¹⁵Ore ilo omoda neiruk pooki toki, kake ore olng'en neing'or enkoitoi enye.

¹⁶Ore oltung'ani ng'en naa kerripo neibelekenya aing'uaa intorrok, kake ore olmodai nemerrip kewan eas intorrok.

¹⁷Ore oltung'ani oirowua elukunya neas inkumok te modai kake ore oloata eng'eno naa keng'iri.

¹⁸Ore olmodai netum ine modai, kake ore ilng'eni neishopokini eng'eno anaa enkopiyia e nkitoo.

¹⁹Eirrugokino oltorrono ilo supat, ore ilo torrono nesaisho too nchomito e lelo supati.

²⁰Ore oltung'ani aisinani naa keibae te latia enye, kake ore olkarsis neeta ilchoreta kumok.

²¹Ore ilo omenaa olelatia enye naa olaing'okoni, kake keshipa ilo oitanana oshoke too laisinak.

²²Aimepong'ori lelo ooun intorrok? Ore lelo ooun isupati netum enkanyit o enkisiligata.

²³Ore te pooki siaai netii dupoto kake ore too nkirorot e pesho neyau osina.

²⁴Ore enkopiyia e nkitoo oo lng'eni naa karsisisho enye, kake ore emodai naa enkishili oo lmoda.

²⁵Ore olchakeni osipa neitajeu enkishui oo lkumok, kake ore ilo oiro elejare naa olakaldaroni.

²⁶Tiatua euriata o Laitoriani etum oltung'ani osiligi oitashe, ore inkera enyena netum osempewuet.

²⁷Ore euriata o Laitoriani naa enchorro e nkishui pee etum oltung'ani atapaasha irreshata le keeya.

²⁸Atua esiamo oo ltung'ana etii enkitoo olaiguanani, kake te nemeetae iltung'ana neidaaya olkitok.

²⁹Ore ilo lemesioki agoro neeta eng'eno sapuk, kake ore ilo osioki agoro neitasapuk emodai.

³⁰Ore enchipai o ltau, neitaa osesen bioto, kake ore eng'uarrata neitong'u apurd iloik.

³¹Ore ilo oitorogony oltung'ani aisinani, naa ilo Oitobirua ninye etamoro, kake ore ilo supat te lelo oomena naa keanyit ilo oitobirua.

³²Kenang'ari oltorrono te nena baa enyena torrok, kake etum isupati osempewuet tiatua esupatisho enye.

³³Eton eng'eno nagut teina damunoto o ltung'ani oata ening'unoto, kake metumi eng'eno tiatua iltauja loo lmoda.

³⁴Esipata naisho olosho meisisi, kake ore eng'oki naa enkurruna te pooki orere.

³⁵Ore osinka oasisho te ng'eno netum omom to laiguanani, kake ore engoro enye nedoiki ilo oas inenkurruna.