Read MAASAI REVISED PROTESTANT Ndung'eta e Rashe 15 Bible Online

Ndung'eta e Rashe 15 - MAASAI REVISED PROTESTANT bible

Ndung'eta e Rashe 15

¹Ore ewalata e mborron nerriny engoro napi, kake ore ororei le nkisikong neinyeyie engoro.

²Ore olng'ejep lo lng'en neitubulaa eng'eno, kake ore inkutukie oo lmoda nebuku ine modai.

³Etii inkonyek o Laitoriani pooki wueji, eing'orita lelo torrok o lelo supati.

⁴Ore irorei le mborron naa olchani le nkishui, kake ore irorei le ntorroni negil oltau.

⁵Emenaa olmodai enkiteng'enata e menye, kake ore ilo oinining'u iutarot naa aing'en.

⁶Etii enkaji o lasipani olchumati kitok, kake edoiki enyamali tumoto e ilo torrono.

⁷Ore enkutuk o ltung'ani ng'en neitubulaa eng'eno, nemeneija etiu indamunot oo lmoda.

⁸Ore olasar leilo torrono naa olminong to Laitoriani, kake ore enkomono eilo oitashe too sipat naa enchipai enye.

⁹Ore enkoitoi eilo torrono naa olminong to Laitoriani, kake kenyor ninye ilo osuj aing'oru esupatisho.

¹⁰Etii enkitamioto name ilo otapalayie ina oitoi naishiaa e utaroto, ore ilo oiba iutarot naa keye.

¹¹Ore enemeneng'a o emutata neibala te dukuya Olaitoriani, kebaa eibala oleng iltauja loo ltung'ana!

¹²Meyieu olasukenyani neutari aaitorioo, melo enetii ilo ng'en.

¹³Ore oltau ong'ida, nepik enkomom enchipai, kake egil osina oltau.

¹⁴Ore oltau leilo oata endamunoto e ning'unoto neing'oru eng'eno, kake ore inkutukie oo lmoda neitoti ate too nemodai.

¹⁵Ore inkolong'i pooki e lelo ooisilisili naa torrok, kake ore oltau oshipa neeta osirua anaake.

¹⁶Eikash ina kiti etii euriata o Laitoriani alang olchumati kitok otii enyamali atua.

¹⁷Eikash endaa oo mbenek naanyori etii enyorrata atua, alang olkiteng opir otii enkiba atua.

¹⁸Ore oltung'ani oirowua elukunya naa keyau enchankar, kake ore ilo lemesioki agoro neitigir enchankar.

¹⁹Ore enkoitoi o lturuai[7] naa kebulaki ilkiku, kake ore enkoitoi eilo oitashe too sipat naa enkoitoi nalala naitoriori.

²⁰Ore enkerai ng'en neitiship menye kake ore oltung'ani omoda nemen ng'otonye.

²¹Ore emodai naa enchipai teilo lemeeta endamunoto, kake ore ilo oata ening'unoto nelo aitoriori.

²²Ore enemetii eutaroto nerruoyo nkitobirat naaji mataas; kake ore etii ilaikook kumok naa kedupayu.

²³Ore ewalata nairirikino naa enchipai to ltung'ani, kebaa esidano ororei te nkata naishiaakino!

²⁴Ore enkoitoi oltung'ani ng'en neilepie arik enkishui, pee etum atapaasha enemeneng'a tiabori.

²⁵Kepolol Olaitoriani auroo enkaji eilo owuasa, kake keitashayie lelo polosien le nkoliai.

²⁶Ore indamunot oo ltorrok naa olminong to Laitoriani, ore irorei leilo lemeeta entioto naa keitiship ninye.

²⁷Ore ilo oata olorok too masaa naatumi te nkoitoi torrono neyaki enyamali enkaji enye, kake ore ilo oiba eropare nebikoo.

²⁸Ore endamunoto o lasipani nejurru enejo te newal, kake ore enkutuk e ilo torrono nebuku intokitin torrok.

²⁹Elakuaniki Olaitoriani lelo torrok, kake ening ina omono oo supati.

³⁰Ore ewang'an oo nkonyek neitiship oltau, naa ore ilomon sidain neitagol iloik.

³¹Ore ilo oirrugu enkiok enye aning'u enkikoo, nebik te nebo ilang'eni.

³²Ore ilo oitaa parmetii enkikoo naa kewan emen, kake ore ilo oning'u enkikoo netum ening'unoto.

³³Ore euriata o Laitoriani naa enkiteng'enare tiatua eng'eno nagut, ore emborron nelo te dukuya enkanyit.