Read MAASAI REVISED PROTESTANT Ndung'eta e Rashe 16 Bible Online

Ndung'eta e Rashe 16 - MAASAI REVISED PROTESTANT bible

Ndung'eta e Rashe 16

¹Ore inkitobirat endamunoto naa ine tung'ani, kake ore ewalata o lng'ejep naa Olaitoriani eing'uaa.

²Ore inkoitoi pooki o ltung'ani naa sidain too nkonyek enyena, kake oltau eineneng Olaitoriani.

³Mbalie esiaai ino to Laitoriani, naa keitasheyieki inkitobirat inono.

⁴Eitobirua Olaitoriani pooki toki te nkipirta enye, neijia sii etiu ilarruok teina olong e nyamali.

⁵Ore pooki ng'ae oata olwuasa le nkitokoos naa olminong to Laitoriani, tayiolo miata olng'ash, esipa tayiolo, melo ninye eitu eitamei.

⁶Te nkanyit o te nkisiligata epalakini ing'ok, naa te uriata o Laitoriani epaash oltung'ani intorrok.

⁷Ore te neitiship inkoitoi o ltung'ani Olaitoriani, neitainye ilmang'ati lenyena ooboitare osotua.

⁸Enaikash imasaa kuti etii esupatisho alang imasaa kumok nemetii esipata.

⁹Eitobir indamunot o ltung'ani enkoitoi enye, kake Olaitoriani outaa iroruat enyena.

¹⁰Etii enkutuk olaiguanani iwalat naatipikaki engolon: nemeitadiak enkutuk enye te nkiguana.

¹¹Ore enkineneng'ata o entemet nadede naa ino Laitoriani, ore isoito ooineneng'ishoreki otii olbene naa esiaai enye.

¹²Olminong torrono too laiguanak te neas ing'ok, amu ore olorika le nkitoo neitasheyieki too sipat.

¹³Ore inkutukie naairo isipat naa ninche enchipai olaiguanani, nenyor olaiguanani ilo oiro ina nasipa.

¹⁴Ore engoro napi o laiguanani netiu anaa olkilikuai le keeya, kake ore oltung'ani ng'en naa keitiship ninye.

¹⁵Ore te newang enkomom o laiguanani neetae enkishui ore omom enye netiu anaa inkatampo naayau enchan o loirujuruj.

¹⁶Tinitum eng'eno, neikash alang saabu, tinitum ening'unoto naa keisul alang enkosholai.

¹⁷Ore enkoitoi nalala eilo oitashe too sipat nepaash entorroni; ore ilo orrip enkoitoi enye, negolie enkishui enye.

¹⁸Eng'asunye olwuasa nesuju enkidaaroto, naa neijia etiu oltau oisis kewan eng'asunye nesuju embatatata.

¹⁹Enaikash ti niata oltau obor te nebo ilaisinak alang tiniorioro iyarunot te nebo iloowuasa.

²⁰Ore ilo oning'u ororei naa kebulaa, neshipa oleng ilo oisilig Olaitoriani.

²¹Ore ilo ng'en to ltau naa keji oltung'ani odolu mbaa, naa ore ilomon ooitishipisho neponaa enkarriyiano.

²²Ore eng'eno naa enkong'u enchorro e nkishui teilo oata, kake ore emodai naa enkitamioto oo lmoda.

²³Ore endamunoto o lng'en neitaa ilomon lenyena ile nkiguana, neponaa enkarriyiano te nkutuk enye.

²⁴Ore irorei ooitishipisho netiu anaa olkenkei le naisho, emeloni tiatua oltau naa embiotisho tiatua osesen.

²⁵Etii enkoitoi nalioo to ltung'ani aa sidai, kake ore enkiting'oto enye naa enkoitoi e keeya.

²⁶Errumoki esumash olaisiaayiani metaasisho oleng, ore ina sumash enye nerrumoki ninye metaasisho.

²⁷Ore oltung'ani lemeeta tipat neitobiru enkarruoisho, ore ilomon lenyena netiu anaa enkima nadalisho.

²⁸Ore oltung'ani loo ntorrok neidapashaa olomang'ati, naa ore oltung'ani lo lmarenke neor ilchoreta ooning'o oleng.

²⁹Ore oltung'ani otolo neitapong'oo olelatia enye, nerikoki ninye enkoitoi neme sidai.

³⁰Ore ilo orojisho too nkonyek enyena nenyor ataasa nkitobirat naapaashaa, ekurraki enkutuk enye ayau imbaa torrok.

³¹Ore ilpapit ooibor te ndukuya naa enkopiyia e nkitoo, etumi ninche te nkishui naitoriori.

³²Ore ilo lemesioki agoro neikash alang ilo ogol, ore ilo oitore oltau lenye elang ilo oya enkanasa.

³³Eosh iltung'ana enkukuo aaing'oru enayieu, kake ore ewalata naa Olaitoriani oishoru pooki.