Read MAASAI REVISED PROTESTANT Ndung'eta e Rashe 17 Bible Online

Ndung'eta e Rashe 17 - MAASAI REVISED PROTESTANT bible

Ndung'eta e Rashe 17

¹Enaikash tininya enkiti mukate natoyio iata eseriani, alang ti niata emasho sapuk tiatua enkaji nabore enchankar.

²Ore osinka oas ineng'eno naa keitore olayioni inoti oas inenkurruna, naa ketum sii ninye ematua e njung'ore anaa obo le lelo alashera.

³Etemi enkosholai te moti, netemi saabu to lkokuet, kake iltauja etem Olaitoriani.

⁴Ore olaasani loo ntorrok nening nkirorot torrok; ore olalejani neinining olng'ejep arruoni.

⁵Ore pooki ng'ae osukeny ilo aisinani, naa olaitobirani lenye etusukenya; ore ilo oshipa te ngolikinoto nemelo eitu eitamei.

⁶Ore inkera oo nkera naa ninche enkopiyia enkitoo, ore enkisisa oo layiok naa loo menye.

⁷Ore ilomon sidain nemeishaakino olmodai, nemeiro ilomon le lejare olayioni lo laiguanani.

⁸Etiu eropet anaa osoit le ntasim too nkonyek eilo oropisho; ore pooki wueji neibelekenyakino nebul.

⁹Ore ilo opalaki enkitarruorroto neing'oru enyorrata, kake ore ilo oigil embae tiaekata, neorore olchore oning'ore.

¹⁰Ore enkisikong'ata nejing'aa oleng oltung'ani oata ening'unoto, alang ioshot iip naaoshi olmodai.

¹¹Ore oltung'ani torrono neing'oru ake ine nkarruoisho, keirriwakini ninye olkilikuai otolo metigilunore ninye.

¹²Enaikash tininang'are olng'arurumi otooruoki inkiyoitin enyena, alang tininang'are olmodai oreuta emodai enye.

¹³Tenerrinyu oltung'ani entorroni te sidai, nemeigut intorrok te nkaji enye.

¹⁴Ore enkiterunoto e nchankar netiu anaa oltung'ani oboloo emugur e nkare; metaa shomo tung'uai eton eitu ebau olarrabal.

¹⁵Ore ilo oirukoki lelo torrok e sipata, oilo oiguanare lelo supati, ore pokira naa olminong to Laitoriani.

¹⁶Kainyoo tipat pee eeta olmodai enkinyang'a te nkaina enye nainosie eng'eno nagut, nemeeta ninye endamunoto?

¹⁷Ore olchore nenyorrisho te pooki kata, ore olalashe netoiwuoki te nkaraki ingolikinot.

¹⁸Ore oltung'ani lemeeta endamunoto, neitayu enkisiligata, neaku ninye oitasheiki esile olelatia enye.

¹⁹Ore ilo onyor inkitadiat nenyor enchankar; ore ilo oilepie kutuk aji enye oleng, neing'oru enkidaaroto.

²⁰Ore oltung'ani lemeitoriori ndamunot nemebulaa, ore sii ilo oata olng'ejep opaashaa nebatatakino atua engolikinoto.

²¹Ore enkerai namoda naa osomit te menye; ore menye ilo modai nemeeta enchipai.

²²Ore oltau oshipa naa olmairo sidai, kake ore oltau otigile neitoi iloik.

²³Ore oltung'ani torrono nenyoraa eropet to lgoo lenye, pee etum aiminie inkoitoi e sipata.

²⁴Ore oltung'ani oata ening'unoto neitorioki enkomom enye eng'eno, kake ore inkonyek olmodai netii nkiting'ot enkop.

²⁵Ore enkerai namoda naa osomit te menye, naa emion nadua teina kitok natoiwuo ninye.

²⁶Imesidai tiniaraki oltung'ani supat metalaa entoki nemesipa, aitorrono te neitamei nkasisin.

²⁷Ore ilo oibooyo irorei lenyena neeta eng'eno, ore ilo oata oltau obor naa oltung'ani oata ening'unoto.

²⁸Ore doi ninye olmodai ogira meiro neji aing'en; ore pee eiken enkutuk enye nedoli ajo aing'en.