Read MAASAI REVISED PROTESTANT Ndung'eta e Rashe 18 Bible Online

Ndung'eta e Rashe 18 - MAASAI REVISED PROTESTANT bible

Ndung'eta e Rashe 18

¹Ore ilo okepari makewan naa iyieunot enyena eing'oru, pee etum atoorunye te pooki kiguana nasipa.

²Meshipakino olmodai embae naning'unoyu meteleku embae enye ake eibalie.

³Tenelotu entorroni nelotu sii enkurruna ore te nebo enkurruna netii sii esulare.

⁴Ore irorei le nkutuk o ltung'ani naa nkariak naagut; ore enkong'u e ng'eno naa enchorro naitokitoku enkare.

⁵Meishaakino tinijing enkoriong o ltung'ani arruoni, aashu imitiki oltung'ani supat esipata.

⁶Ore enkutuk o lmodai neyau enchankar, ore enkutuk enye neipotu ioshot.

⁷Ore enkutuk o lmodai naa enkidaaroto enye, ore enkutuk enye naa orreshet te ninye.

⁸Ore irorei le nking'oming'om netiu anaa embelati e mukate namelok, nejing'aa atua osesen lenye.

⁹Ore ilo oshal te siaai enye, naa olalashe le ilo oidaikie.

¹⁰Ore enkarna o Laitoriani naa oltalet ogol, ekuetiki oltung'ani supat neserianu.

¹¹Ore imasaa o lkarsis naa enkanasa enye nagol, netiu anaa esuntai naado namitu ninye.

¹²Eisis oltau lo ltung'ani kewan eton eitu ebau emutata, kake eng'asunye emborron nesuju enkanyit.

¹³Teneishooyo oltung'ani ewalata eton eitu ening'u, naa emodai enye o enkurruna.

¹⁴Eng'iri oltau lo ltung'ani emuoyian; paa amaa oltau otigile aing'ae oidim ating'iria?

¹⁵Ore endamunoto oltung'ani ng'en netum eng'eno, ore enkiok oltung'ani ng'en neing'oru eng'eno.

¹⁶Iyieu nitumore oltung'ani kitok? Iyaki ninye enkishooroto naa kelelek itum ninye.

¹⁷Ore ilo ong'as airo te dukuya nelioo aa kesipa enkiroroto enye o metaba anaa nelotu likae ajur ninye.

¹⁸Ore eoshoto e nkukuo neiting'ie enchankar nerishu autu ilo ogol ooishankarra.

¹⁹Ore olalashe otaretoki netiu anaa enkanasa nagol, kake ore enchankar, netiu anaa iasheta oo sekenke o sempewuet.

²⁰Eraposho oltung'ani too lng'anayio le nkutuk enye neitaraposhi too naing'uaa enkutuk enye.

²¹Etii keeya o enkishui atua engolon o lng'ejep, ore lelo oonyor ninye naa kenya ilng'anayio lenyena.

²²Ore ilo otum enkitok nenoto entoki sidai, nenoto omom to Laitoriani.

²³Ore te neiro oltung'ani aisinani, naa keomonisho to sayia, kake ore olkarsis newal te ngolon.

²⁴Etii ilchoreta oitaakuno ilchoreta, kake etii olchore likimbung'are anyikaki alang olalashe.