Read MAASAI REVISED PROTESTANT Ndung'eta e Rashe 20 Bible Online

Ndung'eta e Rashe 20 - MAASAI REVISED PROTESTANT bible

Ndung'eta e Rashe 20

¹Enkasukenyani enaisho oo sabibu naa embuaaroto enaisho napi, naa ore pooki ng'ae oitapong'oyie enaisho nemeng'en.

²Ore engoro naitureisho o laiguanani, netiu anaa enkikurrukur o lng'atuny. Ore ilo oitagor ninye neiturraa enkishui enye.

³Enkanyit teilo tung'ani oibooyo kewan aitalam enchankar; kake ore pooki modai nenyor enchankar.

⁴Metur oltashalai enkurma enye te nkata e nkirobi, keing'oru te nkata e nkikesare nemetum hoo pito.

⁵Ore enkiguana natii atua endamunoto o ltung'ani netiu anaa enkare nagut, kake ore ilo oata ening'unoto naa kebuku ninye aipang'unye.

⁶Kelimu pooki tung'ani aisis kewan aibalie esupatisho o enkisiligata enye, kake tetema sii iyie tujurro ilo tung'ani enaikununo!

⁷Emayiana nkera naata menye supat, naas nena naasipa.

⁸Ore ilo aiguanani oton to lorika le nkiguana, negel asilu ntorrok pooki te nedol too nkonyek.

⁹Aing'ae oidim atejo, “Aitukuo nanu oltau lai; kara nanu sinyati maata eng'oki?”

¹⁰Ore ntemeta e nkiroishi naapaashipaasha o ntemeta naapaasha nenyaanyuk pokira, olminong to Laitoriani.

¹¹Ore doi ninye enkerai neyiolouni too yasat enyena, tenaa ore ina naas naa sinyati nesipa.

¹²Ore enkiok naning'isho te nebo enkong'u nadololisho, Olaitoriani oitobirua pokira.

¹³Minyorru injo, aashu ijing atua osina; tabolo inkonyek inono naa itum endaa sapuk.

¹⁴“Aitorrono, aitorrono,” ejo ilo oinyang'isho, kake te nelo aing'uaa, neaku oloisis kewan.

¹⁵Etii saabu o soito kumok oogol enkinyang'a, kake ore enkutuk naata eng'eno naa osoit ogol enkinyang'a.

¹⁶Iwa enkila eilo tung'ani otonyorrayie aitasheiki esile olomoni, nimbung ninye tena nyorrata natonyorrayie aitasheiki esile oo lomon.

¹⁷Ore endaa nanotoki te lejare naa kemelok to ltung'ani, kake ore te siadi, neiput enkutuk enye osinyai.

¹⁸Ore nkitobirat pooki neitasheyieki te nkiguana; terikore natii eng'eno atua epuoi olarrabal.

¹⁹Ore ilo oloolo ainosaa olmarenke, neibalie imbaa naaisudoro, metaa mintaa encholiek ilo oiro te modai.

²⁰Ore ilo odek menye aashu ng'otonye, netiu enkishui enye anaa oltaa otaaraki.

²¹Ore enjung'ore nanotoki aasioki te nkiterunoto, neaku te siadi ene memayiana.

²²Mijo ake, “Ekaitalaku intorrok,” taanyu Olaitoriani naa aikiretu ninye.

²³Ore isoito ooineneng'ishoreki oopaashaa naa olminong to Laitoriani, ore intemeta e nkiroishi e lejare nemesidain.

²⁴Ore iroruat oltung'ani naa Olaitoriani oitore; kaji naa eiko oltung'ani te nening'u enkoitoi enye?

²⁵Orreshet to ltung'ani te nesioki ajo, “Aisinyati Olasar”, neitoki ake asipu eidipa ainosa olmumai lenye.

²⁶Ore olaiguanani ng'en nesilu iltorrok nereu enkeju e ngarri aitunyoo ninche.

²⁷Ore enkiyang'et o ltung'ani naa oltaa lo Laitoriani ojur oleng pooki toki e atua enye.

²⁸Olning'o o enkanyit naaisho olaiguanani metobikoi, ore enkitoria enye neitasheyieki te sipata.

²⁹Ore enkisisa oo lbarnot naa engolon enye, kake ore enkishiaa oo lpayiani kituaak naa ilpapit lenye ooibor.

³⁰Ore ioshot naadotisho naa keitukuoo intorrok, ore ioshot kumok e ng'udi neisuj nene wuejitin e atua.