Read MAASAI REVISED PROTESTANT Ndung'eta e Rashe 21 Bible Online

Ndung'eta e Rashe 21 - MAASAI REVISED PROTESTANT bible

Ndung'eta e Rashe 21

¹Ore oltau lo laiguanani naa enkaina o Laitoriani etii, keutaa ninye pooki wueji neyieu anaa ereyiet e nkare.

²Ore pooki oitoi to ltung'ani naa sidai too nkonyek enyena, kake Olaitoriani ninye oineneng oltau.

³Easata oo supati o esipata, ninye nang'amaroyu too nkonyek o Laitoriani alang enkitayunoto o lasar.

⁴Ore nkonyek o lwuasa tenebo oltau owuasa, o ltaa loo ltorrok naa ing'ok.

⁵Ore nkitobirat e ilo oata enyuaata osipa erikoki ninye puaan te nkumoi, kake ore pooki osioki neiting ake te yieunoto.

⁶Ore olchumati litum to lng'ejep olejisho, netiu anaa enkinuku nasiooyo aish naa orreshet le keeya.

⁷Ore enkinyala oo ltorrok naa keoroo ninche aishu, amu etanyaita eas ina nasipa.

⁸Ore enkoitoi eilo torrono naa kekordilo, kake ore olkuaak leilo supat naa aisidai.

⁹Enaikash tinimany olpijata le nchumata enkaji, alang tinitii enkaji e nkitok naata ororei.

¹⁰Ore oltau leilo torrono neyieu intorrok, metum olelatia enye olng'ur too nkonyek enyena.

¹¹Ore te neitamei olasurdaanyani, neng'enu olmodai ore te neutari oltung'ani ng'en, netum eng'eno.

¹²Ore isupati neing'or enkaji eilo torrono; enang'akini iltorrok enkidaaroto.

¹³Ore ilo oiken enkiok enye pee mening enkishirata e lelo aisinak, naa keishir sii ninye nemeetae oloning ninye.

¹⁴Ore enkishooroto naishoruni too nkisudorot naa keshuk engoro; ore eropare oo nkishoorot neitigir engoro sapuk.

¹⁵Ore teneasi esipata, naa enchipai too supati, naa enking'asia too laasak loo ntorrok.

¹⁶Ore oltung'ani olo aing'uaa enkoitoi e ning'unoto netum eneyeng'iyeng'are to lturrur loo lootuata.

¹⁷Ore ilo tung'ani onyor esikar naa keaku oltung'ani aisinani ore ilo onyor enaisho o ila nemeaku karsis.

¹⁸Ore ilo torrono naa elakunoto eilo supat, ore olemeisiligayu naa elakunoto oloitashe too sipat.

¹⁹Enaikash tiniton te nkop o lpurkel natoyio, alang tiniboitare enkitok naata enchankar o lkwenyi.

²⁰Ore imasaa naagol enkinyang'a naa kebik te nkaji eilo oata eng'eno, kake ore olmodai naa keijoo.

²¹Ore ilo osuj isipat o enanai e oshoke naa ketum enkishui o enkanyit.

²²Ore oltung'ani ng'en, neyiolo enaikunakino enkanasa o logol, negil isunta naaisilig ninche.

²³Ore ilo oiken enkutuk enye neibooyo olng'ejep lenye, neitapaash kewan enyamali.

²⁴Ore olasurdaanyani, ninye enkarna o ltung'ani owuasa neitokoos, ilo oas imbaa to lwuasa le nkitokoos enye.

²⁵Ore eyieunoto o ltashalai naa kear ninye, metua amu keany inkaik enyena eitayu esiaai.

²⁶Keng'uarrisho iltorrok endama pooki, kake ore isupati keishooyo nememit.

²⁷Ore olasar leilo torrono naa olminong, kebaa elusoo eitayio to ltau torrono?

²⁸Ore olchakeni lemesipa naa keimin, kake ore ororei le ilo oning'isho naa kebikoo.

²⁹Ore oltung'ani torrono neitodolu enkomom e mpijan, kake ore oltung'ani oitashe too sipat neing'or inkoitoi enyena.

³⁰Ore enemetii eng'eno nagut, nemetii ening'unoto nemetii enkikoo, keidim ayau eanyata Olaitoriani.

³¹Kerreteni embarta eitaanyuni ina olong e njore, kake ore enkisulata naa eno Laitoriani.