Read MAASAI REVISED PROTESTANT Ndung'eta e Rashe 23 Bible Online

Ndung'eta e Rashe 23 - MAASAI REVISED PROTESTANT bible

Ndung'eta e Rashe 23

¹Tenelo niton anya endaa te nebo oloitoreisho, ing'ura tisipu oleng ina natii dukuya iyie;

²naa tenaa ira oltung'ani oulu, nipik enkalem olgos lino.

³Ming'uar intokitin enyena naamelook, amu endaa ina nikipikieki olosek.

⁴Teng'ena miar kewan amutakino ing'oru enkarsisisho, teng'ena pee imbooyo.

⁵Ore pee ikurraki inkonyek inono enkarsisisho, neimin; amu ketum ninye asioki inaipuko, neilep anaa olkurragos olo te keper.

⁶Minya endaa o ltung'ani opiak, ming'uar indaiki enyena sidain.

⁷Amu ore ninye netiu anaa ilo limikiyeu to ltau, aikijoki ninye, “Inosa doi niok!” Kake metii oltau lenye te nebo iyie.

⁸Irrugumu nena belat pooki oo mukateni nindipa ainosa, neimin lelo rorei linono oomelook.

⁹Miro ake te wueji nening'ie olmodai amu kemenaa irorei le ng'eno o rorei linono.

¹⁰Mintayu ake ina toki musana natii olpolosie, aashu ijing nkurman e lelo lemeeta iloo menye;

¹¹amu ore olalakunoni lenye naa kegol; naa keikilikuanu ninye te iyie.

¹²Intorioki endamunoto ino enkiteng'enare, nipik enkiok ino irorei le ng'eno.

¹³Mimbooyo enkitamioto e rerioroto te nkerai; amu tinindong ninye te ng'udi nemeye.

¹⁴Tinindong ninye te ng'udi, naa intajeu enkishui enye te nemeneng'a.

¹⁵Enkerai ai, tenaa aing'en oltau lino, naa keshipa sii ninye oltau lai;

¹⁶naa te neiro enkutuk ino inaasipa, naa keshipa oltau lai.

¹⁷Mincho oltau lino eng'uar ilaing'okok kake shomo inkolong'i pooki tiatua euriata o Laitoriani.

¹⁸Esipa katukul etii imbaa sidain dukuya iyie, nemedung'ori osiligi lino katukul.

¹⁹Toning'o enkerai ai niaku ng'en, nintorioki endamunoto ino ina oitoi.

²⁰Miaku ole ncholiek oo laokok le naisho, aashu ole encholiek olooisepe te nkinosata oo nkiri.

²¹Amu ore olamerani o loisepe naa keaku aisinak, neaku ore elepori e merai neishopoki oltung'ani mpurdat.

²²Toning'o papaai lino ilo apa likitoiwuo, nimimenaa yieyio ino te neaku moruo.

²³Inyang'u esipata nimimir ake, inyang'u eng'eno nagut, e nkiteng'enare; o ening'unoto.

²⁴Ore menye ilo supat naa keshipa oleng; ore ilo otoiwuo olayioni ng'en naa keshipakino ninye.

²⁵Inchoo papaai lino o yieyioo ino eshipa, inchoo ina nikitoiwuo eshipa.

²⁶Enkerai ai nchooki nanu oltau lino, naa inchoo inkonyek inono eing'or inkoitoi aainei.

²⁷Amu ore enkitok naibor onyek naa engumoto nagut; ore ina tang'oroi naa enchorro napirik.

²⁸Neirrag ninye aanyisho anaa olaisimani, neponaa ilewa kumok aitaa ilemeisiligayu.

²⁹Aing'ae ilo oishir ajo wooi? Aing'ae ilo oata osomit? Aing'ae ilo oata olarrabal? Aing'ae ilo oing'unyug'uny? Kalo ilo oata ilbaa nemeeta eneyopakaki? Kalo ilo odo onyek?

³⁰Lelo le meirura eok enaisho, lelo oopuaya aatem enaisho naitushula.

³¹Ming'or enaisho te nyokieni, ina kata eitokitoku te nkikompe, nedoyio aitobirari too lgoso.

³²Ore te siadi nikiony anaa olasurai, niking'or anaa enturbubua.

³³Ore inkonyek inono nedol intokitin neitu aekata edol, ore indamunot inono neimaki intokitin naaitapong'oo.

³⁴Nitiu anaa oltung'ani oirragita te mpolos e naiposha, anaa ilo oirragita te nchumata e ng'ape e meli.

³⁵Ilo iyie ajo, “Aatoosho ninche nanu, kake eitu aning emion; aaidong'o nanu, neitu aning emion. Kanu doi ade ainyototo? Pee alo aing'oru ae aisho naok.”