Read MAASAI REVISED PROTESTANT Ndung'eta e Rashe 24 Bible Online

Ndung'eta e Rashe 24 - MAASAI REVISED PROTESTANT bible

Ndung'eta e Rashe 24

¹Ming'uar lelo tung'ana torrok, niming'uar aitaa ninche encholiek.

²Amu ore indamunot enye neipiru olarrabal neiro too nkutukie enye imbaa e nkarruoisho.

³Te ng'eno eshetuni enkaji naa te ning'unoto eitasheyieki.

⁴Te ng'eno eiputi ilgilat pooki, too ntokitin pooki sidain naagol enkinyang'a.

⁵Ore oltung'ani ng'en naa kegol alang oltung'ani ogol, naa neijia etiu ilo oata eng'eno kelang ilo oata eng'olon.

⁶Amu te rikoto e ng'eno indim aipiru enjore, naa tiatua enkumoi oo lautarok etumi enkishuroto.

⁷Ore eng'eno nagut naa kelakuaniki oleng olmodai, mebol ninye enkutuk enye te kishomi.

⁸Ore ilo oitobiru pee eas ine nkarruoisho, naa keipoti aajo oloitobir enkarruoisho.

⁹Ore enkipirunoto e modai naa eng'oki, naa ore ilo asukenyani naa olminong too ltung'ana.

¹⁰Ore tininterre te nkolong e nyamali, naa aikiti eng'olon ino.

¹¹Intajeu lelo ooyae meshomo keeya; imbooi lelo oorrorrokino keeya.

¹²Tinijo “Ng'ura, eitu duoo iyiook kiyiolou ena,” keitu emusu ilo oineneng oltau ina? Amaa ilo likirrip oltau aimeyiolo ninye? Naa aimelaaki ninye pooki tung'ani anaa enaikununo esiaai enye?

¹³Enkerai ai, inosa enaisho amu aisidai, ore ilkitong'at lo lkenkei naa kemelook tininchamisham;

¹⁴tayiolo naa ajo neijia etiu eng'eno nagut tiatua oltau lino; tinitum ninye naa itum eseriani too nkolong'i naapuonu, nemedung'ori osiligi lino katukul.

¹⁵Mirrag arreshisho anaa oltung'ani torrono aarare emanyisho oosupati; miarare enkang enye,

¹⁶amu kebatata oltung'ani supat kat naapishana, neitoki ake adumunye; kake kemut oltorrono eng'olikinoto.

¹⁷Mishipa te nebatata olmang'atinta lino, nimincho oltau lino eshipa te nebatata ninye;

¹⁸pee medol ake Olaitoriani nemeshipa, negoro, neiwuang'ie engoro aitung'uaa ninye.

¹⁹Mintanyamal kewan te nkaraki ilaasak loo ntorrok, niming'uar ilarruok.

²⁰Amu meeta oltung'ani torrono esidano oo nkolong'i naapuonu; amu keari oltaa loo ltorrok.

²¹Enkerai ai turia Olaitoriani o laiguanani, nimigolong'aki hoo obo lenye.

²²Amu kedumunye emutata te ninche asieku, naa aing'ae oyiolo emutata nalotu eing'uaa pokira?

²³Ore sii kuna naa nkirorot o lang'eni: ore olkep te nkiguana nemesidai.

²⁴Ore ilo ojoki oltung'ani torrono inchere, “Miata iyie entioto,” naa kedek iloreren ninye, neibayu iloshon ninye.

²⁵Kake ore ilo oisikong oltorrono naa ketum enchipai, naa kelotu emayianata sidai shumata ninye.

²⁶Ore ilo oishoru ewalata nasipa, neng'utut inkonito enkutuk.

²⁷Intobira esiaai ino tiauluo niyau pooki toki niyieu enkurma ore pee indip ina nitum taa atesheta enkaji.

²⁸Miaku olchakeni oarare olelatia ino miata eniporoki, nimilejisho te nkutuk ino.

²⁹Mijo taa ake, “Ekaitaas ninye ina naaitaasa nanu, Ekalaaki ilo tung'ani ina naaitaasa.”

³⁰Ashomo nanu agiroo olokeri lo ltashalai, embata enkurma oo sabibu oltung'ani lemeeta endamunoto.

³¹Naa ng'ura, etubulakita ninye ilkiku; ore enkop nebore endiati[8]; ore esuntai enye o soit neturori.

³²Ina pee aing'or nashilaa ayiolou; aing'ura nang'amu enkiteng'enare.

³³Kang'as airura penyo, kang'as aimug penyo. Kang'as anunuk inkaik penyo ayeng'iyeng'a.

³⁴Nikijing'aki osina iyie o esumash anaa olaisimani, nikijing'aki osina anaa oltung'ani otanape.