Read MAASAI REVISED PROTESTANT Ndung'eta e Rashe 28 Bible Online

Ndung'eta e Rashe 28 - MAASAI REVISED PROTESTANT bible

Ndung'eta e Rashe 28

¹Keilanyisho lelo torrok meeta oltung'ani omirita, kake ore isupati naa kepi ninche anaa olng'atuny.

²Ore teneas enkop intorrok, neeta ilaitoriak kumok, kake ore iltung'ana oata ening'unoto o eng'eno, naa keitasheyie ninche ninye te nkata naado.

³Ore oltung'ani aisinani oibooki enkop ilo aisinani, netiu anaa enchan naar endaa nemeleku.

⁴Ore lelo oomenaa inkitanapat neisis lelo torrok, kake ore lelo ooibung inkitanapat nearare ninche.

⁵Ore iltung'ana torrok nemening'u esipata, kake ore lelo ooing'oru Olaitoriani naa kening'u katukul.

⁶Enaikash oltung'ani aisinani olo te ng'eno enye, alang oltung'ani karsis laa torrok inkoitoi enyena.

⁷Ore ilo oibung ena kitanapata naa enkerai ng'en, kake ore ololo aisiritore oltung'ani olubo naa keitukurru menye.

⁸Teniaku karsis intalaku dupoto too ltung'ana, nelo karsisisho ino aaku, eno ltung'ani onana oshoke too laisinak.

⁹Tenelo neitoming'an oltung'ani enkiok enye pee mening ina kitanapata, neaku ore ninye enkomono enye naa olminong to Laitoriani.

¹⁰Ore ilo oitapong'oo ilo supat autaki atua enkoitoi torrono, naa kesulakino engumoto enye makewan, kake ore ilo lemeeta entioto naa ketum enjung'ore sidai.

¹¹Ore oltung'ani karsis naa aing'en too nkonyek enyena makewan, kake ore oltung'ani aisinani oata endamunoto naa kejur ninye oleng.

¹²Ore te nemirisho isupati, naa ketumi enkisisa sapuk, kake te neinyototo iltorrok, neisudoo iltung'ana ate.

¹³Ore ilo oisudoo ing'ok enyena nemebul, kake ore ilo oibalie neing'uaa ninche naa ketum olng'ur.

¹⁴Emayiana ilo tung'ani oure Olaitoriani anaake; kake ore ilo oitagol oltau lenye naa kebatatakino atua ingolikinot.

¹⁵Ore anaa enatiu enkikurrukur o lng'atuny, aashu olng'arurumi okuetu, neijia etiu oloitoreisho torrono too ltung'ana aisinak.

¹⁶Ore oloitoreisho lemeeta ening'unoto naa olaironyani ogogong; kake ore ilo oiba imasaa naapurruno naa keitoodor inkolong'i enyena.

¹⁷Teneitanyamal oltung'ani osarge le ilo tung'ani apa otara, inchoo ninye elimana o metua naa inchoo melo ake oltung'ani hoo obo aretu ninye.

¹⁸Ore ilo olo te sipata naa keitajeuni, kake ore ilo opong'ori too monko too nkoitoi enyena naa kesulakino eng'umoto.

¹⁹Ore ilo otur enkurma enye naa ketum endaa sapuk, kake ore ilo osuj imbaa nemeeta tipat naa ketum aisinanisho sapuk.

²⁰Ore oltung'ani oisiligayu naa ketum imayianat kumok. Kake ore ilo osioki aaku olkarsis nemelo eitu eitamei.

²¹Tinintodolu olkep neme sidai; kake keidim oltung'ani ataasa ntorrok te nkaraki enkiti daa.

²²Ore oltung'ani lo lorok neing'oru enkarsisisho nasieku, nemeyiolo ajo kelotu osina enetii ninye.

²³Ore ilo oisikong oltung'ani, ore te siadi naa keitoki atum omom, alang ilo opakas ninye too rorei lo lng'ejep lenye oopuyiapui.

²⁴Ore pooki ng'ae opur menye aashu ng'otonye nejo, “Imme enkitarruorroto ina katukul,” naa ole ncholiek e ilo tung'ani amutani.

²⁵Ore oltung'ani lo lorok neinyeyie olarrabal, kake ore ilo oisilig Olaitoriani naa keitaae karsis.

²⁶Ore ilo oisilig endamunoto enye naa olmodai, kake ore ilo olo te ng'eno nagut naa kekorduni.

²⁷Ore ilo oleng too laisinak, nemeng'oriki hoo toki ninye, kake ore ilo oisudoo inkonyek enyena netum ildeketa kumok.

²⁸Ore te nedumunye iltorrok, neisudoo iltung'ana ate, kake te neidaaya neponari iltung'ana supati.