Read MAASAI REVISED PROTESTANT Ndung'eta e Rashe 3 Bible Online

Ndung'eta e Rashe 3 - MAASAI REVISED PROTESTANT bible

Ndung'eta e Rashe 3

¹Enkerai ai, mincho kirikino inkiteng'enat aainei kake inchoo oltau lino eibung inkitanapat aainei.

²Amu keaku inkolong'i kumok o larin le nkishui ino, nikincho enkiputakinoto e enkishon.

³Mincho esujata oo sipat o enkirukoto kiorore; teeniki ninche emurt ino, tisira ninche tiatua oltau lino.

⁴Metaa itum omom o enkisisa sidai te dukuya Enkai o ltung'ana.

⁵Isiliga Olaitoriani to ltau lino pooki, nimipik osiligi le ng'eno ino metaa ninye nikirik.

⁶Ore too nkoitoi inono pooki imbalie ninye naa keitorioo ninye inkoitoi inono pooki.

⁷Mishilaa ake eg'eno ino makewan, turia Olaitoriani, nimbelekenya aing'uaa ntorrok.

⁸Keaku enkishiunoto to sesen lino, neaku olchani too loik linono.

⁹Iyanyita Olaitoriani too ntokitin inono, o too lng'anayio le dukuya le nkurma ino.

¹⁰Naa teina eiput ilkompen linono entapa, neiput imalasin inono enaisho oo sabibu nedooyo.

¹¹ Enkerai ai, mimenaa enkitamioto e utaroto nikiosh Olaitoriani; aashu inauru te rerioroto nikirere,

¹²amu kererioo Olaitoriani ilo onyor anaa olpayian orerioo enkerai enye nanyor.

¹³Emayiana oltung'ani otum eng'eno nagut, ilo tung'ani otum eyiolounoto.

¹⁴Amu ore dupoto enye nelang dupoto e nkosholai ore sii dupoto enye nelang saabu.

¹⁵Keeta ninye tipat alang isoito oogol enkinyang'a, nemeeta entoki ning'uar aitanyaanyukie ninye.

¹⁶Etii enkishui naado atua enkaina enye e tatene, ore atua enkaina enye e kedianye netii enkarsisisho o enkanyit.

¹⁷Ore inkoitoi enyena naa inaaitishipisho, ore nkoitoi enyena pooki naa eseriani.

¹⁸Ore ninye naa olchani le mpuaan te lelo ooibung ninye; ore lelo oibung aakurraki naa keji ilooshipa.

¹⁹Eitobira Olaitoriani enkop te ng'eno nagut, ore te yiolounoto eitasheyie keper o ntokitin naatii.

²⁰Te ng'eno enye eitayio ineegut, ore inkatampo neitadou enkoileelio.

²¹Enkerai ai, imbung'a eng'eno sidai o eyiolounoto; mincho ninche kisik aaing'uaa,

²²naa keaku enkishui to ltau lino, naa emasaai sidai e murt ino.

²³Neaku ilo te nkoitoi ino iserian, nemerrorro enkeju ino.

²⁴Tinilo niton, nimiata enkuretisho; tinirrag airura, naa kemelok injo inono.

²⁵Miure olkirutoto likiluam, aashu emutata oo larruok te nelotu.

²⁶Amu keaku Olaitoriani osiligi le nkitashoto ino, naa kerrip enkeju ino pee meibung'i.

²⁷Mimitiki isidain ilooishaakino ina kata aa iyie oata enkidimata pee ias.

²⁸Mijoki olelatia lino, “Shomo pee intoki ashukunye, ekaaisho metabaiki” — ti niata ina kata ina toki.

²⁹Mintobiraki ole latia ino entorroni ainyal, lelo ootoni kisilig te mbata ino.

³⁰Miarare oltung'ani metii esipata eitu kintaas iyie entorroni.

³¹Ming'uar oltung'ani onyor olarrabal, nimigelu hoo nabo oo nkoitoi enyena.

³²Amu ore oltung'ani arruoni naa olminong[1] to Laitoriani, kake ore lelo ooitashe too sipat netii atua enkisiligata enye.

³³Etii oldeket lo Laitoriani shumata enkaji oo larruok, kake kemayian ninye emanyisho oo supati.

³⁴Ore lelo oomenisho naa kemenaa ninye, kake ore ilo obor neisho omom.

³⁵Ore oltung'ani ng'en naa kejung enkanyit, kake ore ilmoda netum enkurruna.