Read MAASAI REVISED PROTESTANT Ndung'eta e Rashe 31 Bible Online

Ndung'eta e Rashe 31 - MAASAI REVISED PROTESTANT bible

Ndung'eta e Rashe 31

¹Irorei kulo le Lemuel olaiguanani le Masa, ooiteng'ena ng'otonye ninye:

²Ira iyie enkerai ai, enkerai e nguset ai, ewalet enkomono ai, ainyoo enkerai ai?

³Miishaki engolon ino o mali inono inkituaak, ninche naaidakie ilaiguanak.

⁴Mme enoo laiguanak, iyie Lemuel, eokoto enaisho, aashu too laitoriak pee eyieu enaisho napi.

⁵Eokisho ake nerikino ninche nkitanapat, nemeitoki aasuj esipata e lelo ooinyalaki.

⁶Ore enaisho napi naa ene lelo oogira aaye o lelo ooata emion sapuk tiatua iltauja lenye.

⁷Inchoo ninche metooko pee erikino osina lenye, nemeitoki aadamu osina lenye.

⁸Inchoo enkutuk ino eiro te rishata e lelo lemeyiolo aairoro, niro esipata e lelo pooki ootung'uayioki oopeny.

⁹Inchoo enkutuk ino eiguana anaa olarishani osipa, torripo isipat e lelo aisinak o lelo oomena.

¹⁰Aing'ae oidim anoto enkitok nadupa naishiaakino enkanyit? Amu eeta ninye tipat oleng alang isoito oogol enkinyang'a.

¹¹Keisilig oltau lo lpayian lenye ninye, nemelau aekata ninye dupoto.

¹²Keitaas ninye olpayian lenye isupati neme entorrono, too nkolong'i pooki e nkishui enye.

¹³Neing'oru ninye aitobiru inkilani too lpapit loo ntare tenebo o kitani neasisho too nkaik to ltau le nyorrata.

¹⁴Etiu ninye anaa melin o lamirani, eyau ninye endaa enye te nelakua.

¹⁵Einyototo ninye eton aa kewarie, neitobiraki enkaji enye pooki endaa nanya, neing'uraki inkaisiaayiak enyena esiaai naas.

¹⁶Eing'oru ninye enkurma neinyang'u; ore too lng'anayio loo nkaik enyena neun enkurma oo sabibu.

¹⁷Erreten ninye empolos enye te ngolon, neitagol inkaik enyena.

¹⁸Edol ajo ore pooki toki naitobiru amir neeta dupoto; nemeye oltaa lenye kewarie.

¹⁹Epik inkaik enyena ina toki naitobiru o lpiyayoi, neibung too nkaik enyena ina garri naripunyeki inkilani.

²⁰Eitorioki ilaisinak inkaik enyena, neitoti too nkaik enyena ilaisinak.

²¹Meure ninye enkata e nkirobi tenebau amu ore enkaji enye pooki, neeta nkilani naairowua.

²²Eitobiraki enkaji enye ilkarash le rruat; ore inkilani enyena naa ine kitani napuiyiapuy pilei.

²³Keyioloi olpayian lenye too nchomito neyioloi te neton tiatua lelo payiani le ina kop.

²⁴Eitobir ninye nkilani naapuyiapuy e kitani nemir ninche; eisho ilamirak inkeenta o mpolosi meinyang'u.

²⁵Ore inkilani enyena naa engolon o enkanyit, nekueni too nkolong'i naapuonu e dukuya.

²⁶Ebol ninye enkutuk enye te ng'eno, ore enkiteng'enata o esupatisho netii olng'ejep lenye.

²⁷Eing'or ninye aramat imbaa pooki o lmarei lenye, nemenya ninye endaa neitu eisiayu.

²⁸Einyototo inkera enyena neipot ninye aajo enamaiyiana; neijia sii ejo olpayian lenye, eisis ninye ejo:

²⁹“Etaasa inkituaak kumok imbaa sidain oleng: kake ore iyie ilang ninche pooki.”

³⁰Ore entilare naa kelejisho, ore esidano naa enepesho, kake ore enkitok naure Olaitoriani naa ninye natum enkisisa.

³¹Inchoo ninye olng'anayioi loo nkaik enyena, nincho esiaai enye eisis ninye te nena shomito.