Read MAASAI REVISED PROTESTANT Ndung'eta e Rashe 6 Bible Online

Ndung'eta e Rashe 6 - MAASAI REVISED PROTESTANT bible

Ndung'eta e Rashe 6

¹Enkerai ai, tinitonyorrayie te nkutuk ino aitasheiki ole latia ino te sile enye, ninosa olmumai te nkaraki olomoni;

²tinitarresho kewan to rorei lintayio te nkutuk ino, tinikimbung'a ororei le nkutuk ino,

³neaku taasa naa ena, enkerai ai pee intajeu kewan, amu itijing'a inkaik ole latia ino; shomo tasioi tasayia ninye pee kilaku.

⁴Mincho inkonyek inono meirurata, nimincho nkonyek inono meimugo;

⁵intajeu kewan anaa enkolii nailanya olang'oroni, anaa emotonyi natunuta olarreshoni.

⁶Shomo enetii enkalaoni, iyie lo tashalai; ing'ura inkoitoi enyena, nitum eng'eno.

⁷Inemeeta olaiguanani lenye o laitasheikinoni aashu oloitore,

⁸eshum ninche endaa enye te nkata enkirowuaj neiturrurru endaa enye te nkata e nkikesare.

⁹Ke nkata nabaa iton iyie airrag teine? Kanu kenya inyototo too njo inono?

¹⁰“Ekaitoki airura penyo, kaimug penyo,” ejo ninye “Ekashuk inkaik aainei ayeng'iyeng'a penyo.”

¹¹Ore eirura nebaiki ninye aisinanisho anaa olkirikoi o esumash anaa oltung'ani otanape.

¹²Ore oltung'ani lemeeta tipat naa oltung'ani arruoni, neloolo einosaa ilomon le lejare.

¹³Nerojisho too nkonyek enyena, neirorie oltung'ani too nkejek, neutisho too lkimojik lenyena.

¹⁴Ore to lwuasa lo ltau lenye neun intorrok, eunito anaake ninye empeu e mang'atisho.

¹⁵Neaku kepulusokino ninye engolikinoto aluam; ore te nkiti kata naa kegila enemeishiunoyu.

¹⁶Etii intokitin ile naaiba Olaitoriani, mbaa naapishana naa olminong te ninye:

¹⁷Inkonyek olwuasa o lng'ejep olejisho o inkaik naaibukoo osarge lemeeta entioto,

¹⁸oltau oipiru indamunot torrok, inkejek naasioyo aakuetiki enetii entorroni.

¹⁹Olchakeni le lejare olimu te nkutuk elejare, oltung'ani oun empeu e ngogong'i tiatua ilalashera.

²⁰Enkerai ai, imbung'a inkitanapat e papaai lino, niming'uaa enkiteng'enare e yieyioo lino.

²¹Teeniki ninche oltau anaake; teeniki ninche emurt ino.

²²Ore tinilo te nkoitoi, naa aikirikoo ninche iyie; naa tinirrag airura, naa aikirrip ninche iyie, ore tininyototo neiro ninche tenebo iyie.

²³Amu ore enkitanapata naa oltaa ore iutarot naa ewang'an, naa ore inkitamiot oo utarot naa ninche enkoitoi e nkishui.

²⁴Pee kirrip teina kitok torrono, teilo ng'ejep opuyiapui le ina tang'oroi.

²⁵Ming'uar esidano enye to ltau lino, nimincho ninye kimbung too nkonyek enyena.

²⁶Amu eidimi ainyiang'u enkitok naibor onyek te mukate nabo, kake eishu enkitok naloloito entonata e nkishui o lee.

²⁷Keidim olee atanapa enkima to lgoo lenye, nemepejoo inkilani enyena?

²⁸Anaa keidim oltung'ani ashomo aitunyoi inkuk naaishu, aimenya indapi enyena enkima?

²⁹Metaa neijia sii etiu ilo olo aloloitore enkitok ole latia enye, meetae hoo obo oibung ninye olo eitu eitamei.

³⁰Aimeiba iltung'ana olapurroni te nepurrisho, pee eitaraposh enkoshoke enye eeta esumash?

³¹Naa te neibung'i, kelak katitin naapishana; ekeishooyo imasaa pooki e nkaji enye.

³²Ore ilo ololoito nemeeta elukunya sidai; ore ilo oas ina neidaikie kewan.

³³Etum ilbaa torrok netum sii enkarna torrono nemejutoyu enkurruna enye tukul.

³⁴Amu eitaa olom oltung'ani oloarisho, nemepalaki te nelo neitalakisho elap.

³⁵Meng'amaa ninye elaata ake ninye pooki; meetae enkumoi oo nkishoorot naaidim aitoborro ninye.