Read MAASAI REVISED PROTESTANT Ndung'eta e Rashe 7 Bible Online

Ndung'eta e Rashe 7 - MAASAI REVISED PROTESTANT bible

Ndung'eta e Rashe 7

¹Enkerai ai, imbung'a irorei laainei, nishum inkitanapat aainei tiatua iyie.

²Imbung'a inkitanapat aainei pee inchu, tagolie nkiteng'enat aainei anaa enerok enkong'u ino.

³Teeniki ninche ilkimojik linono, ing'ero ninche to ltau lino.

⁴Tiaaki eng'eno, “Ira iyie enkanashe ai nimpot eng'eno nagut ajo olchore lai oleng;

⁵pee kitum atagolie teina kitok naibor onyek, teina aitang'oroni napuyiapui irorei”.

⁶Ore nabo olong narumisho te lusie e nkaji ai aing'or boo,

⁷nadol tiatua ilmoda, nadol olbarnoti obo tiatua ilbarnot lemeeta eng'eno

⁸eim enkoitoi dapash e nkanasa embata e nkaji e ina kitok naibor onyek, eibung enkoitoi alo enkaji enye

⁹pee mirimiru[3] e nteipa, te nkata enkewarie o enkata enaimin.

¹⁰Namaniki pee enang'are ninye enkitok, naishope anaa emulayoi, neeta enareuta.

¹¹Neiro ninye meeta enkuretisho, metoni inkejek enyena tiang;

¹²etii teina kata enkoitoi dapash e nkanasa netii tena kata enemirishoreki, ore te pooki lojata oo nkoitoi neton ninye aanyisho.

¹³Neibung ninye ang'utut, ore inkonyek enyena nekurraki ninye:

¹⁴nejoki ninye, “Aidipa atalaa ilasarri, neaku ore ena olong atalaa ilmuma laainei”.

¹⁵Metaa ore taata aaewuo atumore, aaing'orua iyie oleng, neaku aanoto.

¹⁶Aitobira endapash ai too lkarash oopuyiapui le kitani naing'uaa Misiri.

¹⁷Aitorropilo endapash ai te manoo o esonkoyo o sinantei.

¹⁸Wou, maiputa ate enchipai ang omekenyu; matishipakinoto ate te nyorrata

¹⁹amu metii olpayian lai ang eshomo enelakua.

²⁰Neewa olbene loo ropiyiani nelo naa keshukunye kenya ang te mpolos o lapa.

²¹Ore too rorei kumok le mpakasata, nearaki ninye; ore too rorei lenyena oopuyiapui neidimu ninye.

²²Ore ina kata ake, nesuj ninye ninye, anaa olkiteng opuoi aayieng aashu enkolii najing atua orreshet.

²³Ometaba anaa neng'or embae oltau lenye. Anaa emotonyi nakuetiki ajing atua orreshet; meyiolo duoo ajo keinosie enkishui enye.

²⁴Ore naa taata, nakera aainei, entoning'oki nanu niakuku ilooning'u lelo rorei le nkutuk ai.

²⁵Mincho oltau lino eibelekenya asuj inkoitoi e nkitok naaijo ina, mipong'okino inkoitoi enyena;

²⁶amu eitayio ninye ilmeneng'a kumok lemeikenayu. Ee, ore ilmeneng'a lenyena naa olorora kitok.

²⁷Ore enkaji enye naa enkoitoi nalo enemeneng'a, nedoyio alo ilgilat le keeya[4].