Read MAASAI REVISED PROTESTANT Ndung'eta e Rashe 8 Bible Online

Ndung'eta e Rashe 8 - MAASAI REVISED PROTESTANT bible

Ndung'eta e Rashe 8

¹Aimeipotisho eng'eno, aimedumu eyiolounoto o ltoilo lenye?

²Ore too neerupa o mbat e nkoitoi, ore too nkoitoi neitashe ninye.

³Ore te mbata oo nchomito te dukuya enkanasa, o te kishomi neipotisho ninye ejo:

⁴“Intae taa doi iltung'ana aipotito, naa ore enkishirata ai naa intae inkera oo ltung'ana eipirta”.

⁵Lo moda kulo entamoo ate eng'eno; intae iltung'ana oo moda, enining'o enajo.

⁶Entoning amu kaimaki imbaa e tipat, naapuku te nkutuk ai imbaa naasipa.

⁷Amu eibalunye enkutuk ai esipata; ore intorrok naa olminong te nkutuk ai.

⁸Ore irorei pooki le nkutuk ai naa esupatisho; metii entoki nabo namonira anaa enakordilo te ninche.

⁹Keitoriori teilo oyiolo, naa keitoriori te lelo oonoto eng'eno.

¹⁰Imbung'a iutarot aainei aitalang enkosholai, o eng'eno alang saabu gelunoti.

¹¹Amu aisidai eng'eno nagut alang isoito oogol enkinyiang'a ore pooki naaba anaa ining'uar, meidimi aaitanyaanyukie ninye.

¹²Ore nanu eng'eno nagut, natii atua enkidimata e ning'unoto e ng'eno, naa katum eng'eno o eyiolounoto.

¹³Ore euriata o Laitoriani, naa enkibayunoto e ntorroni. Ore olwuasa o enkitokoos o enkoitoi e ntorroni, o nkirorot naapaashaa naa kaiba.

¹⁴Aata enkikoo o eng'eno sidai, naata eng'eno nagut, naata engolon.

¹⁵Te nanu eitoreisho ilaiguanak, neibalunye ilooitoreisho ina nasipa.

¹⁶Te nanu eitoreisho ilkituaak, ore ilaitoriak neitore enkop.

¹⁷Kanyor lelo laanyor nanu, ore lelo laaing'oru nanu te nyuaata naa kaatum.

¹⁸Etii enkarsisisho o enkanyit tenebo nanu, imasaa naabikoo o puaan.

¹⁹Ore olng'anayioi lai nelang saabu, saabu ninye nasila. Ore ntumot aainei nelang enkosholai gelunoti.

²⁰Alo nanu te nkoitoi e supatisho, too nkoitoi oo sipat enkiguana.

²¹Naitujung karsisisho lelo laanyor nanu, neiput ilchumat lenye masaa.

²²“Aaitobiriua Olaitoriani nanu, te nkiterunoto e siaai enye, esiaai e dukuya enye te pooki musana”.

²³Ore too lporori ootulusoitie aaitasheyieki, te nkiterunoto eng'or enkiterunoto e nkop.

²⁴Ore eton meetae ineegut aaitobiruaki nanu, ore eton meetae inchorroi naatii enkare.

²⁵Ore eton eitu eitamanyuni ildoinyio, ore eton meetae indoinyo naaitobiruaki nanu.

²⁶Ore eton eitu eitobiru ninye enkop tenebo nkong'at enyena aashu enterit e dukuya e nkop.

²⁷Ore pee eitasheyie ninye keper, atii nanu ine Atii apa ina kata pee eitasheyie ninye keper. Ore pee eigeru olokelel[5] tioriong e nguton e nkop.

²⁸Ina kata pee eitasheyie oloing'ang'e le shumata, ina kata pee eitayu nchorroi e nguton.

²⁹Ina kata pee epik enaiposha olpolosie metaa megil inkariak enkitanapata enye. Ina kata pee epik olkitamanyunoto le nkop.

³⁰Natii apa tenebo ninye anaa olaitobirani arriyia; nara anaake enchipai enye, ashipa te dukuya ninye anaake.

³¹Ashipakino enkop enye namanyi, nashipakino inkera oo ltung'ana.

³²Ore naa taata nakera aainei, entoning'oki nanu; emayiana lelo ooimbung inkoitoi aainei.

³³Toning'o enkikoo pee ing'enu, nimiorore ninye.

³⁴Eshipa oltung'ani laaning nanu, oing'or anaake nchomito aainei, laanyu too mbat oo nkutukie oo nkajijik aainei.

³⁵Amu ore ilaatum nanu netum enkishui; netum omom to Laitoriani.

³⁶Kake ore ilo laapong nanu, nepik kewan olbae; ore lelo laaiba nanu nenyor keeya.