Read MAASAI REVISED PROTESTANT Ndung'eta e Rashe 9 Bible Online

Ndung'eta e Rashe 9 - MAASAI REVISED PROTESTANT bible

Ndung'eta e Rashe 9

¹Etesheta eng'eno enkaji enye, eitasheyie ing'apeta enyena pokira naapishana.

²Neteyieng'a nkishu enyena, eitushula enaisho enye oo sabibu, neitobira sii emisa enye.

³Eirriwayie ninye nkaisiaayiak enyena meipotisho, too wuejitin neeika e nkanasa ejo,

⁴Ore ilo pooki omoda, inchoo eibelekenyunye alotu ene o ilo lemeeta ndamunot, ejo ninye,

⁵wou, inosa endaa ai, niok ina aisho oo sabibu naitushula.

⁶Tung'uai emodai pee ibikoo inchu, nilo te nkoitoi e ng'eno nagut.

⁷Ore ilo orerioo olasukenyani netum ninye emoroto, naa ore oloisikong oltung'ani torrono netum olbae.

⁸Minkok olasukenyani aashu kimbayu iyie; inkoo oltung'ani ng'en naa aikinyorru ninye iyie.

⁹Inchoo enkiteng'ena oltung'ani ng'en, naa keponaa eng'eno oleng, inteng'ena oltung'ani supat naa keponaa eng'eno enye.

¹⁰Ore euriata o Laitoriani naa ninye enkiterunoto e ng'eno, naa ore eng'eno e ilo Sinyati naa ening'unoto.

¹¹Amu te nanu eponari inkolong'i inono, aikiponikini iyie ilarin le nkishui.

¹²Tenaa ira iyie ng'en, naa aira ng'en te nkorrok ino; naa tinisukenyisho, naa iyie ake openy onap.

¹³Ore enkitok namoda neilepilep; nemeutaroyu, nemeeta enkurruna nadol.

¹⁴Eton te nkutuk e nkaji enye, neton too wuejitin neerupa e nkanasa.

¹⁵Eipotu lelo oogiroo ine, lelo oopuo inkoitoi enye maate,

¹⁶ore pooki ng'ae omoda, inchoo eibelekenyunye alotu ene, ore pooki ng'ae lemeeta endamunoto nejoki,

¹⁷“Ore enkare napurruno naa kemelok, ore emukate nainosi too nkisudorot naa aisidai.”

¹⁸Kake meyiolo ninye ajo etii keeya ine, inchere ore ilomon lenyena netii ineegut e nemeneng'a.