Read MAASAI REVISED PROTESTANT Olaikooni 11 Bible Online

Olaikooni 11 - MAASAI REVISED PROTESTANT bible

Olaikooni 11

¹Nteng'ela imasaa inono too nkuapi, ore te nkata nalotu nitum dupoto.

²Tooro olchumati lino kat naapishana aashu isiet, amu miyiolo ajo kaa torroni napukoki enkop.

³Tenebore inkatampo enkare, neshaiki enkop; naa teneurokino olchani kopikop aashu moikuape, ore ine nesulakino olchani neirrag teine.

⁴Ore ilo ojurru enkijape nemeunisho; naa ore ilo oisilig inkatampo nemekesisho.

⁵Ore anaa enimiyiolo eneikunakino enkiyang'et iloik tiatua enguset e nkitok nairoishi, neaku miyiolo esiaai e Nkai naitobir pooki toki.

⁶Tuuno tadekenya ilanterera linono, ore teipa niun ake aitoki; amu miyiolo ajo kakua oobulu, kulo ashu kuldo, aashu eidim pokira aatisidana.

⁷Kemelok ewang'an, naa keitiship inkonyek tening'or enkolong.

⁸Amu tenebikoo oltung'ani ilarin kumok, inchoo ninye eshipakino pooki; kake inchoo edamu ninye ajo ore inkolong'i e naimin naa keaku kumok. Ore ina pooki nalotu naa empesho.

⁹Tishipayu iyie lo barnoti, tiatua kitisho ino, nincho oltau lino kinting'id iyie too nkolong'i pooki e kitisho ino; shomo too nkoitoi o ltau lino o too nduaat oo nkonyek inono. Kake tayiolo ajo ore te kuna baa pooki naa aikiyau iyie Enkai atua enkiguana.

¹⁰Iwuang'ie enkuretisho too ndamunot inono, niwuang'ie aitalamaa emion to sesen lino; amu ore kitisho o enkakenya enkishui naa empesho.