Read MAASAI REVISED PROTESTANT Olaikooni 6 Bible Online

Olaikooni 6 - MAASAI REVISED PROTESTANT bible

Olaikooni 6

¹Etii entorroni natoduaa nanu tiabori enkolong, neteeka oleng iltung'ana.

²Ore oltung'ani oisho Enkai enkarsisisho o masaa o e nkanyit, metaa meeta toki nalau e pooki ake naba anaa enayieu, nemeisho ake sii Enkai ninye engolon metishipakinoyu ninche, kake olomoni olotu ashipakino ninche; ore sii ena naa empesho; naa olosilisili sapuk.

³Teneiu oltung'ani inkera iip nabo, nebikoo ilarin kumok oleng, metaa ore inkolong'i oo larin lenyena naa kumok oleng, kake meshipakino intokitin sidain e nkishui, nemetum sii enukaroto, ajo nanu enaikash enkerai naibiruoki alang ninye,

⁴amu kelotu meeta tipat nerrinyo alo atua enaimin, neitoipori enkaina enye te naimin.

⁵Ore ake sii, eitu doi ninye edol enkolong aashu eyiolou toki; netum ake enkiyeng'iyeng alang ninye.

⁶Ore hoo tenaa kebikoo oltung'ani ilarin inkalifuni are, neitu ake eshipakino toki aime ewueji nebo epuo ninche pokira?

⁷Ore eekenyata pooki o ltung'ani naa te nkaraki enkoshoke ake, nemeraposho ake te sumash enye. Kainyoo elang'ie ilo ng'en olmodai?

⁸Anaa kainyoo eeta ilo tung'ani ng'en nalang'ie olaisinani otayiolo eneikunaa kewan te dukuya lelo ooishu?

⁹Enaikash ina nidolita too nkonyek alang ina niyieu nimiata; ore sii ninye ena naa empesho netiu anaa osiwuo ake emirareki.

¹⁰Ore pooki naewuo aaku neidipaki apa aaipoto, neyioloi enatiu tung'ani, neyioloi aajo meidim ataarare obo ogol alang ninye.

¹¹Ore teneaku irorei kumok, neaku empesho sapuk, naa ainyoo eikashie oltung'ani?

¹²Anaa aing'ae oyiolo ajo ainyoo esidai te tung'ani eton eishu tenena kuti olong'i naaishu ninye te nkishui enye e pesho, nena naagiroo ninye anaa oloip? Anaa aing'ae oidim atoliki oltung'ani imbaa naasayu te siadi ninye tiabori enkolong?