Read MAASAI REVISED PROTESTANT Olaikooni 8 Bible Online

Olaikooni 8 - MAASAI REVISED PROTESTANT bible

Olaikooni 8

¹Aing'ae otiu anaa oltung'ani ng'en? Naa aing'ae oyiolo ina kibelekenyata e ntoki pooki? Ore eng'eno nagut e tung'ani neitawang enkomom enye, ore ina golon enkomom enye neibelekeny.

²Imbung'a enkitanapata o laiguanani, naa ore te nkaraki olmumai sinyati miureishoyu;

³shomo tung'uai enkomom enye; mimutie eton mesidai esiaai amu keas ninye ina nayieu pooki.

⁴Amu ore ilo rorei lo laiguanani naa aisapuk,

⁵naa aing'ae oidim atiaaki ninye, “Kaa doi iasita iyie?” Ore ilo oyanyit enkitanapata nemetum enkitamioto, naa ore ina damunoto o ltung'ani ng'en neyiolo enkata neyiolo enkoitoi.

⁶Ore pooki bae neeta erishata enye o enkoitoi naasieki, hoo naa ore enyamali o ltung'ani naa keyek ninye.

⁷Amu meyiolo ninye ina nayooki aaku, anaa aing'ae oidim atoliki ninye enayooki aaku?

⁸Meetae oltung'ani oata engolon naibokie enkiyang'et, aashu eeta engolon naitoreyie ina olong e keeya; olarrabal ilo limikiilany, nemeitajeu intorrok lelo oishooki ninye.

⁹Atoduaa kuna pooki ina kata apikita endamunoto ai nena pooki naasi tiabori enkolong, enkop naata kulikae engolon, neitorogony ilkulikae ootii abori ninche.

¹⁰Nadol lelo tung'ana torrok enukari; lelo apa oojing nepuku aaing'uaa ewueji sinyati, neisisi tiatua enkanasa teine netaasie imbaa naaijo nena. Ore sii ninye ena naa empesho.

¹¹Medung'okini ina torroni enkiguana aasioki, ore oltau le nena kera oo ltung'ana netumuta pee eas entorroni.

¹²Ore hoo neas olaing'okoni entorroni katitin iip nabo neitoodor enkishui enye, kake ayiolo ake ajo kesidanu oleng te lelo ooure Enkai, amu keureisho te dukuya ninye;

¹³Kake mesidanu te lelo arruok, nemeitoodor inkolong'i enyena anaa oloip, amu meeta enkuretisho te dukuya Enkai.

¹⁴Etii empesho naasa te nkop, etii iltung'ana supati laa ninche eitaasi nena siaaitin naaipiru lelo torrok, netii iltung'ana torrok laa ninche eipang'aki iyiasat naas lelo supati. Atejo sii ore ena naa empesho sii ninye.

¹⁵Nanyorraa nanu enkitumurrunoto, amu meeta tung'ani toki sidai tiabori enkolong kake pee edaa, neokisho neshipakino kewan, amu keiriamariyie ena eekenyata enye tiatua nena olong'i e nkishui naishoo Enkai ninye tiabori enkolong.

¹⁶Ore pee apik endamunoto ai aitayiolo kewan eng'eno nagut, nadol esiaai naasitae tioriong enkop, nadol ajo metum oltung'ani injo dama aashu kewarie;

¹⁷nadol teine isiaaitin pooki e Nkai, inchere meyiolou oltung'ani nena naasa tiabori enkolong. Ore hoo neturu oleng oltung'ani aekenya eing'oru, meyiolou hoo ninye pito; hoo nenya kutuk oltung'ani ng'en ajo keyiolo. Meyiolou hoo ninye pito.