Read MAASAI REVISED PROTESTANT Olaikooni 9 Bible Online

Olaikooni 9 - MAASAI REVISED PROTESTANT bible

Olaikooni 9

¹Aibirribirra nanu kuna pooki to ltau, najur aineneng pooki, enetiu lelo supati o lelo ng'eni o siaaitin enye, etii pooki enkaina e Nkai; tenaa kenyorrata aashu enkiba meyiolo tung'ani. Ore pooki toki natii dukuya enye naa empesho,

²amu kebatatakino pooki enyamali nabo aa lelo supati o lelo torrok; lelo lemeeta oloirerio o lelo ooiduruk, ilo oitayu olasar o ilo lemeitayu olasar. Ore anaa enatiu to ltung'ani supat, neijia etiu olaing'okoni; anaa enatiu te ilo onya olmumai neijia etiu te ilo lemenya olmumai.

³Entorroni ena te pooki naasi tiabori enkolong, nchere nebo eiting'oki pooki, ore sii iltauja loo ltung'ana pooki nebore enkarruoisho, netii olkuenyi iltauja lenye eton eishu ninche. Ore te siadi ina nepuo enemeneng'a.

⁴Kake ore ilo oitutumoki o lelo pooki ooishu neeta osiligi, amu enaikash oldia oishu alang olng'atuny otua.

⁵Keyiolo lelo ooishu inchere keyooki aaye, kake meyiolo ilootuata ae toki, nemeeta ae laakinoto; kake ore endamunoto enye neimin.

⁶Ore enyorrata enye o enkiba enye o olom lenye neidipa pooki aisha, nemeekure eetaae ntarasi erubata e pooki naasi tiabori enkolong.

⁷Shomo nosa endaa ino te nchipai, niok enaisho ino oo sabibu te nchipai o ltau; amu eidipa Enkai atonyorrai pooki nias.

⁸Inchoo ilkilani linono eiborru anaake; nimincho eilata elai te ndukuya ino.

⁹Tishipakinoyu enkishui tenebo o enkitok ino ninyor, too nkolong'i pooki e nkishui ino empesho nikinchoo ninye iyie Enkai tiabori enkolong, amu ninye erubata ino tena kishui te ekenyata niekenya tiabori enkolong.

¹⁰Ore pooki naibung enkaina ino aas, taasa ninye te ngolon ino pooki; amu metii esiaai anaa endamunoto anaa eng'eno anaa eng'eno nagut atua enemeneng'a naa ninye ilo.

¹¹Atoduaa ake sii tiabori enkolong ajo ore ina kesha neme ene lelo ake ooten, neme ene lelo ake oogol to larrabal, neme enoo lang'eni ake endaa, neme enoo lkarsisi ake eng'eno, neme ene lelo ake arriyiak too siaaitin omom; kake eipang'aki ake erishata e munyani ninche pooki.

¹²Amu meyiolo oltung'ani enkata enye. Ore anaa isinkir ooibung'aki to rreshet torrono, anaa imotonyi naaibung'aki tiatua orreshet neijia etiu inkera oo ltung'ana eibung'i to rreshet te nkata torrono, ina kata napulusokino adoiki ninche.

¹³Atoduaa sii ena kitanyaanyukoto e ng'eno nagut tiabori enkolong, nelioo aa sapuk te nanu.

¹⁴Eetae apa enkiti anasa natii ilkuti tung'ana atua, nelotu olaiguanani kitok aarare ninye neman aibung, nepik iltimito aitaman agilunore ninye.

¹⁵Kake enotoki tiatua ina anasa oltung'ani aisinani ng'en, neitajeu ilo tung'ani te ng'eno enye enkanasa. Nemeetae hoo obo otadamua ilo tung'ani aisinani;

¹⁶kake ajo ake enaikash eng'eno nagut alang engolon hoo netemenaiyioki eng'eno nagut eilo aisinani neitu eshilari irorei lenyena.

¹⁷Keikash irorei lo ltung'ani ng'en ooning'i te mborron alang imbuakunot oloitoreisho tiatua ilmoda.

¹⁸Keikash eng'eno nagut alang imasaa o larrabal, kake ore olaing'okoni obo nemut intokitin sidain kumok.