Read MAASAI REVISED PROTESTANT Osinkolio le Solomon 2 Bible Online

Osinkolio le Solomon 2 - MAASAI REVISED PROTESTANT bible

Osinkolio le Solomon 2

¹Ara nanu entapukai e Sharon, entapukai oo erat.

²Ore anaa entapukai natii atua ilkiku, neijia etiu enyorrata ai too ntoyie.

³Anaa enatiu olchani loo lng'anayio tiatua entim, neijia etiu olanyor lai tiatua iltung'ana ooti. Atotona te nchipai sapuk tiatua oloip lenye, nemelok olng'anayioi lenye te nkutuk ai.

⁴Aatorikuo ninye nanu enkaji o sirua, naadumaki ninye nanu aitaman oltaa le nyorrata.

⁵Intasheyie eng'olon ai te ndaa oo lng'anayio, nikintagol too lng'anayio; amu kaata nanu emuoyian e nyorrata.

⁶Oi duoo tenetii enkaina enye e kedianye abori elukunya ai, ore enkaina enye e tatene naaibung!

⁷Esiligieki intae natoyie e Yerusalem, enosa olmumai too ntarakueti naaten, inchere mipututu enyorrata ometabau erishata naishaakino.

⁸Aning'ito oltoilo lo lanyor lai elotu, edoku too ldoinyo, elang'u ildoinyo.

⁹Etiu olanyor lai anaa enkolii, aashu oloing'oni le nkolii. Ng'ura ajo nelido oitashe tioriong esuntai ang, eing'or atua enkaji te lusie, eing'orisho too lusien.

¹⁰Airorie nanu olanyor lai naajoki ninye. “Inyo enanyor ai, ina nanyor aisul, naa wou tung'uai;

¹¹Amu ng'ura, ore ina kirobi netulusoyie eishunye enchan neshomo alusoo.

¹²Etubulutua ntapuka tioriong enkop, netabawua enkata e ranyare, netoning'oki oltoilo loo nturkuluoni te nkop ang.

¹³Ore olng'aboli neitayio ilng'abolo, ore osabibu neitapuka eitayu olng'usil orropil. Inyo, enanyor ai, enaikishiaan ai wou tupuku.

¹⁴Oi iyie enturkuluo ai natii atua olbaata le ndapidapoi, natii olbaata le marti, inchooki matoduaa enkomom ino, inchooki matoning'o oltoilo lino, amu ore oltoilo lino naa kemelok, naa sidai enkomom ino.

¹⁵Imbung'aki iyiook mbariak, nena bariak kutiti, nena naainyal inkurman ang oo sabibu, amu ore inkurman ang oo sabibu neitapuka.”

¹⁶Ore olanyor lai naa olalai nara nanu enenye, eirrita ninye ntare enyena tiatua ntapuka.

¹⁷O metaba anaa nemanaa, nelusoo enkewarie imbelekenyunye olanyor lai, totiwuo anaa enkolii aashu itiu anaa oloing'oni le nkolii te nchumata oldoinyo osur.