Read MAASAI REVISED PROTESTANT Osinkolio le Solomon 4 Bible Online

Osinkolio le Solomon 4 - MAASAI REVISED PROTESTANT bible

Osinkolio le Solomon 4

¹Ng'ura ajo ira iyie sidai enanyor ai, ng'ura ajo ira iyie sidai! Ore nkonyek inono netiu anaa ine nturkuluo, eiwariwaru te nkarasha naitoipieki enkomom. Ore ilpapit linono netiu anaa eluaata oo nkineji, edou abori to loshong'ishong'i le Gilead.

²Ore ilala linono neibor anaa isupeni e kerra naabarno, nena naaetuo eing'uaa enkisujata, neeta pooki ilmao, nemeetae hoo nabo natua olkuoo.

³Ore nkonito[1] e nkutuk ino netiu anaa empito nanyokie, naa sidai enkutuk ino. Ore ntakul inono netiu anaa indung'ot are o lng'anayioi oji kukumanka, eiwariwaru te nkarasha naitoipieki enkomom.

⁴Etiu emurt ino anaa oltalet le Daudi, napurupurana nepuyiapui, nebore imankek naaikununo anaa ilong'oi oo lmurran enkalifu.

⁵Ore ilki linono pokira netiu anaa nkoliin, ilmao le nkolii oodaa too ntapuka.

⁶Ometamanai enkakenya nelusoo enkewarie, o teina doinyo e nkorropil.

⁷Ira iyie sidai oleng enanyor ai, miaata iyie eleyiata.

⁸Wou tenebo nanu tung'uai Lebanon, esiankiki ai; wou tenebo nanu tung'uai Lebanon. Wou tung'uai entopij oldoinyo le Aman, tung'uai entopij e Senir o Hamon, tung'uai inkapuniaa oo lng'atunyo, tung'uai lelo doinyo loo lowuarak kerin.

⁹Iwa iyie oltau lai te ngolon, enkanashe ai esiankiki ai, iwa iyie oltau lai te nking'urata oo nkonyek inono, to soit obo ogol enkinyang'a le murt ino.

¹⁰Kebaa emeloni e nyorrata ino, enkanashe ai, esiankiki ai! Kebaa eikash enyorrata ino alang enaisho oo sabibu! Ore ina rropili oo ila inono nelang kulie naarropil.

¹¹Eitong'u too nkonito e nkutuk ino enaisho namelok, esiankiki ai; etii enaisho olkenkei o kule abori olng'ejep lino; Ore olng'usil loo nkilani inono netiu anaa olng'usil le Lebanon.

¹²Ore enkurma naikenoro naa enkanashe ai, esiankiki ai, enkurma naikenoro enchorro naripa.

¹³Ore nkaitubulu inono netiu anaa enkurma o lng'anayio ooji kukumanka, eeta ilng'anayio pooki gelunot, hena o nardo.

¹⁴Eeta ninye Nardo o Saparon o sinantei, o lkeek pooki oorropil, o emanoo o sonkoyoni tenebo isonkoyoni pooki naaisul.

¹⁵Ira iyie enchorro e nkurma, enchorro e nkare naishu, o nchorroi naarukunye e Lebanon.

¹⁶Inyo iyie lo kutati le moikuape! Nilotu iyie lo kutati le kopikop. Tukuta enkurma ai, inchoo erropili enye eibulaa. Inchoo enanyor ai elotu enkurma enye, nenya ilng'anayio lenyena gelunot.