Read MAASAI REVISED PROTESTANT Osinkolio le Solomon 5 Bible Online

Osinkolio le Solomon 5 - MAASAI REVISED PROTESTANT bible

Osinkolio le Solomon 5

¹Aewuo nanu enkurma ai, enkanashe ai, esiankiki ai, aiturrurruo nanu emanoo ai tenebo esonkoyo ai, ainosa nanu olchankaroi naelie olkenkei le naisho, naok enaisho oo sabibu o kule. Enosa lo shoreta niokioko; entookisho oleng intae iloonyorri!

²Airure nanu kake eitu eirura oltau lai. Toning'o! Eoshioshito olanyor lai kutuk aji. “Taboluoki, enkanashe ai, enanyor ai, enturkuluo ai, enemeeta eleyiata ai; Amu keshal elukunya ai, te nkolielio, ore ilpapit laainei neshal te nkolielio e nkewarie.”

³Aitayio nanu nkilani aainei, naa kaji aiko tenaitoki aishop? Aisuja nkejek aainei, kaji aiko tenaitoki aroro enterit?

⁴Nepik olanyor lai enkaina enye enkikenet e kutuk aji, neng'idayu oltau lai tiatua nanu.

⁵Nainyototo abolu olanyor lai, nebore inkaik aainei emanoo, neitong ilkimojik laainei teina manoo naruko, aibung inkikeneta e kutuk aji.

⁶Nabolu olanyor lai, kake eibelekenye olanyor lai nelo, neisinanuo oltau lai pee eiro ninye. Naing'oru ninye neitu atum ninye; aipotuo ninye, kake eitu aawalaki nanu.

⁷Naatum ilarripok nanu, ina kata emanaa te nkanasa; naar nanu, naapik nanu olbae, naaoru nanu enkila ai, lelo arripok le nena sunta.

⁸Enosa olmumai intae natoyie e Yerusalem, tinitumutumu ake olanyor lai, nilikiki ninye aajoki ekamuoi te nyorrata.

⁹Ainyoo elang'ie ina ninyor ino enkae ninyor? Oi ina sidai tiatua inkituaak? Kainyoo elang'ie ilo linyor lino olikae linyor eji pee intanapa iyiook ena?

¹⁰Ore olanyor lai naa aisidai oleng negol, keibala too nkalifuni tomon.

¹¹Ore endukuya enye naa Saabu nasila; ore lpapit lenyena naa sidain, kerook anaa olkurruk.

¹²Netiu nkonyek enyena anaa ine nturkuluo, te mbata oo nchorroi enkare, naaisujaki te kule, naaitobirakino entonata.

¹³Naa sidain intakul enyena anaa ineeitobirieki isonkoyoni neitayu olng'usil orropil, ore nkonito e nkutuk enye netiu anaa ntapuka, naitong'u emanoo naruko narropil.

¹⁴Ore nkaik enyena netiu anaa saabu nairina, naikodoki too soito oogol enkinyang'a. Ore osesen lenye netiu anaa ilala ooitobiraki loo lkanchaoni, neikodoki too iila naarropil oleng.

¹⁵Ore nkejek enyena netiu anaa ing'apeta e Alabata naaikodoki te saabu. Ore tening'or ninye netiu anaa iltarakua le Lebanon.

¹⁶Ore enkiroroto enye naa kemelok oleng, naa ore ninye pooki naa keng'uarrayu, olanyor lai ele naa olchore lai ele, natoyie e Yerusalem.