Read MAASAI REVISED PROTESTANT Osinkolio le Solomon 7 Bible Online

Osinkolio le Solomon 7 - MAASAI REVISED PROTESTANT bible

Osinkolio le Solomon 7

¹Kebaa enare inamuka inkejek inono? Iyie nasiankiki o laiguanani! Nepurupurana nkupesir inono anaa isoito oogol enkinyiang'a, esiaai oo nkaik o laitobirani arriyia.

²Ore osororua lino netiu anaa olbakuli, ilo lemelau aekata enaisho oo sabibu naitushula, ore enkoshoke ino netiu anaa osototi le nkano omanita intapuka.

³Etiu ilki linono pokira anaa ilmao le nkolii.

⁴Netiu emurt ino anaa oltalet lo lalae lo lkanchaoi, ore nkonyek inono netiu anaa lturot ootii Heshbon, te mbata e kishomi e Batrabbin. Etiu enkume ino anaa oltalet le Lebanon, ilo oing'or Dameski.

⁵Ore endukuya ino neitashe aitobiraki anaa oldoinyo le Karmel, ore nena enat inono oo lpapit naaisiong'a netiu anaa nkilani pilei, netil olaiguanani tiatua ina sidano.

⁶Kebaa enkishiaa o esidano niaata iyie, iyie enanyor ai, kebaa elulung'a enyorrata ino.

⁷Isiriri iyie anaa oltukai netiu ilki linono, anaa nkimarrat[2] enyena.

⁸Atejo nanu kaked ilo tukai, naitayu ilng'anayio lenyena nchoo ilki linono metotiwuo anaa nkimarrat o sabibu, ore olng'usil le nkiyang'et ino netiu anaa olng'usil loo lng'anayio oonyaanyukie ilama.

⁹Ore ng'ututat inono netiu anaa enaisho sidai oo sabibu. Ina nalo adoyio aitobirari, naisotuni te nkutuk neim irishat oo lala.

¹⁰Ara nanu eno lanyor lai, naa ore eyieunoto enye naa nanu.

¹¹Wou, olanyor lai, maape nkong'at, nikirrag nena ang'itie;

¹²matayooki aapuo nena kurman oo sabibu, nikipuo aaing'uraa tenaa keitapuka isabibu, tenaa ketabolote intapuka oo sabibu neitapukita sii ninche kukumanka. Ore teine naa kaaisho nanu enyorrata ai.

¹³Ore enkaitubului nanyaanyukie enchiliwa neitayio olng'usil orropil ore ilng'anayio pooki sidain netii embata e kutukaji, ilng'ejuko tenebo o lmusan, lelo laatushumaka nanu iyie, iyie olanyor lai.