Read MAASAI REVISED PROTESTANT Osinkolio le Solomon 8 Bible Online

Osinkolio le Solomon 8 - MAASAI REVISED PROTESTANT bible

Osinkolio le Solomon 8

¹Oi naaji tenaa iaku olalashe lai, ilo otanaa ilki le yieyio! Tenaainepu nanu iyie te boo, naa kaang'utut, nemeetae hoo obo laamenaa nanu.

²Ekaarik nanu iyie o maaitijing'a enkaji e yieyio, olgilata le ina apa naatoiwuo nanu, Naaisho nanu iyie enaisho oo sabibu natii enkorropil tooko, ina are oo lng'anayio le kukumanka.

³Oi naaji tenaa ketii enkaina enye e kedianye abori endukuya ai, naamuataki enkaina enye e tatene!

⁴Enosa olmumai intae natoyie e Yerusalem, inchere mipututu enyorrata ai, o metaba anaa neyieu openy.

⁵Aing'ae lido olotu to lpurkel, eirishakino olonyor lenye? Tiabori olchani onyaanyukie olamai aatuputuo iyie. Teine apa earita ng'utunyi enkop kiini iyie, teine apa earita enkop ina nikitoiwuo.

⁶Intaaki nanu matotiwuo anaa olmishire tiatua oltau lino, anaa olmishire otii enkaina ino; amu ore enyorrata naa kegol anaa keeya, ore olom netolo anaa enkurare. Ore inkiwuang'at enyena naa nkiwuang'at e nkima, enkima napejisho oleng to lang'at.

⁷Mear inkariak kumok enyorrata, nemeidim oloirrag le nkare aawa ninye. Teneing'oru oltung'ani enyorrata, too masaa pooki e nkaji enye, naa kemenari tukul.

⁸Kiata enkiti anashe, neitu ebulu ilki. Kaa kintaas enkanashe ang, teina olong nasai ninye?

⁹Tenaa kesuntai ninye, naa aikishetaki te shumata ninye oltalet le nkosholai, kake tenaa aikutukaji ninye, nikiripaa ninye too mbaoi o ltarakuai.

¹⁰Ara apa nanu esuntai, netiu apa ilki laainei anaa iltaleta; neaku atii atua nkonyek enyena, anaa ilo oyau eseriani.

¹¹Eeta apa Solomon enkurma oo sabibu te Baalhamon; neishooyo enkurma oo sabibu aisilenoki ilaramatak; ore ake pooki lenye te lelo ng'anayio mpisai enkalifu nabo e nkosholai.

¹²Ore enkurma ai oo sabibu, ina naa enaai ake, naa enaai makewan, ore iyie Solomon indim aawa ina alifu nabo, ore ilaramatak lo lng'anayioi netum iip are.

¹³Oi intae oomanya atua nena kurman, einining'ito ile ncholiek ai oltoilo lino; nchooki matoning'o ninye.

¹⁴Tasioki isarisara olanyor lai, totiwuo anaa enkolii aashu oloti oing'oni le nkolii, otii oldoinyo loo sonkoyoni.