Read MAASAI REVISED PROTESTANT Isaya 1 Bible Online

Isaya 1 - MAASAI REVISED PROTESTANT bible

Isaya 1

¹Ore ena buku e Isaya, naa keeta olkilikuai oipirta Yuda o Yerusalem anaa enaitoduaa Enkai Isaya olayioni le Amos, too nkolong'i e Usia o Yotam o Ahas o Hesekia, aiguanak apa le Yuda.

²Toning'o, iyie keper, ninchoru enkiok na kop; amu eiroro Olaitoriani: “Aitotio nanu inkera naitubulu, naatogolong'akita ninche.

³Keyiolo olkiteng olopeny, neyiolo osikiria ewueji neitotiyieki kake meyiolo ninye Israel, mening ninche iltung'ana laainei.”

⁴Ee, olosho loo laing'okok, olorere onapita enkarruoisho, eishoi oo larruok, ilayiok oas inemeitoriori! Etung'uatie ninche Olaitoriani, etemenaitie ninche Ilo Sinyati le Israel, etapong'ori ninche tukul.

⁵Kainyoo pee iyieuu neoshi intae, eji metaa ipuopuo dukuya aagolong'u? Kemuoi endukuya pooki, neiterre oltau pooki.

⁶Ore ebaiki entutunyo e nkeju o metabaiki endukuya, metii embiotisho, kake ilbaa o ldututa o nkirondoni naaruko nkimek; neitu eironyuni, aashu eeni, neitu eelieki eilata.

⁷Eirragita enkop inyi aa mijooni, netapejoyioki inkanas inyi te nkima; te dukuya intae idolitata, einosa iltung'ana leeiking'a enkop inyi; netomijoono ninye, anaa ina nainyala iltung'ana leeiking'a.

⁸Etung'uayioki Yerusalem anaa olng'obor tiatua enkurma oo sabibu, anaa olkirragarie tiatua enkurma entoki naaijo nkaimalasia anaa enkanasa natang'aduaki.

⁹Te neme Olaitoriani loo lororani otelekaka iyiook oloti pisiai, anaata kitotiutuo anaa Sodom, nikitiu anaa Gomora.

¹⁰Entoning ororei lo Laitoriani, intae ilaitoriak le Sodom! Enchoo enkiok enkiteng'enare e Nkai ang intae iltung'ana le Gomora!

¹¹“Kainyoo te nanu enkumoi oo lasarri linyi? Olaitoriani ojo; Ataraposhe nanu ilasarri oopejori loo lmeregeshi o eilata e lelo kerra linyi oopir; mashipakino nanu osarge loo loing'ok, aashu loo lkerra aashu o loo lkineji.

¹²Amu ore oshi ti nipuonunu aaitalioo ate te dukuya nanu, aing'ae naikilikuan intae tinipuonunu aaituny indung'orot aainei.

¹³Mintokiki aayau ilasarri le pesho; olminong enkorropil inyi te nanu. Ore olapa ng'ejuk o Sabato o enkipototo e umata - maidim nanu aing'ura ena torroni o eumata.

¹⁴Ore lelo apaitin linyi ng'ejuko o lelo siruai linyi oogeluno, keiba oltau lai; netaa ninche olola te nanu, atanaure aibookino ninche.

¹⁵Ti nintorioo inkaik inyi te nkomono, naisudoo inkonyek aainei te ntae; ore hoo niomonono katitin kumok, mainining nanu; kebore nkaik inyi osarge.

¹⁶Entukuo ate, entobira ate; ewuang'ie entorroni oo nkiaasin inyi, te dukuya inkonyek aainei; entapal entorroni.

¹⁷Entamoo ate easata oo mbaa sidain; eng'oru esipata, entapal enkibookinoto e nkop, entomitu ilo okishi, entasaru ina nara enkoliai.

¹⁸Wou naa matoning'oto te nebo, Olaitoriani ojo; ore hoo neyia ing'ok inono anaa enkarasha nanyokie, keyooki aaiboru netiu anaa kule. Ore hoo nedo anaa osarge, keyooki aaiborru anaa ilpapit loo ntare naaibor.

¹⁹Ti ninyoraa nikirukuruku, ninyanya olkar le nkop;

²⁰kake ti nikianyianya nigolong'ung'u, nemuti intae to lalem; amu enkutuk o Laitoriani nairoro.”

²¹Kaji eikuna ina anasa naisiligayu, pee etaa enaibor onyek, ore apa ina nabore esipata! Naa enkiguana nasipa naton tiatua ninye, kake ore taata netaa ilarak.

²²Etaa enkosholai ino isuut, netushulare enaisho ino enkare.

²³Ore ilkituaak linono netogolong'utua, naa ile ncholiek oo lapurrok. Nenyor ake pooki te ninche eropare nekuet aasujaa inkishoorot. Memitu ninche ilo okishi, nemeshilaa ninche enyamali oo nkolia.

²⁴Ore te nkaraki ina, Olaitoriani ojo, Olaitoriani loo lororani, ilo magilani le Israel: “Ee kaitalaku nanu engoro ai too lmang'ati laainei, kaitalaku nanu makewan te lelo laaiba.

²⁵Kaaipirakinye nanu enkaina ai Naasil anaa enasil olkunoni esekenkei, naiwuang'ie nanu oloirerio lino pooki.

²⁶Naa kaitasheyie nanu ilarishak linyi anaa apake o lelo arikok linyi anaa apake te nkiterunoto. Ore te siadi ina neaku eikiji, enkanasa e supatisho, ina anasa naisiligayu.”

²⁷Kekorduni Sion te sipata, ore lelo ootii atua nekorduni te supatisho.

²⁸Kake ore lelo oogolong'u o laing'okok, neidaikieki te nebo, ore lelo ootanyaita Olaitoriani nemuti.

²⁹Iyookiki aakurru te nkaraki lelo keek apa laaijo ilng'abolo lishipakinono, neitukurruni intae te nena kurman apa nitegelutua.

³⁰Iyookiki intae aatiu anaa olchani onyaanyukie olng'aboli otoyu imbenek enyena, aashu anaa nkurman nemetii enkare.

³¹Ore ilo tung'ani ogol netiu anaa isuut, ore esiaai enye netiu anaa isuut naapiki enkima neyupuyup te nebo, nemeetae oltung'ani oidim aibooi ina kima.