Read MAASAI REVISED PROTESTANT Isaya 10 Bible Online

Isaya 10 - MAASAI REVISED PROTESTANT bible

Isaya 10

¹Woi ntae ilelo ooitorogonyisho neipiru inkiguanat naaitorogonyisho,

²neibelekeny ilo omena aaitapaash esipata neoru ilo aisinani loo ltung'ana laainei esipata enye, neitaa ninche nkolia entoki nataarutua, netum aaibung'a nena okishin aawaita!

³Kaa kenya intae iasiasa teina olong e nkitamioto, te ilo kutati olotu eing'uaa enelakua? Kaing'ae iyie isaru mikitaretu, naa kaing'ae iyie ing'ueiki karsisisho ino?

⁴Meleku toki, meteleku ake pee isukudo te nebo lelo ooena, aashu ibatata te nebo lelo ootasesekuanaki. Amu ore te kuna pooki eitu eiwuang'ieki engoro enye neton ake etudumuaki enkaina enye pee eoshisho.

⁵Ee, Asiria, ninye esiare e ngoro ai, ninye orinka le mpijan e ngoro ai!

⁶Airriwua nanu metaarare ilo osho lemeure Enkai, naitanapa nanu ninye te nkaraki ilo orere laaitagoro, pee eibung aaraya ntokitin enye, neitunyoki enkop anaa esarng'ab e nkoitoi.

⁷Kake mme ina eyieu ninye, neme ina edamu ninye; kake ore ndamunot enyena naa pee einyalisho, nedung'oo iloshon leme kuti;

⁸amu ejo ninye: “Aime ilaiguanak pooki ilarikok laainei?

⁹Aimetiu kulo anaa Karkemish? Aimetiu Hamat anaa Arpad? Aimetiu Samaria anaa Dameski?

¹⁰Amaa anaa enatabaikia enkaina ai nkitoriat oo nkitanyaanyukot oo nkaitin, naa ore nkitanyaanyukot enye naaguetuno naa aikituaak aalang nena naatii Yerusalem o Samaria,

¹¹aimaitaas nanu Yerusalem o nkitanyaanyukot oo nkaitin enyena anaa enaitaasa Samaria o nkitanyaanyukot oo nkaitin enyena.”

¹²Ore ake pee eidip Olaitoriani esiaai enye pooki to ldoinyo le Sion o te Yerusalem, naa keitame ilo owuasa o ina kitokoos o laiguanani le Siria o ina kitaragirag enye.

¹³Amu ejo Ninye: “Te ngolon e nkaina ai ataasa nanu ena o te ng'eno ai, amu kara nanu ng'en; naiwuang'ie nanu ilpolosien loo loreren, nataarayie nanu ilchumat lenye; atusulua nanu lelo ootoni too lorikan le nkitoo anaa oloing'oni.

¹⁴Eibung'a enkaina ai anaa enkaji e motonyi karsisisho oo loreren; naa ore anaa enasotu iltung'ana ilmosor ootung'uayioki, neijia aikuna asotu enkop pooki; nemeetae hoo obo oiwuang'ie enaipukoi, aashu obol enkutuk, aashu eyietu.”

¹⁵Keaku entolu kitok alang ilo oasishore, aashu keisis esoo kewan te ilo odung'ishore? Eji netiu anaa eng'udi nadumu oltung'ani! Anaa etiu anaa eng'udi nadumu ilo leme enchata.

¹⁶Ore te nkaraki ina, ore Olaitoriani, ilo Aitoriani loo lororani, kelo airriwaki esaso lelo murran lenyena oopir, ore ti abori enkitoo enye neinoki enkiyupuyup, naaijo enkiyupuyup e nkima.

¹⁷Ore ina wang'an e Israel naa keaku enkima, ore ilo lenye sinyati neaku olng'ejep le nkima, naa kenya ninye nemut lelo kiku lenyena o suut pooki te nkolong nabo.

¹⁸Ore ina kishiaa e ntim enye o ene ina kop enye nalepo, naa keidakie Olaitoriani pooki; osesen o enkishui, netiu anaa oltung'ani omuoi te nemenayu.

¹⁹Ore olpisiai le lelo keek lenyena ooleku naa keaku kuti, o metaa ninye keidim enkerai aikena.

²⁰Ore kenya teina olong ilo pisiai le Israel o lelo oolekuni le nkaji e Yakobo, nemeitoki aairishakino ilo orere leyieu ear ninche amut, kake Olaitoriani eirishakino ninche. Ilo Sinyati le Israel eirishakino te sipata.

²¹Olpisiai olo arrinyunye, ilo pisiai le Yakobo orrinyokino Enkai magilani.

²²Amu ore hoo neba iltung'ana linono le Israel anaa osinyai le naiposha olpisiai ake lenye orrinyunye. Etudung'okoki enkiguana e nkidaata te sipata.

²³Amu ore Olaitoriani loo lororani naa kelo aiting'ie anaa enatudung'oki tiatua enkop pooki.

²⁴Ore te nkaraki ina, nji ejo Olaitoriani, ilo Aitoriani loo lororani: “Lo tung'ana laainei, kulo oomanya Sion, emiureyu ile Asiria te neoshisho te ng'udi aashu te nedumu orinka lenye aar intae anaa apa enaikuna ile Misiri.

²⁵Amu ore te nkiti rishata naa keish engoro ai, neibelekenyakino engoro ai enkidaata enye.

²⁶Nedumu Olaitoriani loo lororani eng'udi agilunore ninche anaa apa pee eosh Midian te ndapidapoi e Oreb. Ore eng'udi enye kelo shumata enaiposha, naa kedumu ninye anaa apa enaikuna te Misiri.

²⁷Ore teina te neiwuang'a ilo ola lenye to loililai lino, negili ina shata enye emurt nanapishoreki te murt ino.”

²⁸Eilepa ninye alo Rimon, eewuo ninye Aiat; etudung'o ninye enkop e Migron, ore te Mikmash neshum ninye olola lenye.

²⁹Etalang'a ninche te lang'ata, neirrag Geba enkewarie nabo, neikirikira Rama, ore Gibea e Saul neilanyisho.

³⁰Teyietu nchira, natito e Galim! Entoning lo tung'ana le Laisha! Tawaliki ninye, iyie, Anatot!

³¹Eisikita Madmena, ore lelo oomanya Gebin neilanyishote aaing'oru enesaru.

³²Ore ena olong kelo ninye aitashe te Nobu, nelo aikirikirie enkaina enye te ilo doinyo le nkidaata le Sion, teilo doinyo le Yerusalem.

³³Ng'ura ajo ore Olaitoriani, ilo Aitoriani loo lororani, kedung lelo ng'osil te ngolon naitureisho; ore ilo magilani oado naa kedung'i, ore lelo oorup ate neitadouni.

³⁴Kedung ninye ina asuri e ntim te ntolu, ore Lebanon o lelo keek lenyena sidain neurori.